أبوي أبوي لو صد عني ماترجيته

المساهمات : 350 تاريخ التسجيل : 02/08/2007

و ابوي ها البنيه اتعرف كيف اتثير فضولي ما بغيت اسالها ولا سؤال اباها ترمس ابروحها بس شكلها ناويه اتخبل فيني قبل ...بغيت ايير عنها استكانة الشاي بس علشان ترمس و تريحني ...بس الظاهر عايبنها الشاي..الحبيبه يالسه تشرب ع راحتها و سرحانه..
و الله مدري حق شو متصله بي ..يلست امشي بالحجره من الملل..رايحه راده ...ع بالي بتحس فيني.. و بتقول حرام روعت البنيه.و خليتها اتيي بسرعه ....بس الي يقهر انها صبت لها استكانة شاي غيرها..و يلست تشرب ...اتنهدت يلست ع الكرسي الهزاز.. و شلت الارنب و حضنته ...خولوه يا الدبه حسي بي ...
نادتني: نوره ..
نقزت من مكاني اخيرا: هـلا و اللــــــه ..
وقفت خوله: تعالي انروح نتمشى برع ..
طالعتها مستغربه: ويـن برع !
خوله: بالحوي ....بتييين..
نوره : يالله زين تعالي نظهر ...
طلعنـا من حجرة خوله.... و رحنا برع فـ الحوي نتمشى...هاي الظاهر تستهبل علي ...طالعتها ..
خوله: شو فيج..
نوره: ماشي بس خاطري اضربج..
خوله: هههههههه ليش..
نوره: ما اجوفين عمرج يالسه تستهبلين علي...متصله بي ميته من الصياح و يوم ييتج ركض..لبستيني..
خوله: بغيتج اتكونين جريبه مني علشان احس بالامان...
نوره: من شو متروعه...

طلعنا عند باب الحوي طالعت صوب الزراعه ادور خالي احمد بس ما كان موجود الظاهر طلع يلسنا ع الصبيه برع ...
اشرت خوله صوب الزراعه الي كانت تفصل بين باب بيت خالي احمد و بين باب بيت خالوه عايشه..
خوله: كنت هناك نوره ...يوم جابر رمسني..
انصدمت:شووووووو رمسج ...
خوله: و الله...تدرين مدري اليوم ليش نشيت من صباح الله خير..ما ياني رقااااااااد رحت المطبخ جفت امايه قاعده اتسوي خبز...اقترحت علي ان اخذ بيت خالوه عايشه صحن خبز حق خلود
نوره: و رحتـــي..
ردت و ملامحها جامده: هي رحت ..ما لقيت حد فـ بيت خالوه عايشه غير حميد كان يتريق فـ الصاله..حطيت له الخبز .."طالعتني" ع فكره رمسني عن شرطج...
نوره: مب مهم كملي سالفتج ...
خوله: حميد يوم سالني عن سالفه الشرط..سويت روحي ما اعرف السالفه ..مع اني اشك انه صدقني لانه يدري انج ما تخبين علي شي ...المهم طلعت و رديت بيتنا..جفت سياره تجرب صوبي ابد ما خطر ع بالي يكون جابر ...اتغشيت ابسرعه..بس اتروعت يوم وقفت حذالي...

من خوفي ما رمت اشيل ريولي من ع الارض تميت متيبسه ابمكاني...الي صدمني انه نزل من السياره...هذيج الساعه حسيت انه بغمي علي..بس تداركت عمري
يوم سمعته يقولي: شحالج خوله ...؟؟؟
من غير ما ارفع راسي و اجوف منو هالشخص الي يزقرني باسمي عرفته من صوته ها جااابر ...
نوره: زين شو قالج ...شو يبا منج ...امه ما كانت ويااه تدرين ما يودر امه ولد امممممممه
خوله: ههههههه لا كانت محد ..عشان جي كان ماخذ راحته معاي و طلع كل الي في خاطره..
نوره: شو كان فـ خاطره ..؟؟
خوله: تصدقين لو قلتلج انه من جافني يوم سرنا انجوف شيما حرمة اخوي خليفه..ما غبت عن باله...
نوره: اللوتي...شو قلتي له
خوله: سكت ما عرفت شو ارد بوقتها كنت مصدومه ما كنت امصدقه انه جابر واقف جدامي و يسولف معاي..
تطنزت:من دون امه..
خوله: هي صدقج نوره...تدرين سكت موليه ما قلت ولا كلمه ..بس هو قالي ..

جابر: جوفي خوله انا و الله للحين اباج..و الدليل اني للحين ما تزوجت غيرج..لاني اباج...كنت اظن اني نسيتج بس من جفتج فـ بيت عمتي"حرمه عمه عبدالله" اتخبلت...وايد تغيرتي..
صديت عنه بس ترجاني: دخيلج قولي أي كلمه ..بعدج تبيني...
حسيت بهذيج الساعه اني بطيح فمسكت سياج الزراعه...الي قهرني انه انتبه لـ هاي الحركه
سمعته يقولي: انا اوعدج اذا رجعنا لـ بعض بنطلع بيت ابروحنا بعيد عن امايه و المشاكل ...
فهمت قصده انه عرف انه ظلمني و ان امه كانت سبب كل المشاكل..بس تميت ساكته...الظاهر تملل من كثر ما يسولف و انا صاخه...
ففتح باب سيارته و قال لي: انا بطلبج من ابوج..و كل شروطج بنفذهاااا
حرك سيارته و اختفى بلحظه..تدرين نوره حسيت اني قاعده احلم...؟؟جابر يظهر لي فجاه..!! و يبا يردني !! و يطلعني فـ بيت ابروحي ..!! و يتسامح مني..بذمتج ها مب حلم ..؟؟؟
نوره: و انتي شو رايج خوله ..؟؟
خوله شويه و بتصيح: محتاره نوره...اخاف ارفض و اخسر فرصتي و اخاف اوافق و اتبهدل مره ثانيه..
حرجت عليها: انتي من صجج فكرتي بكلامه انتي تبينه ...؟؟
خوله: ما ادري نوره ما ادري ..
نوره: شو ما تدرين..انتي ما عندج كرامه المفروض ما تعطينه فرصه يرمس معاج...انتي ما صدقتي ظهرتي من الحاله الي كنتي عليها بعد ما طلقج بعد تبين تردين له ..خوله وين راح عقلج...؟؟؟
خوله ردت اتصيح: حرام عليج لا اترمسيني بهاي الطريقه انا ابروحي محتاره..
نوره: ارفضيه ولا تفكرين فيه خليه يزول..
خوله: ...............؟؟
نوره: اتعرفين رقمه ..
خوله: لا ..شو بتسوين ..؟؟
نوره: بحط حد لهاي المصخره..
خوله: نــــــوره..
قاطعتها: خوله فكري شويه بعقل..و ابعدي قلبج انتي نسيتي كيف كانت حياتج...؟؟
خوله: بس وعدني انه بتغير كل شي..
وقفت مب متحمله غباء خوله: و صدقتيــــــــنه...انتي محد بياخذج غير عمور ..لكن جابر و غيره بدمرون حياتج..
خوله منفعله: اخوج ما يباني غصب اتزوجينه لي ..
نوره: هي غصب لانج انتي وحده غبيه ما اتعرفين وين مصلحتج...ولا اقولج..تزوجي الي تبينه انا مايخصني لا فيـ حياتج ولا حياة عمور ..

و دخلت بيت خاولوه مريم ..اييب شنطتي علشان اروح شقتي...خلاص تعبت كل شي ضدي..كل الي اباه و اخطط له ينجلب ضدي ...
لحقتني خوله: لحظه نوره انا ما اقصد اني اضايج بس انا اباج تساعديني
شليت شنطتي: تبين رايي الباب الي ييج منه الريح صكريه علشان ترتاحيـن ...

وطلعت عنها بس هالمره ما لحقتني ادريبها خوله..بترجع اتصيح و بتتضايج..بس هي حماره اذا قبلت جاابر..انا ما ادري وين عقلها ...
كل ها صار البارحه...بس اليوم حسيت ان تفكيري تغير.. يمكن صج جابر تغير ؟؟ و الدليل انه بيقبل كل شروطها..؟؟ و انا حرجت و عصبت لاني اباها لـ عمور...لاني اخاف تنظلم مره ثانيه...حطيت كوب الحليب ع الطاوله.. و طلعت من المطبخ..شلت الروايه و يلست اقراها بس ما قدرت اكمل...انا شو مصلحتي اني ازوجج عمور لـ خوله...
انا مالي مصلحه بس عمور و خوله اغلى شخصين في حياتي....و خوله توأم روحي اباه تسعد و تتهنا بعد ما تطلقت من جابر .. و تعبت نفسيتها ...
ما هانت علي..صح من هذاك اليوم و انا ارسم اني ازوج عمور لـ خوله...اتنهدت بالاول حميد وقف ضدي ..علشان يمنع زواج نهله من عمور.. و الحينه ظهر لنا جااابر ..
.الظاهر الي افكر فيه مستحيل اسويه ...

نقزت بمكاني يوم رن تلفون الشقه..منو متصل بها الوقت !!! جفت الساعه 7 ونـص ...شلت السماعه ..
نوره: الو ..
خوله: السلام عليج..
نوره: عليج السلامه خوله !!
خوله: شحالج نوره ...؟؟؟
نوره: ابخير "ما توقعت نفسيت خوله جي ع بالي بتكون مضايجه و عادي مرقده فـ المستشفى"
انتي شخبارج اليوم..؟؟
خوله: وايد زينه الحمدلله...امممممم يالله تزهبي ... بنمر عليج انا و خليفه
عقدت حياتي: وين..؟؟
خوله:..شو انتي نسيتي رحلة البر..
نوره: هي و الله نسيت بس ما بروح مالي خلق..
خوله: حرام عليج ..يعني انتي للحين زعلانه مني ع سالفه البارحه..
نوره: و ليش ازعل هذي حياتج الشخصيه انا شو دخلني ..
خوله: عيل خلاص تعالي علشان خاطري ...؟؟؟
نوره: منو بروح معنا ..نهله بتيي
خوله: كلنا بنظهر...انتي شتبين نهله خليها بحالها هم ابروحهم و نحن ابروحنا ...يالله تزهبي انزين بعد ساعه جي بنمر عليج...
نوره: اقولج ما بروح..
خوله: عشان خاطري تعالي انغير جـو ..ما بتخسرين شي ..
نوره: صدقج انا شو بخسر شو تبين اييب معاي ..
خوله: اممممممممم لا اتييبين شي كل شي زهبناه ..ما في شي ناقص ..
نوره: خلاص عيل مـرو علي..
خوله: فديتج نوره..

وصكرت التلفون...شي غريب ان خوله مستانسه..يمكن عشان الطلعه..داام هي مستانسه معناتها اتخذت قرار و اقتنعت فيه...بس يارب ما اتكون قبلت كلام جابر اتمنـى من كل خاطري..

المساهمات : 350 تاريخ التسجيل : 02/08/2007

((..الحـــــــــــلقـة التاســـــــــــــــــعة ..))
" ضماي انت ومن يعشق ضماه غيري..جروحي انت ومن يكرهه دواه غيري..اسقني لو ماارتويت داوني لو ماشكيت..ماهقيت اني اعطش في حياتي لغيرك انت..وما دريت ان ما به اغلى منك الا انت
ياضماي ياضماي انت

طلعنا بـ 7 سيارات...انا و خوله مع خليفه.. و خالي احمد مع خالوه مريم...و حميد ابسيارته معاه خالوه عايشه و نهله و محمد مع خلود ابسيارتهم و المفاجاه ان عمور ياي معانا بسيارته مع انه ما طرا لي ولا ياب سيره انه بيروح الرحله..طبعا نهله هني لازم بيي ...المهم و كانت سياره العم عبدالله عم قوم خوله و خليفه و خلود.. و معاه زوجته و شيما.. و سياره اخيره كان سيف اخو شيما...و معاه وحده من خواته المعرسات و الثانيه ما كانت يايه ...
اتفاجات ابصراحه ها الكم الهايل اول مره جي نتيمع و اول مره قوم عم خوله يظهرون معانا مكان..الظاهر زواج خليفه من شيما جرب العايلتين مع بعضهم البعض...

صدقها خوله خلينا نستانس هاليوم ..و ننسى الهم و الحزن لو ساعات...سرنا صوب وادي سيجي..مع ان الجو فـ راس الخيمه كان ممطر..اتوقعنا يكون نفس الشي فـ الفجيره...فـ البدايه مرينا ع دبـا جفنا زحمة..وايد عائلات ظاهرات يرحلون..اخرتها سرنا صوب وادي سيجي...بعد شي ناس بس اخترنا مكان بعيد عنهم شويه...حسيت بشعور حـلو و بنفس اللحظه ممتع ...يمكن علشان الجـو كان مغيم و توقعنا تطيح امطار ...بس الحمدلله للحين ماشي ...اتيمعنا كلنا ووقفنا ابمكان..اشر عليه خالي احمد..يكون بعيد عن الوادي ...

نزلنا كلنا من السيارات ...فرشنا الحصير .. و اجاسمنا...سوينا برزه حق الريايييييل و برزه الثانيه حق الحريم...قررت بها اليوم انسى كل شي..عداوتي مع نهله.. زعلي مع عمور..ضيجي من خوله..قههري من حميد...
الشباب قاموا ..ينزلون الاغراض... و قبلها جافوا قعدتنا كاشفه ع عايله كانت موجوده ع يمينـا .و كانوا .وايد شراتنا...فقاموا عمور و حميد و سيف و خليفه..حركوا سياريهم..ووقفوها ع شكل حاجـز ..علشان ناخذ راحتنا ...
سلمت ع خالوه عايشه و ع ام سيف ..ونهله و خلود...و شيما و اختها رضيه ..زقرتني خلود..
_ تعالي نوره شيلي هاي السله شويه ..

اتجدمت منها صوب سياره ريلها.. و كان خليفه و خوله ينزلون الاغراض الي كانت معاهم ..
خلود: اليوم بس قعدي راقبي شيما و خليفـه..
خليفه: اسمعج يا الدبه.
نوره+ خوله + خلود= هههههههههههه
محمد: خلود تعالي خذي جسوم رقد..
خلود: زين من حسك بنش ..

شليت السله و كانت فيها مواعين..خذتها صوب خالوه عايشه و مريم ..و ام سيف لانهم كانوا يرتبون الاغراض...
سالتني خالوه مريم: جم الساعه..
جفت ساعتي: عشر ونـص ..
مريم: عيل متى بنسوي الغدا !!
خالوه عايشه:صبري تو الناس ...
مريم: زين انا بس سالت شو صار
ام سيف: انحط لهم الريوق..

كنت اراقب مناقشات العيايز وناسه..
خالوه عايشه: انحط لـمنو الشباب ما صدقوا روحـوا جوفيهم وين وصلوا..
صديت مكان ما اشرت خالوه عايشه جفتهم راكبين فـوق قمة الجبل ...
خالوه مريم: يمه عيالنا "وصرخت لهم"شويه شويه عن اطيحون..
خالوه عايشه + ام سيف: ههههههههههه يهال شو ..
سمعت صوت خالي احمد من الصوب الثاني: مريم وين الريوق ...
طالعت خالي احمد.. و الريال الي قاعد حذاله اول مره اجوفه ها عبدالله اخو خالي احمد..امبين اكبر عن خالي احمد...قاعد يشيش حتى هني..بـها الجو و الهوا النقي المفروض الواحد يستغل هالشي و يتنفس هوا نقي ..و ها الحبيب قاعد يترس صدره دخان...

سرت صوب الحريم حطينا الريوق لـ خالي احمد واخوه عبدالله... وودتهم شيمـااا ... و حطينا صينيه ثانيه..حق الشباب لـ ما يردون ... و حطينا لنا... انا ما كنت مشتهيه لان متعوده بس اشرب حليب..بس الخبز الرقاق الي امسوته ام سيف ابصراحه كان يشهي.. و خاصه المهياوه لذيذه يم يم يم..كلت لـ ما شبعت ..قمت اغسل ايدي...وسرت صوب سياره خليفه اطلع موبايلي ...اتجدمت مني شيما..
ابتسمت لي و رديت الابتسامه: عادي لا تضايجين مب قاعده اتعبث بسيارة ريلج بس كنت ابا اييب موبايلي ..شيما: ليش هذي سياره خليفه هههههههه
نوره: هي هذي سيارته ..ما تدرين..
شيما: جفته واقف حذالها بس ع بالي هذي سيارته "و اشرت لـ سياره محمد"
نوره: لا هذي سياره محمد ولد خالتي الا هو ريل خلود...تعالي تعالي ..

وسرت فتحت لها باب سياره خليفه
قلتها: تعالي فتشي السياره ع كيف كيفج ...ترا يقولون الريال اسراره كلها في سيارته..
شيما: اخاف اجوف اشيا تصدمني و انا ما كملت يومين من ملجتي ..
نوره: ههههههههههههه انا اضمنه لج..اتصدقين ما بتلاقين شرات خليفه..لا اتقولين بنات وما بنات..ها الانسان حياته كل كره قدم...
شيما: الحمدلله...
ييريتها تعالي يلسي هني و قعدتها مكان كرسي خليفه..فتشي اكتشفي ريلج ...

ضحكت سرت عنها ...لفتني ان رضيه قاعده مع نهله و يسولفون غريبه !!..سرت صوب خوله...كانت تغسل ايدها ..
خوله: وين سرتي..؟؟
نوره: رحت اييب موبايلي و خليت شيما اتفتش سياره خليفه..
خوله: هههههههه حسبي الله ع ابليسج ..بطلقينهم
نوره: هههههههه قالت لي نفس الشي .."همست"جوفي نهله قاعده اتسولف مع بنت عمج رضيه...
خوله:شو فيها..
نوره: ماشي بس تقهر اتسوي روحها طيبه ..تعالي نتمشى..
خوله:يالله ..
سرنا نتمشى..جفت خلود كانت اتحاول اترقد ولدها...
خالوه مريم: لا تروحن بعيد...
خوله + نوره= ان شاء الله...
تمشينـا ابتعدنا كنا ساكتات..طاح انفاف شويه ...
خوله: ويه اخاف الدنيا تمطر ما شي غدا اليوم..
نوره: ما اعتقد جوفي الغيم وايد خفيف..
ركبنا فوق الجبل بس مب وايد ..فوق لان خوله اتخاف..شفنا حميض قطعنا منه و يلسنا ناكله كان طعمه لذيذ...
خوله: وين روحـوا ها الخبال عفدوا فوق الجبل و اختفوا..
نوره: هذيلا ما يصدقون خبر ...يتيمعون ..يتخبلون و يزيد خبالهم ..
خوله: ناقصنهم فارس..
نوره: يولي .. شو ذكرج فيه ...
خوله: لا تنسين اخوي ...
نوره: نسيت خلاص ...و بعدين انتي قلتي خلنا اليوم نستانس يعني ما في داعي تطرين لي اشخاص يغثوناا
خوله: زييييييييين عنبوه مب قلب عليج ...
نوره: شو سويتي بسالفه جابر ..اجوفج مرتاحه..
خوله ابتسمت: هي تدرين.رمست خليفه و خبرته كل شي ..
نوره: و شو سوا خليفه ضربه..
خوله: هههههههههه نوره يا حبج للمشاكل..
نوره: عيل شو سوا !!
خوله: اتصل به البارحه فـ ليل.. و جابر قال خليفه نفس الكلام الي قاله لي..حتى قال انه باني بيت..اذا رديت له بنعيش هناك ...البيت بعيد عن بيت امه..
حسيت بطعنه في قلبي خوله تخبلت : و انتي وافقتي !!
خوله مستانسه: بيرمس ابوي هالاسبوع ..

كنت بقولهااا انتي اغبى انسانه جفتها ع وجه الكره الارضية ..
قمت عنها و سرت اركب الجبل و انا مليانه غيض..
خوله: ايه وين رايحه..
نوره:بعق عمري من فوق الجبل...
ركبت لي ما وصلت القمه الله الدنيا حـلوه ..جفت خلود و شيما و رضيه و نهله..ياي صوبنا..
خوله: نزلي عن تطيحين..
نوره: ما بنزل ...تعالي ركبي جوفي العالم روعه ...
خلود: صبري انا بيي اركب معاج..
نوره: لا خلي نهله اتيي عشان اعقها من فوق..
نهله: مينونه ايي صوبج..
الكل: ههههههههههههههه

ركبت خلود و شيما ..و يوو صوبي اما خوله و رضيه و نهله خافن ..سمعنا خالوه مريم اتزاعج عليناا و اتاشر انزلوا ...ضحكنا عليها ..
خلود: جوفي هناك وايد حماض...
نوره: الله تعالي ناخذ حق خالاتي..
شيما: ابوي يحبه وايد...

سرنا صوب الحمااض ..و قطعنا اشكثر ...لمحت مكان برزة الشباب ..جفتهم يالسين يتريقون ...الغريب انهم كلهم لابسين قمصان و بنطلون..زين المكان يناسب هاللبس ...و انا اشلي بها الافكـار ...
خوله: يالله عاد نزلوا...من فوق..
شيما: لقينا حماض اشكثـر ؟؟
نهله: ييبو لي ..
نوره بصوت واطي : انتي لو تبين بنعطيج جت ..
خلود:هههههههه حرام عليج...
شيما:هههههههه

نزلنا.. و سرنا مكان يالسات..حصلنا هزبات من خالوه مريم..لان ركبنا فوق ..بالعالي..حسيت بالبروده..اتمنيت لو يبت زلاغي ...قعدنا انسولف البنات ارواحهن و الرياييل ارواحهم..لمحت نهله تتامل عمور..و عمور ما منتبه لها ...بغيت افقع عيونها ..
نوره: نهله..
نقزت اطالعني..
نوره: حذالج جلاسات الماي ممكن اتفرين لي جلاس..
نهله شكله مرتبكه: ها اندوج..
خذته عنها بقوه و طالعتها بنظرات كانها فهمت قصدي فابتسمت منحرجه

المساهمات : 350 تاريخ التسجيل : 02/08/2007

الفتنا كلنا للصوت الي ياه من صوب الشباب ...و كان تشجيع..جفنا محمد يظهر الكره من سيارته .. و شكلوا فريقين..خليفه و سيف و محمد فريق.. و عمور و حميد ..فريق ...خاطري العب معاهم حلو الركض بها الجو البارد..يلسوا يلعبون ...مليت من سوالف البنات..يلست اتامل الطبيعه..جفت شيما اطالع خليفه و خليفه كل شويه يتبسم لها.. ..
حلوه علاقتهم طالعت نهله جفتها مندمجه بالسوالف مع رضيه ...
صرخ محمد يوم ياب هدف ع قوم عمور وحميد..فصفقت له خلود...عاد محمد من قده نفخ صدره... و شويه كل وحده قامت اتشجع فريق..و الحريم قامن يشجعن فريق محمد و خليفه و سيف.. و الشواب يشجعون فريق عمور و حميد ..الظاهر غمضوهم لانهم مهزومين..

.نشيت من مكاني متملله..ما عندي حد اشجعه ...اوني يايه اغير جـو ..صحيح الجـو حلـو بس بعض النـاس خربـوا
شويه..قامن الحريم ..يسون غدا و الشواب ساعدوهم ...كان شكلهم حـلو اتمنيت ييبت معاي كاميرت فيديو اصور..خالي احمد قاعد يحـاول يشب النار.. و خالوه مريم اتغسل العيش.. و ام سيف اتقطع الدياي و تنظفه...اخيرا ها الي كنت اتريا شيما و خليفه قاموا يسولفون مع بعض .. و ساروا بعيد ..الظاهر نسوا عمارهم ...
خوله: شفيج نوره...؟؟
نوره:شوه..؟؟
خوله:يالسه ابروحج منعزله عن العالم و الدنيا تعالي شاركينا سوالفنا..
نوره: سوالفكم ممله...
رضيه: افـااا ..
نوره منحرجه: هههههههه اسولف ..

نشيت ورحت يلست فوق سياره عمور...اغايضه...لاني جفته يبتسم لـ نهله..رصيت ع شيلتي يوم جفت حميد ياي صوبي ..
حميد: شفيج يالسه ابروحج..
نوره: كيفي
حميد: و ابوي يوم اتصيرين متوحشه..
نوره: شكرا ..هاردلك..
حميد: عـلى ..؟؟
نوره: ع الهزيمه المره ..
حميد: ههههههههه تقصدين اللعبه من ساعه زين جفتي بروحج ماشي تكافؤ اثنين مقابل ثلاث ..
نوره: ................."ماشي رد"
حميد: جفتج من ساعه عافده فوق القمه .ما اتخافين..
نوره: لا بالعكس الجو فوق احلى...حتى حرمة خليفه و خلود كانوا معاي ...

قدر حميد يخليني اسولف معاه عادي..بس للحظه سكت يوم جفت نظراته ...هذي النظرات ذكرتني....لها وايد معاني...بالنسبه له بس انا مب قادره افهمه ...فسكت ..لاحظ اني سكت ..
حميد: نـوره انا قبلت شرطتج..
شو قال قبل شرطي..شو الي غير رايه ...؟؟ قبل شرطي بعد شوه..بعد ما قررت خوله ترجع لـ جابر.. المهم عمور ما بياخذ نهله لا اتضيعين الفرصه من ايدج نوره ...
حميد: نوره سمعتيني شو قلت ...؟؟
رديت ابرود: شو الي غير رايك..
حميد: لاني ما ابا اخسرج ..
نوره:بس ..

فاجانا عمور الي ياي من بعيد..
عمور: ما حلت لج القعده الا فوق سيارتي ...
صديت عنه: علها الحرق..
حميد: خيبه..
عمور: هههههههههه و تبا تزوجها شو تبا فيها ..

طالعت حميد شو دراه عمور ..لا يكون مخططين...علي ترا راح فارس ياه حميد يسوووونها ..
حميد: لا اطالعيني جي..انا مالي خص ها محمد مخبرنه..
عمور: هي محمد قال لي..و انت يوم تبا البنيه ليش ما اتخبرني ابروحك ...؟؟ خلاص انا مب موافق ..
حميد: مب مهم رايك المهم رايي ..بنت الخاله ..
عمور: نصيحه مني لك لا تخطبها هاي بتجلب حياتك نكد..
نوره: لا و الله مب جنك يالس ترمس عني و جدامي بعد..
حميد: ههههههههههههه وناسه ضرابتكم...
عمور: دوم جي يا عمي ..علشان ابا مصلحتك انا برفض طلبك..ولا انت ريال و النعم فيك ما تنعاب ..
نزلت من السياره: بس انا موافقه..

حسيت بالاحراج يوم جفت عمور يطالع حميد...المهم حميد وافق ع شرطي ..خلاص ابيع الدنيا.. علشان امنع زواجك عمور من هاي النحسه ..
حميد: يالله انت بعد عمور شد حيلك و خلي ملجتنا بيوم واحد ...
عمور"يطالعني" لا انا بعدني..قلت ما بعرس الا بعد ما اتعرس نوره...وين اخذها جان عرست ..
نوره: شو هالتناقض ..مب من فتره قلت لي تبا اتخطب و اتعرس قبل ما اتروح الدوره علشان تاخذ ست الحسن و الدلال معاك..
حميد:هههههههههههههه
عمور: هي قلت...زين شو بعد انتي انخطبتي من تملجين انا بخطب
طالعني بنظرات فهمتها انه يبا يخطب نهله بعده الحيوان يباها ...
حميد: متى دوامك..
عمور: و الله مدري شسالفه بالاول قالوا لي اجازه لي ما اسافر يعني خلال اسابيع..بس الاسبوع الي طاف اتصلوا بي و قالوا لي تعال داوم يمكن لان موعد الدوره تاخر ..
نوره"وقفت انظف ايدي من غبرة السياره" زين بعد من صالحـي ..
وسرت عنهم سمعت عمور يقول: الود ودي ازوجها اليوم قبل باجر...

سمعت ضحكت حميد ابتسمت عمور عسل..و يا بختها الي بتاخذه لانه يقدر الوحده و قلبه عود ..و هذي نهله ما تستاهله علشان جي ابا ازوجه خوله ...بس داام حميد قدر يمد ايده و يساعدني..خلاص بسوي اي شي علشان امنع زواج جابر و خوله ..بس اضمن ان عمور يخطبها بعد حرام اقطع نصيبها...

اتيددنا نحن الحريم و صلينا. و الرياييل صلوا جماعه.. و كان الامام سيف..ابصراحه صوته وايد روعه ... و كلنا سكتنا نسمعه يوم يقرا و يرتل ...كانت مفاجاه بالنسبه لنا...بس شيما و رضيه عادي الظاهر يدرون و متعودين يسمعونه يوم يقرا قران ...

تغدينـا نحن الحريم فـ برزتنا الخاصه فينـا و الشباب فـ برزتهم.. و الطبااخ لذيذ ...بعد الغدا يلسنا كلنا ويا بعض..كانت سوالف حلوه..كنا نشرب الشاي... و خالي احمد و عبدالله كانوا ماخذين الجو و يضحكونا بسوالفهم و باياام قبل ...و مع الوقت..قام خالي احمد و خالوه مريم يتمشون.. و خالي عبدالله مع رضيه و زوجته...اما شيما و خليفه روحـوا صوب سياره خليفه
زقرتني خوله: يالله نوره تعالي نتمشى.
كيف اطوف ع روحي هاي الوناسه بس يوم جفت نهله واقفه جريب من خوله معناتها بتروح معانا و انا مالي خلقها...غيرت رايي
و قلت: لا ما بتمشى بقعد مع خالوه عايشه ابروحها يالسه...
نهله: انزين ماماتيه تعالي معانا تمشي حركي ريولج شويه...
طلعت لساني اقلدها و يوم كانت ترمس جافتني خالوه عايشه و ضحكت علي اتلومت ..حسيتها حركه مب حلوه بس غريبه ان خالوه عايشه ضحكت و ما عصبت علي ...

خالوه عايشه: ما اروم امشي عايبتني القعده"و صدت لي" روحي يمه تمشي معاهم..
خوله: يالله قـومي نـوره..
نوره: اووووووووووه بعدين بييكن روحن انتن ..
خوله: زين بزقرج من بعيد لا اتاخرين تعالي..

جفت نهله اتزخ ايد خوله حسيت بقهر و غيض ..بس طنشت ما ابا اضايج ابعمري علشان وحده ما تستاهل ..هي تستانس و انا اموت من الغصه حق شو ..
خالوه عايشه: ليش ما رحتي معاهم..
رديت عليها: خالوه ما اروم بعدين بلحقهن خليني يالسه معاج شويه ولا ماا تبيني ...
خالوه عايشه: لا و الله ما قصدي بس طالعي الكل سوا له مجموعه و تمشي ..
طالعتهم ..صدق حـلوه الصحبه..
ابتسمت لها: انتي طالعي صوب سياره خليفه هناك السوالف الحلوه..
خالوه عايشه: هههههههههههههه قاعد ويا حرمته..
نوره: عشون عيل ..تتحرينه هين ها خليفه ..من تحت لـ تحت ..
خالوه عايشه: ههههههههه خليهم ما كملوا اسبوع من ملجـوا عقبالج ..
نوره: تو الناس خالوه .."حسيت بالاحراج يا ويلي اخاف تطري لي سالفه حميد ناقصه انا"
خالوه عايشه: الحمدلله مب قاصرنج شي شغل و تشتغلين.. و سياره عندج مب ناقصنج الا الريل..
رديت ابسرعه : الله كريم"يا رب اتغير الموضوع "
خالوه عايشه: حميد يباج حليلته ..

بلعت ريجي و صديت الصوب الثاني حسيت بداخلي رجفه..لان الموضوع صار جد.. و الحينه بديت احس اني قاعد العب لعبه عوده..و عادي اتصير مشاكل يوم ما اقول لـ حميد خلاص انا ما اباك...الله يستر..
خالوه عايشه: هههههههه شفيج تلومتي ..
ابتسمت: مدري شو اقولج خالوه ..
خالوه عايشه: الريال حاشرني من اسبوع يبا يخطبج و انا اقوله اتريا لي ما انخلص بالاول ملجة خليفه... الا ما خبروج البنات
هاي شو ارد عليها الحينه : هاه امبلى بس انا خذتها ع شكل سوالف ..
خالوه عايشه: بس مثل هالمواضيع ما تتخذ سوالف يمه..
نوره: .............................." قافطه مدري شو ارد "
خالوه عايشه: انا اعتبرج شرات بنتي نهله ..
بسم الله علي من بنتج وع
كملت خالوه: و الله يا نوره لو كنت اجوف حميد مب مناسب لج..كنت عارضته من اولها ..بس حميد ما ينعاب و هو ولد خالتج..و انتي بعد اتعرفينه زين ما زين..
طبعا اعرفه ولدج اكبر لوتي بس من تحت لـ تحت محد يعرفه كثري ..
سمعتها اتقولي: و امج الله يرحمها لو كانت عايشه كانت بتقولج نفس رمستي ...
نوره: الله يرحمها ...
خالوه عايشه: تدرين ان شاء الله هاليومين بنرمس خالج احمد علشان يرمس عمور ..

يتني الضحكه ما تدري ان عمور من ساعه واقف معاي و مع حميد و يبا الفكه مني ...يا ربي كل شي صار جد..الله يعيني و يستر كل من عمور جان راضي يتزوج خوله جان وفر علي شوط و ريحني من سالفه خطبة حميد ..اتنهدت ..لاحظت خالوه عايشه يوم تنهدت مدري الحينه وين بروح فكرها..
خالوه عايشه: لا تضايجين يمه انا ادري المفروض يكون ابوج موجود بهاي السوالف بس انتي تدرين ..
قاطعتها: انا ما عندي ابوه و انتي تدرين بها الشي خالوه ..
خالوه عايشه: مهما سوا ابوج فيج و في اخوج يبقى ابوج وواجب و حق عليج و ع عمور..
يتني الغبنه: خالوه شو اتقولين انا شكله ما اعرفه ...
خالوه عايشه: ابوج ماله ذنب...اهله هم الي كانوا ضاغطين عليه ..
طالعتها مستغربه شكل الموضوع انجلب من سالفه خطوبتي لـ سالفه ابوي ...

المساهمات : 350 تاريخ التسجيل : 02/08/2007

التفت لـ خوله الي كانت تزقرني من بعيد بس طنشتها و رديت اطالع خالتي بنظرات اترجاها انها تقولي كل الي انا ما اعرفه..شي غريب عمري 21 و كل هاي السنوات ما خطر ع بالي اسال ليش ابوي هدني و هد عمور !!!؟؟ يمكن عمور يعرف لانه اكبر عني..بس انا معقوله لها الدرجه كنت امسوته صفر ع الشمال..او سوالف الدنيا لهتني عنه
سالتها: خالوه رمسيني عن ابوي ..؟؟
خالوه عايشه: غناتي انت يايه تستانسين ف الرحله و اكيد لو كلمتج عن ابوج بتضاييجين ..
نوره: ما بضايج بس ابا اعرف ..و ما ابا حد يخبرني غيرج ..
ابتسمت لي و قالت ..:- اياام الاول كنا انرحـل وقت القيض صوب مسندم هناك يكون الجو احسن و ابرد ... و كانوا وايد ناس يتيمعون في مسندم من كل مكان..ابوي الله يرحمه ما كان يرضي ياخذنا مسندم.. و يقول تموا براس الخيمه احسن لكم.. و هناك وايد ناس .. بس انا من عرست و خذت ولد عمي الا هو ابو حميد.. وولد عمي متعود كل صيف يقيض في مسندم..بها المره خذني معاه... و الصيف الي بعده ما سرنا..لان كان زواج خالتج مريم وخالج احمد.. و زواج امج من سعيد
قاطعتها: خالوه اسم ابوي محمد
ابتسمت لي: هي ادري يمه بعدني ما فقدت الذاكره بس انا اقصد زواج امج الاولي من سعيد اخو خالج احمد..
هااااااااه شـووووه امي كانت معرسه ..قبل لا تاخذ ابوي..صدمه خلتني امبطله حلجي ..
خالوه عايشه: ليش ما تدرين اذكر مره طرينا هاي السالفه جدامج..
نوره: لا اول مره اسمع بهاي السالفه ...؟؟؟ انتي متاكده ..
خالوه عايشه: هههههههههه يا بنتي ..عليج سوالف ..بعدني ما وصلت للعمر الي يخليني انسى ...الحينه خوله تزقرج من ساعه بتروحين لها ولا بتسمعين..
نوره: ابرايها خوله..كملي دخيلج..كملي..موليه ما بقاطعج ..ما ظني شي صدمه اقوى هاي ..
خالوه عايشه: هذي السالفه صارت من سنييييييين يعني ماله حايه تنفعلين و تنصدمين..
هزيت راسي بمعنى نعم و انا كلي شوق ابا اعرف عن امايه اكثر عن ابوي بس الظاهر السوالف اتلخبطت في راسي ...

سمعت خالوه عايشه اتكمل: تزوجت خالتج مريم و امج في نفس اليوم من احمد و سعيد...مريم اختي تاخرت في الحمل بس ما شاء الله امج جم شهر و حملت..
يا ويلي حالي عندي اخوان و انا ما ادريبهم ...يالله ماشي اكبر عن هاي الصدمه ...بس اخاف يطلعون شرات عمور و يخبلون فيني ناقصه انا يكفيني خبال عمور ...
كملت خالوه :- و ربت امج و يابت علي و انا من عرسوا خواتي ما قمت اروح اقيض مع بو حميد فـ مسندم...بس امايه الله يرحمها بعد ما كمل علي سنة .مرضت خالتج مريم و تمت ع الفراش يمكن ثلاث شهور مب داريه بعمرها ...كلنا ظنينا انها تبا عيال و ان طافت سنتين ع زوجها و ما حملت ...و يمكن عشان نفسيتها مرضت..."و انا اقول خوله طالعه ع منو حساسه" ...
اقترحت امايه الله يرحمها..ان انقيض في مسندم .. ها الصيف علشان يمكن حالة خالتج مريم تتحسن ...تسترد صحتها و عافيتها ...فطلعنا بالمركب انا و امج و خالتج مريم.. و اذكر علي كان عمره سنه ونص.. و معانا..خالج سعيد و ريلي بو حميد ...
كانوا وايد ناس من كل صوب ياييين ...رياييلنا كانوا يظهرون البحر.. من الصبح و يردون وقت ما اتغيب الشمس ...الحمدلله نفسية خالتج مريم صارت احسن...باخر الصيف جهزنا اغراضنا علشان انرد البلاد..ووقت المغرب..يتنا عاصفه شلت كل الخيم و العريش عاصفه و الله يا نوره لليوم يوم اتذكرها يقشعر جسمي ..الله اكبر حسبنا للحظه انه غضب من رب العالمين.. وايد ناس راحـوا بهاي العاصفه..و منهم اخوج علي و خالج سعيد...و بو حميد كان بيرحوا فيها بس الله ستر و كتب له عمر يديد ...

ردينا البلاد..و ردت امج ارمله فاقده زوجها وولدها ...و خالج احمد من جاف حالة خالتج مريم تحسنت..ياب لها فارس الي كان بهذاك الوقت بحضن خالته بعد ما توفت امه الله يرحمها.. و كان بعمر حميد..استانست به خالتج.. و ربته شرات ضناها..

قاطعتها و احس ابعمري بصيح: امايه شو صـار لها ..

ردت علي: امج الله يرحمها كانت توم خالتج مريم..بس شخصيتهن متناقضات ..امج كان قلبها قوي و حرمه صابره عكس خالتج مريم قلبها رهيف ..بعد سنه اتفجوا خالج احمد وبو حميد يروحون هالسنه القيض...بس ابوي الله يرحمه ما رضى انروح ورا ازواجنا ..لانه خاف لا يصير شرات ما صار العام....و شرات ما صار لـ ريل امج سعيد وولدها علي..بس بو حميد و خالي احمد كانوا مصرين الا ياخذونا... و امج الله يرحمها من جافتنا رايحين..يلست اتصيح و حالتها حاله لـين ما رضى ابوي و سارت معنا ...

و هناك ابوج جاف امج..كان ابوج من اهل حتا ناس كباريه عايله عوده و معروفه...بس نحن ما كنا نعرف اوهمنا انه وحيد و ماله اهل ...عشان جي بعد ما ردينا من مسندم..طلب ايد امج..ابوي وافق عليه..و خالج احمد و بو حميد ما قصروا مدحوه و جافوه ريال ما ينعاب ...
و خذت امج ابوج.. و حملت امج و يابت عمور ...كان ابوج يروح عنها دبي بحجة شغله وما كاان اييها الا بالصيف..و يقيضون في مسندم ...و كنا انروح معاهم ...

بعد ثلاث سنين..كانت سنه سعيده لنا..لان خالتج مريم حملت.. وزادت وناستنا..يوم عرفت اني حامل و امج حامل فيج..بهذيج السنه..كلنا ربينا ..بالاول خالتج و كانت مفاجاه لنا يوم ربت بتوم..خوله و خليفه..و بعد شهرين ربيت انا بـ محمد ..و بعد عشرين يوم ربت امج و يابتج..و ابوج سماج ع اسم امه نوره "معلومه يديده" ..بعد سنه و كان ابوج موجود ويانا ..يتنا سياره عوده..و فيها ثلاث رياييل ..عرفنا من يومها ان ابوج من ناس كباريه و راهم ظهر ...و بهذاك اليوم كان اخر مره يجوفج فيه و يجوف اخوج و امكم الله يرحمها...غااب ..ولا سمعنا عنه شي ...و امج مرضت بسبب غياب ابوج ..و توفت..
قاطعتها: ليش ما سالتوا عنه يمكن صار له شي ..
خالوه عايشه: خالج احمد و بو حميد ما قصروا راحوا له حتا..يوم توفت امج الله يرحمها ..عشان يخبرونه...
نوره: خبروه ..؟؟
خالوه عايشه: هي خبروه بس قالهم ما اقدر اييكم.. و صاهم عليج و ع عمور ...
نوره: ليش ما خذنا معاه ..؟؟
خالوه عايشه: يمكن ابوه ما رضى..لانه تزوج امج من وراهم ..و يوم عرفوا خذوه و جبروهم يتم ..
نوره: بس بامكانه ينشد علينا الحينه ...؟؟ اكيد ابوه ماات ..
خالوه عايشه: معاج حق بس محد يعلم بالظروف ...كلنا مستغربين مع ان ابوج يحب امج وايد...مدري قاطعتها..
نوره: يمكن عندي اخوان من الاب..
خالوه عايشه: الله اعلم...اكيد لانه تزوج و امج يوم سمعت انه تزوج مرضت و توفت الله يرحمها ..
نوره: الله يرحمها فديتج امايه ...عانت في حياتها ..ازين خالوه لو سرنا له انا و عمور حتا بقابلنااا
خالوه عايشه: مدري يمه بس وين بجوفونه ..و ين مكانه بالضبط الله اعلم...الي اعرفه اهل ابوج كل سنه بدوله بالخارج

نوره: الدنيا تطورت خالوه و لو نبا انعرفه بايام بس دام انه ما يسال عنا و تبرا منا ..حتى نحن ما نبااه ..
خالوه عايشه تنهدت: و الله مدري شو اقولج..

نشيت من عنها و سرت ابعيد اتمشى ابروحي..اليوم عرفت اشياء وايده تتعلق بحياة امي و ابوي ...اكيد عمور يعرف كل شي بس ما قالي...اتنهدت..الواحد ينولد فـ الدنيا ما يعرف شو مكتوب له و كيف قسمة حياته ...
ما توقعت ابوي شخصيه ضعيفه ..يهد عياله و حرمته و يتزوج .. حتى ما سال عنا ولا يدري نحن عايشين ولا لاء ...اه..يا ليت الواحد يطلع من الدنيا و يختار امه و ابوه..جان وايد اشياء اختلفت..بس الي افكر به من سابع المستحيلات ...

بهذاك اليوم ..اشياء وايد فرحتني و اشياء زعلتني منها سالفه ابوي..شي يقهر ان الواحد يبيع عياله و اسرته عشان البيزات..ليش نحن باي عصر عايشين ...؟؟ هالزمن ولى من زمان ...؟؟

انسدحت ع الشبريه..و انا ناويه اطوي صفحة ابوي من حياتي .. و السالفه الي قالتها خالوه عايشه ..شي صار و انتهى.. و نحن عيال اليوم ...رقدت .. و نشيت ع اذان الفير..صليت و قريت قران ...بعد ما خلصت سمع صوت..نقزت..فـ البدايه تروعت بس بعدين اتذكرت ان شي شخص عايش معاي في الشقه الا هو عمور..طلعت من حجرتي ..سرت صوب حجرته جفته لابس ثياب الدوام..
عمور: صباح الخير نوره ...جوفيني اليوم نشيط..
نوره: كل عام و انت ابخير ..
عقد حياته: و انت ابخير ..ليش لا يكون يوم ميلادي و انا ما ادري..

رديت عليه: لا و انت الصاج يوم دوامك ..
عمور: ههههههههههههههه هي الحينه فهمت السالفه..نوره حبيبتي اختي سوي لي حليب ..
نوره: اســــــــــفه تندل المطبخ..
كنت بصكر باب حجرته بس سمعته يقول لي ..
عمور: لا يكون بعدج زعلانه..عيل البارحه سولفتي معاي في الرحله ..
نوره: هذاك البارحه ...لكن اليوم غير..ما بغيت افشلك جدام حميد و اطنشك مب حلوه بحقك بعد
كنت ارمسه من طرف خشمي..لاني بعدني متضايجه منه ع باله ارضى ابسرعه..
عمور: انتي لـ منوه طالعه جي جاسيه و قلبج حجر ..
نوره: لا ابويه ..
و طلعت من عنده و سرت المطبخ اسوي لي حليب ...لحقني ما حسيت فيه عشان جي نقزت يوم سمعته يقولي ..
:ليش طريتي ابوي ...؟؟
هزيت جتفي: مدري ..بس اذا كان فيني طبع يا باخذه من امي او ابوي ..
يلس ع الكرسي: يعني غريبه اول مره اسمعج ترمسين عن ابوي ..
نوره: يمكن لان البارحه خالوه عايشه رمستني عنه ..
عمور:..........................."ماشي رد"
نوره: ما فكرت اتروح له حتاا
طنش سؤالي : شو قالت لج خالوه عايشه ..
صبيت لي حليب في الكوب و تميت واقفه اشرب : عن ريل امي و اخوي علي .. و كيف ابوي جاف و امي و ليش هدنا ..انت اتعرف هاي السالفه..
هز راسه بمعني نعم و كانه كان سرحان ..
نوره: ليش ما قلت لي ..
عمور: لانج ما قد سالتيني ..
نوره: تعال انروح له خاطري اجوفه و لو من بعيد..
طالعني عمور مستغرب: تبين اجوفين ابوي !!شو الي غير رايج..
نوره: فضول ابا اعرفه حتى لو شكله بس ..
عمور: انسي ..ما بتصبين لي حليب !!

شليت الغوري و جبيت الحليب الباجي في الحنفيه: خل نهله اتسوي لك حليب ..يا بو نهله
و طلعت عنه ...حسيت بنفسي جاسيه و الي اسويه بـ عمور يخليه يعاند و يصر ع زواجه من نهله..ركبت سيارتي..رايحه الدوام بس عمور ليش يوم طلبت منه انروح انجوف ابوي قال انسي ليش ؟؟ معقوله راح له و رفض يجوفه بعد ولا شو الي يخليه واثق انا ما بنجوفه
رن موبايلي ..يالله صباح الخير منوه داق بهاي الحزه..طلعت الموبايل من شنطتي كان المتصل خوله ..

نوره: صباح الخير..
خوله: صباح النور ..وينج..
نوره: رايحه الدوام شو عندج ناشه من وقت احيد ماشي دوامات عطله نص السنه..انخمدي..
خوله: كيف تبيني ارقد ..و انا بطير من الوناسه ...؟؟

نوره: عسى دوم مستانسه بس ونسيني معاج ..؟؟
خوله: عشان جي اتصلت بج ..خليفه قالي البارحه فـ ليل ان جابر اتصل به ..وساله متى يرمس ابوي..
جنه حد صفعني الحينه هالخبر الي مونسنها و ياي اتبشرني فيه من الصبح ..
نوره اتطنز: و متى بيرمسه عقب ساعه..
خوله:ههههههههههههههه لا تتمصخرين علي ..بيرمسه باجر الاثنين ..فـ ليل ..
نوره: زين خوله..انتي موافقه..
خوله: هيه ..شو رايج نوره
رصيت ع التلفون و قلتها بكل غيض: ابوي ابوي لو صد عني ما ترجيته ...
خوله : نوره بس انا مرتاحه لها القرار
تنهدت مستسلمه : زين عيل لا تعطين موافقتج ع طول ..قولي بفـكر ..و ردي خبر ل خالي احمد بعد اياام..
خوله: اتصدقين انا امفكره جي اسوي..
نوره زين حبوبه انا وصلت المستشفى ..
خوله: اوكى برايج فيمان الله
نوره: مع السلامه ..

خوله ما عندها دم انا متضاربه مع عمور عشانها.. و هي تبا اترد لـ جاابر ها ولد امه..هاي خوله ما اتعرف مصلحتها موليه ..ما عرفت اشتغل اليوم فكري منشغل كيف اخلي خوله اتغير رايها ..و ترفض جابر..الحقير يبا يقص عليها مره ثانيه ..
التفت فجاه لـ نوف: نوف ابا منج خدمه انسانيه..
نوف: عيوني لج..
قلتها: اذا وحده ما اتعرف مصلحتها و تبا اتعرس من واحد كان مطلقنها ..قص عليها بكلمتين ..و هاي الانسانه غاليه عليج شتسوين ...؟؟
نوف: احاول اقنعها انها ترفضه..
نوره: و اذا ما اقتنعت..
نوف: هذيج الساعه تتحمل القرار الي اتخذته..
نوره: بس هاي الانسانيه عزيزه علي ..و هي وايد حساسه و عادي اذا جرحها هالشخص مره ثانيه اتروح فيها..
نوف: ابيه ..و الحينه شو بتسوين..
نوره: ما اقدر اسوي اي شي الا اذا ساعدتيني ..
نوف: قلتلج عيوني لج..
نوره: اباج تتصلين فـيها..و توهميها انج تعرفين طليقها..و انكم ع علاقه و انه يبا يقص عليها مره ثانيه ..و حتى البيت الي باننه عشانها كله جذب ..
نوف: افا عليج ما طلبتي عطيني رقمها ..

المساهمات : 350 تاريخ التسجيل : 02/08/2007

(( الحـــــــــــــــلقة العــــــــــــــاشرة ..))
"ارجــــــــوك ارجوك لاتذكر ذيك المواصيل..نسيت هذايك الليالي ونستني..كثر الجروح الماضيه علمتني..العام قلبي يشتكي منك الويل..والروح ولخطاك البعيده خذتني...عقب السهر والوجد والنوح بالليل....اليوم عيني بالمنام افتنتني...مااحد تحمل في هواك الغرابيل..وهذي طعونك في الحشى متعبتني..لا لك ولا لي لو نعيد التفاصيل..انسى وبنسى صدفه ضيعتني"

وصلت البيت ..ميهوده من الدوام ..صليت الظهر ..جيكت ع موبايلي جفت مكالمات اشكثر من خوله..ما ابرد عليها ..اكيد الحينه منهاره و مصدومه جاابر حبيب القلب ..كنت متاكده انها بتصدق نوف ابسرعه..لان الي سوااه فيها جابر قبل سنتين مب شويه..و شي طبيعي بتصدق أي شي عنه..رن موبايلي جفتها متصله..فريت الموبايل ع الشبريه..و طلعت صوب المطبخ اسوي لي لقمه...
فكرت يمكن حرام بالي سويته بـ خوله..بس كان لازم اسوي هالشيء هي حماره ما اتعرف مصلحتها ..و كان لازم اتدخل و احط حد لهاي المهزله ...سويت لي معكرونه ..بعد ما خلصت و تغديت..دش عمور علي المطبخ.. حط جيس العيش ..

عمور: تغديتي ..
رديت عليه من غير ما اطالعه: هـي ..
عمور: خساره ما لحقت يايب لج غدا من المطعم..
نوره: لا شكرا تغديت ..
طلعت و رحت حجرتي لازم اصلح الاوضااع مع عمور..عشان اقدر اخليه يوافق انه يخطب خوله ...انسدحت ع الشبريه اطالع السقف ..تذكرت موبايلي ..جفت .مسجات ..من خوله..كلها نفس المعنى اتصلي بي ضروري ..غلقت موبايلي ..فتحت السده الي كانت جريبه مني..و يلست اقرا روايه..سمعت حجرة عمور ينفتح و يتصكر..اكيد دش ينخمد..نشيت وقت العصر ..طلعت من حجرتي اطالع التلفزيون..و فكري مشغول بـ خوله ..يا رب بس ما صار لها شي جايد ..مدري كيف اجابلها ولا شو اقولها..انا مب رايمه ارد عليهاا لاني انا السبب بالحاله الي هي فيها ...
مر الوقت ابسرعه.. و عمور ما رقد وايد الظاهر سار التدريب ولا خالي احمد بحشره ....لبس ثيابه و ظهر من البيت من غير ما يقول لي أي كلمه ...يلست اطالع فـلم لي ما اذن المغرب ....سرت حجرتي اصلي.. و توني اطوي السياده..رن جرس الشقه..منوه ياينـي بها الوقت ..يدرون ان بعد ساعتين برقد ...
لبست زلاغي و ركضت صوب الباب ..

نوره: منوه ...؟؟؟
خوله: فتحي انا خوله..
فتحت الباب قبل ما افكر باي شي ...دشت و حضنتي و يلست اتصيح...حضنتها..غمضتني..خوله اتصيح ابسببي يا ليتني ما سويت جي..يا ليتني ما خليت نوف اتقص عليها..و اتمنيت وايد اشياء..بس كلمة يا ليت الحينه ما تفيد خلاص ..صكرت باب الشقه..و يرييتها..يلستها ع اقرب كنبه ..
مسحت ع جتفها: شو فيج خوله.
حرجت علي: اتصلتبج اكثر عن الف مره ليش ما رديتي علي ...
ما عرفت ابشو اقص عليها ..ماتت الكلمات في حلجي ..
خوله: كنت محتاجتنج وايد..

مسحت دموعها ابيدي و قررت اني اقولها خلاص انا مسويه بج هالمقلب عشان ما تاخذين جابر ولا اني اجوفها متعذبه جي ..
نوره: خوله انا ..
خوله: انتي شوه ..شو خانتج وقت ما احتاج ما الاقيج..
نوره: هدي انزين لا اتعصبين جي ..مب زين اتسوين ابروحج جي ...
غطت ويها ابيدها و يلست اتصيح..منهاره ما عرفت شو اسوي لها..و الله اني محتاره ..اخاف اعترف لها.. بتكرهني..شسوي..
نوره: اهدي خوله ثواني بسوي لج عصير ..
خوله: ما ابا شي ..
حطيت ايدي ع جتفها: امبلى لازم تشربين شي يبرد ع قلبج..

سرت المطبخ..
فتحت الثلاجه..جفت عصيرالبرتقال الطازج مال عمور الي دوم يشربه غسلت الكلاس. و صبيت لها.. زين بعد العصير بارد حسيت ابيدي ترتجف ...و قبل ما اظهر من المطبخ فاجاني عمور داش علي طالعته مستغربه !!ها من وين طلع ..
عمور: شو بلاها خوله مضايجه..
رفعت جتفي: مدري..ابروحي مصدومه و خايفه عليها..انت جفتها..
عمور: هي كانت اتصيح غمضتني ..
زين حسيت فيها فقدتك..
سالته: انت شو اتسوي هني ...؟؟؟
عمور: خلصت تدريب ياي ابدل..انزين ابا اعرف شو بلاها خوله..
دزيته: طووف اظهر من البيت ..مب وقته..
عمور: بتخبريني بعدين..
نوره: هي بخبرك يا الله اطلع..

سبقني عمور و ظهر من المطبخ.. لحقته..جفت خوله يالسه ابمكانهاا ..و امنزله راسها بالارض..عمور ما تجرا يكلمها..فظهر من البيت ..
خوله: ما ادري ان عمور موجود اتحراه بررع..
نوره: ياي من التدريب ..اندوج شربي العصير علشان ترتاحين ...
خذت عني كوب العصير بايد ترتجف..
نوره: مب ماكله شي صح..
هزت راسها بمعنى هيه ..

شربت خوله العصير كله .. و كانها صار لها ايام مب شاربه..طالعتها ..يا ويلي شو اسوي لو خبرتني سالفه نوف ..
نوره: شو مستوي ...؟؟
خوله: كنت راقده و دقت لي وحده ع الساعه عشر الصبح..
نوره تستهبل: منوه ..؟
خوله: وحده حقيررررره
حطيت ايدي ع حلجي مسكينه نوف مالها ذنب انا الي استاهل السب كله ...
خوله: اتصوري انها اتعرف عني كل شي و عن حياتي مع جابر ..
نوره: هاه يعني جابر بالسالفه.
خوله: هي ..النذل يبا يقص علي مره ثانيه خدعني نوره"وردت اتصيح"
نوره: فـ شو خدعج زين..فهميني السالفه و بسج صياح...
خوله تشهق: اقولج كلمتني وحده اتعرفه و ناوي يتزوجها.. و قال انه يبا ينتقم مني لاني طنشته هذاك اليوم في بيت عمي علشان جي ..فكر انه يرد..او بالاصح يقص علي ..
نوره: لو منج بستانس ان الله كشف حقيقته قبل ما ترتبطين به مره ثانيه صح ولا لاء..؟؟
هزت خوله راسها بمعنى نعم..
نوره: عيل ليش كل هالصياح..
خوله: مقهوره نوره..احس بداخلي نار ...مالي حظ في حياتي..

نشيت من مكاني .. سرت حضنتها...ضميتها بكل حنان..صحت معاها..كل مني..يمكن جابر صادق..و ندمان ..ع الي سواه قبل ..بس انا انانية كل الي اباه اسويه ...حطمت قلب خوله فديتج ..
خوله: انا قلت خليفه انه يتصل به و يقول له اني ما اباه و لو فكر و تقدم لابوي برده ..
مسحت ع شعرها: زين ما سويتي ...
خوله: بس خليفه استغرب اني غيرت رايي ابسرعه بس شكله كان مرتاح لـ قراري ..
نوره: انا بعد مستانسه انج غيرتي رايج..
قافطه مب عارفه شو اقولها و الله ..
نوره: شو رايج ترقدين عندي اليوم..
خوله: ما خبرت امايه ..
نوره: زين اتصلي و خبريها ... و باجر يوم بروح الدوام بوصلج شو قلتي..
خوله: محتاجه تغيير..

نشت خوله اطلع موبايلها و اتصلت بخالوه مريم..اتخبرها انها بترقد عندي..طبعا خالوه بالبدايه ما رضت بس يوم رمستها اقنعتها..اخرتها وافقت..عقبها اتصلتنـا بـ خليفه ...انخبره انه ما يمر ع خوله لانها بترقد عندي ..
حاولت اني اطلع خوله من الجو الي كانت فيه..
نوره: شو رايج انروح نتعشى برع ..؟؟
خوله: مالي نفس اطلع مكان..
نوره : عيل قومي انسوي لنا عشى ..
خوله: احسن مع اني مالي نفس ع الاكل بس عشان نتسلى ..
نوره: بتاكلين غصبن عليج..

نشينا و سوينا العشى....اخرتها صلينا العشى.. و انخمدنا..مع اني انا الي متعوده ارقد من وقت.. و خوله متعوده ع السهر صار العكس...خوله من حطت راسها رقدت..بس انا حاولت ارقد ما رمت...كنت افكر بـ خوله .. و بحياتها.. انا سويت شي جايد.. و اظن خوله لو عرفت الي انا سويته..يمكن اتقاطعني و اتصير مشاكل عوده ...
ما بتقدرني انا ليش سويت جي..ما كان قصدي اضرها بالعكـس كنت ابا انقذها من ها الي اسمه جااابر ..المهم الظاهر ان الموضوع عدا ع خير ...نقزت يوم سمعت موبايل خوله يرن..سرت اشيك ع الرقم.. جفت المتصل خليفه..
رديت عليه:- السلام عليكم..؟؟
خليفه: عليج السلام شحالج نوره ..؟؟
نوره: ابخير انت شحالك..
خليفه: الحمدلله ربي يسلمك ..
نوره: ما من شر..داق بهاي الساعه.
خليفه: خير .بهاي الساعه جي الساعه جم ..؟؟
نوره: عشره ونص..
خليفه: زين عشر و نص يعني مب هنتين ولا ثلاث ..
نوره: هههههههه تدري انا عندي ها الوقت سهر..
خليفه: زين و الله سهرانه يعني انتي ..
نوره: هههههه هيه ..بس خوله رقدت ..من وقت.
خليفه: و الله خوله راقده علمتيها اتصير ديايه ترقد من وقت ..
نوره: شنسوي كانت تعبانه
خليفه: هي ابا ارمسها عن جابر ..هي قالت لج شي..
نوره: قالت انها طرشتك اترد خبر لـ جابر انه خلاص ما تباه ..
خليفه: و انا خبرته ..بس انتي ما اتعرفين السبب ..
نوره: لا ما اعرف ..
خليفه: جذاااااااااااااااابه انتي ما اتعرفين مستحيل..
نوره: هههههههه صدقني بس قالت انها مب مرتاحه ..
خليفه: اهااا
نوره: شو قالك..؟؟
خليفه: منوه ..
نوره: ولد امه ...؟؟
خليفه: ولد امه ..لا يكون تقصدين جابر !!!
نوره: هيه جابر ولد امه
خليفه:ههههههههههههه ماشي..بس انصدم و ترجاني اني اقنع خوله ..
نوره: عشان جي انت متصل بها ..
خليفه: هيه بس ما ابا اقنعها..
نوره: ها عيل ..؟؟
خليفه: بس كنت ابا اتطمن عليها لاني جفتها تعبانه
نوره: الحينه صارت احسن..بس اكيد ما بتقنعها..
خليفه: لالالا انا اصلا مب مقتنع انه ترجع له ما يتأمن له زين يت من خوله..
استانست من الخاطر: و شو بترد عليه..
خليفه: بحكره ..يالله عندي خط ..؟؟
نوره: منوووه
خليفه: انتي شلج يالله جلبي ويهج..
نوره: ويا ويهك طووووووف
خليفه: هههههه فيمان الله..
نوره: سلم سلم مع السلامه..
خليفه: جب يالله ..باي
نوره:هههههه باي ..
مشكور خليفه وفرت علي ..الحمدلله انك فكرت بها التفكير ..الحينه بس برقد و انا مرتاحه..دام لقيت حد واقف معاي ..

المساهمات : 350 تاريخ التسجيل : 02/08/2007

بالباجر وصلت خوله بيتهم ..و سرت دوامي.. كنت طايره من الوناسه و خوله امبين نفسيتها صارت احسن ..بس يا رب اتصير من نصيب عمور..اليوم الصبح بعد ما صليت الفير ..رجعت و رقدت..قومتني خوله..اتفاجات انها مسويه لنا فطور انا و عمور...اول مره احسن صج ..ان بيتنا فيه حياة من نوع اخر..حياة مثل كل الاسر عايشنها..ما قد ذقت طعمها من ظهرت من بيت خالوه مريم انا و عمور..جفت هالشيء بعيون عمور..
عموريشرب الحليب: تسلم ايدج خوله..
خوله مبتسمه: و ايدك..
عمور: زين حنيتي علينا..مب مثل بعض الناس كل يوم الصبح..اقولها صبي لي حليب اجبه في الحنفيه بس علشان انا ما اشرب..
خوله شهقت: : نوره ليش اتسون جي..
وقفت و سرت صوب الثلاجه: خليه يتأدب ..
خوله: مب هاي الطريجه..
عمور: لا و الله يعني انا مب مأدب..
خوله: هههههههههههه اختك قالت مب انا ...

طلعت الجبنه من الثلاجه و يلست ابمكاني..
عمور: جوفيها عفانا الله كله وارمه و ماده بوزها شبرين ..
خوله: هههههههههه
نوره : هي هي تتحرا عمرك اتنكت ..
عمور: لا احاول.."ياشر لـ خوله" طالعي طالعي هني..الواحد ينش من الرقاد مرتاح يلاقي ويه يبتسم له ..ريوق. و كلام حلو .. و ضحك و سوالف .يعني شي حلو ...اتعلمي منهاا
خوله: اونك عمر تحرجني ..

رفعت راسي اطلع عمور..اتخيلت للحظه فـ المستقبل جي بيصير ..لو عمور تزوج خوله...روعه حياتنا بتكون حلوه..احس عمور مناسب لـ خوله اكثر من راعية المشاكل ...و الله لو نهله الي كانت موجوده مكان خوله اليوم ما بيصير كل ها ..
ابتسمت يوم سمعت ضحكت خوله..يوم عمور علق ع شي ..
عمور: و الله خوله اول مره اجوف نوره تبتسم الصبح ..دوم اتنش وارمه محد يروم يرمسها ..اظني شعرها المشط ما قد لمسه..
نوره: لا تستهبل ..
عمور: اعترفي انج اتمشطين شعرج اتغطينه بالشيله ..عفانا الله..
خوله: هههههههههههههه ابييه انتوا دوم جي ..تضاربون..
عمور: علشان اتحسون فيني ...الله يعين حميد عليها
خوله طالعتني مستغربه !!!
طالعت عمور: بس جب عمور ..لا تقعد تستخف دمك من صباح الله خير ..
عموروقف: زين بريحج مني بتاخر ع دوامي ابسببج ...خوله يا ليت اتسوين خير و اتمين لـ للغدا و اتسوين لنا غداا..نبا ناكل مثل الاوادم ملينا من اكل المطاعم...
خوله: لالا ما اروم اتم ابروحي هني شسوي..بس ما يهمك بنطرشلك غدا شو رايك...
نوره: طرشي بيقولج لاء..
عمور: هاا انتي بعد ترمسين ...اتعلمي منها الذوق تاكل ابروحها و اتجب الباجي في الزباله..زطيييييه
نوره: اففففففففففف انت ما اتقول اتاخرت ع دوامك..
عمور: هي و الله تاخرت ..فيمان الله ..مشكوره خوله ..
بعد ما طلع..
خوله: ليش جي اتعاملينه حرام عليج ها اخوج الوحيد..
نوره: بس هالفتره تغيرت عليه..
خوله: ليش ..؟؟
نوره: بس مضايجه منه ..الظاهر لازم اغير اسلوبي معاه لاني احبه ..اخوي الوحيد..يالله جاهزه ..
خوله: انتي غريبه ..هي جاهزه ..الا شو سالفه حميد ..ما قلتي انه رفض شرطج..؟؟
نوره: بقولج السالفه في السياره ..يالله انروح قبل لا اتاخر ..

ضحكت ابصوت عالي و انا اتذكر هالموقف عمور كان يستخف دمه و يستفزني بس علشان يضحك خوله ..زين شي تقدم..رديت البيت ..جفت عمور هالمره سابقني .. و قاعد يتغدا ...
عمور: تعالي تغدي ..خوله طرشت لنا غداا طيبه هالبنيه..
ابتسمت له: زين بغير ملابسي و بصلي اتريااا ..
عمور: غريبه راضيه علينا اليوم ..

طنشته و رحت حجرتي..و ليش ما اكون راضيه و انا اجوف علاقتك مع خوله تطور يا سلام شي حلو ..احسن لو تنسى راعية المشاكل ..
طلعت من حجرتي و سرت يلست مجابلتنه..يلسنا ناكل ..
عمور: منوه طابخنه ..؟؟
نوره: دام خوله طرشته يعني هي..
عمور: طباخها لذيذ مب شراتج ما اتعرفين اتسوين قرص بيض...
نوره: و ليش اتعب روحي باجر يوم بتزوج خوله هي بتطبخ لنا ...؟؟
عمور: ليش ان شاء الله انا بتزوجها و لا بخليها شغاله تخدمج..
غريبه انه ما قال ما اباها زين زين للحين كل شي حلو ..
نوره: لا لا دام العروس خوله ..انا بكون شغالتكم ..
عمور يصرط اللقمه: بس انا عروستي نهله مب خوله..
سد نفسي عن الاكل: لو تموت ...
عمور: شو بدل انتي حميد و انا نهله مب حلو جي..
صرخت عليه: لا مب حـلو ..
عمور ضحك: ههههههههه زين لا اتعصبين ..المهم انتي عرسي و خلصي و بعدين انا بفكر بنصيبي ..
كان ودي اضحك انت يا عمور ما تدري انا بشو مخططه لك ..يحليلك ع بالك بتزوجني و تفتك مني عشان تاخذ اللي تباها ده بعدك يا حبيبي ..

بعد الكلام الي صار بين خالي احمد و عمور عن خطوبتي من حميد.. و بعد ما اعلنت لهم اني موافقه..قرروا قوم خالتي اييون يتعشون عندي في الشقه ..يوم الاربعاء ...
و بها اليوم..عمور ياب عشا من المطعم ..طبعا منعته انه ايي الشقه طول ما قوم خالاتي موجودات علشان ما يجوف نهله..هو ما عارض مع انه ما كان يعرف شو السبب بالضبط ...

لبست الثوب الي لبستها في ملجة خليفه .. ثوب اليشمك...و حطيت مكياب خفيف ...يوم ييوا ساعدتني خوله في المطبخ .. و ع فكره هذي اول زياره لـ خالوه مريم و خالوه عايشه و نهله..اول مره يجوفون شقتي ... المهم تعشينا.. و انا كنت ميته فيني رقاد بس اوني ..مستانسه..ما كنت احس اني عروس ..او اني صج مخطوبه حتى الدبله الي طلعتها خالوه عايشه و تفاجات فيها ..ما حسيت انها دبلة خطوبتي ..لبستها ..كاي خاتم ينلبس ...استانسنا ..و سولفنا لـ الساعه 11 روحـوا

..بعد ما فضت الشقه و حسيت ان البيت فضى..رحت حجرتي جفت الدبله بايدي..فسختها و فريتها ع الارض .. و يلست اصيح..من الخاطر ..حسيت اني غلطانه .. و الي سويته اكبر غلط ...ضيعت عمري و سعادتي بجذبه ..بس عشان عمور و خوله ...صج بموت من القهر و الغيض لو عمور ما خذ خوله ...رقدت و انا ميته من الصيااح ..

تقريبا اسبوعين قطعت قوم بيت خالاتي .ما قمت اروح لهم ...مدري ليش كرهت السيره لهم.. و حتى اني ما قمت اتصل فيهم و قلت مكالماتي مع خوله..و الكل لاحظ اني ما قمت انجاف من انخطبت لـ حميد .. يمكن يحسبون اني مستحية كرهت الدنيا و كرهت حياتي ما كان لي خاطر اجوف حد او ارمسه ...عمور ما قمت اجوفه الا الصبح يوم انروح الدوام .؟..ووو...حميد اتصل فيني كذا مره بس ما كنت ارد عليه ..و فـ يوم .. كنت منسدحه ع الكنبه اطالع التلفزيون ...

رن جرس الشقه نشيت ابكسل و فجيت الباب .. و كانت خوله واقفه عند الباب ..
ابتسمت لهاا ما توقعت انها اتكون خوله..
خوله: ادخل..
نوره: دشي ..تستهبلين ..
خوله: ههههههه مدري عنج من انخطبتي قاطعتي العالم ...قلت ايي ازورج و اجوفج حيه ولا ميته ..
نوره: انا ابخير ...بس مدري شو صار لي
خوله: ندمتي..
هزيت راسي بمعنى نعم ..
خوله: قلتج من البدايه بس انتي ما صدقتيني ..
حضنتها و صحت: شسوي كنت مضطره ...
اتفاجاه خوله بردت فعلي: زين لا اتصيحين ترا شي وقت تتراجعين..
يلست ع الكنبه: شو الفايده اتراجع الحينه ..
خوله: عادي هذي الا خطوبه ..
نوره:مب قبل ما يخطب عمور ..
خوله: نوره انتي اضيعين حياتج عشان عمور و نهله شو تبين فيهم اذا هم يبون بعض انتي ليش اتخربين عليهم..
صرخت عليهاا: ما يبون بعض.بسسسسسس.انتي ما اتعرفين شي ..
خوله......................."ماشي رد"
نوره: اسفه ..خوله..
خوله ابتسمت: لا عادي ادريبج محرجه بس نوره ما يصير جي حاولي اتعيشين حياتج مثل قبل ...
نوره: هذا المفروض الي يصير ان شاء الله باجر بروح بيتكم بسلم ع خالوه مريم ..
خوله: هي جي اباج ...اممممممممم بقولج شي بتنصدمين..؟؟
نوره بخوف : شو لا يكون جابر بعد ؟؟؟
خوله:ههههه لا جابر خلاص انتهى من حياتـنا ..
نوره: اششششششوه ..عيل شو ...
خوله مبتسمه : فـارس ...
طالعتها مستغربه: فـارس ..؟؟ شو بلاه ها الثاني ..؟؟
مسك ايدي مستانسه: البارحه يااه و اتغدا فـ بيتنا ...
مصدومه: تغدا في بيتكم..كيف ..؟؟
خوله: ما بتصدقين..كلنا استانسنا حتى امايه..الله لو اجوفينه غادي ريال و النعم فيه..
ما صدقت كلام خوله فسالتها مره ثانيه: انتي تقصدين فارس فارس اخوج ...؟؟
خوله: هي هو نفسه ..
نوره: ها الي راغه خالي احمد..
خوله: هي هو فارس اخوي شو فيييييج
نوره: كيف مب فاهمه ..
خوله: هههههههههه قلتلج ما بتصدقين..رجع لنا شرات قبل ...ابوي سامحه خلاص..
نوره: لحظه لا اترمسين بالالغاز خبريني السالفه ..
خوله: الله يسلمج كل الي اعرفه.. انه كان ناوي يصالح ابوي بس كان خايف ان ابوي يرفضه...علشان جي قرر انه يصالحه بعد ملجة خليفه اخوي..علشان ما يضايج ابوي..
نوره تطنز: يا حافظ ..
خوله: صدق و الله ...طبعا عمور كان الواسطه...و دخلوا عمي عبدالله بالسالفه..
نوره: كنت حاسه عمور بالسالفه ..
خوله: هيه عمور ..المهم كانوا متوقعين ان ابوي يرفض و يحرج علي فارس ..علشان جي دخلوا عمي عبدالله بالسالفه ...و اتيمعوا في بيت عمي عبدالله ..."وضحكت مع اني ما اجوف شي يضحك" هههههههههه تدرين ان ابوي في البدايه ما عرف فارس ...يوم دش عليه الميلس ..توقعي كيف استقبله ابوي ..؟؟؟
نوره: فسخ نعاله و كفخه فيه..
خوله:هههههههههه لا ..بالعكس حضنه و يلس يبوسه...
نوره: قولي و الله ما اصدق..
خوله: و الله العظيم ..ما اقص عليج...اعتذر له فارس ...
نوره: انتي منو قالج..
خوله: خليفه كان موجود معاهم ...حتى خليفه يلس يصيح ...اتخيلت الموقف الي صار بيت عمي عبدالله ...لانه اتكرر البارحه يوم يااه يتغدا في بيتنا..كلنا صحنا..اتحسين غير ..ابصراحه افتخر ان عندي اخ مثل فارس ..
نوره: مالت عليه ما عندج سالفه..صج الايام اداوي الجروح بس اكيد محد بينسى الي سواه..
خوله: حرام عليج نوره ..المفروض تستانسين ان فارس رجع لنا ..
نوره: و انا شو يهمني ..لا يقرب لي ولا اقربله ..
خوله: جاسيه..
نوره: الحينه بيعيش في بيتكم جان بيعيش هناك ما بطب حارتكم..
خوله: هههههههه لها الدرجه..لالالا هو مستقر هناك في بوظبي فـ بيت خاله و خالته ع فكره صار عنده شركة سيارااااات اتصدقين فارس جي ..
نوره مصدومه: و الله ما اصدق ..
خوله: ابوي عرض عليه يرجع يعيش هني بس.. ما طااع و قال انه مرتبط فـ بوظبي باشغاله و كل ما بتكون عنده فرص بيي يزورنا ...ابصراحه شي حـلو ...
نوره مقهوره: ما اجوف شي يونس ..
خوله: و ابوي يا ثجل دمج ..
نوره: شكرا ..

شي يقهر العالم كله مستانس الا انا .. احس اني خسرت وايد اشياء .. و سالفه فارس انه رجع لاهله..شي قهرني و بط جبدي..هالحيوان عمور ..اكيد كان بطل في هالشي ..ابصراحه ..حسيت بشعور مؤلم مدري ليش ..بس انا ما عااد يهمني لا فارس ولا نهله ولا غيره ..انا مثل ما قطعت نصيب خوله ..و ابعدت عنها جابر ...لازم اعوضها و ازوجهـا لـ عمور ..
.و قعدتي في البيت..و اني قطعت اهلي ..ترا هاه كله ما منه فايده ..موليه ...قبل كنت ناويه اروح بيت خالتي مريم بس من خبرتني خوله انهم تصالحوا مع فارس غيرت رايي..بس بعد اسبوع ..اتصلت بي خالتي بنفسها..تعزمني ع الغدا انا و عمور.
.و يوم سالتها عن سبب العزومه قالت ان خالي احمد امسوي عزيمه عشان الاهل .. و يباني انكون هناك ...اخرتها وافقت حتى لو ما ابا بس غصبن علي اوافق دام خالتي روحها متصله اتعزمني ترا مب حلوه اردها ..بنفس يوم العزيمه و كان يوم الجمعه ....نشيت من وقت.. بعد ما صليت و قريت سورة البقره ..سرت اسوي لي حليب..جفت عمور منسدح ع الكنبه في الصاله ...

نوره: عمور..
رفع راسه يطالعني: شوه..؟؟
نوره: ع بالي راقد شو اتسوي قاعد هني ليش ما اتروح ترقد فـ حجرتك..
عمور: توني ناش من الرقاد ..اتريا فارس يمر علي..
نوره: هاه فارس ..ردينا ع طير ياللي..
عمور: ليش تكرهينه ..
نوره: كيفي بس..
عمور ابتسم: انا ادري علشان امشبعنج ضرب يوم كنتي صغيره..
رديت بعصبيه : ايهبي الا هو انا الي كنت اكسره و اكسرك وياه..
ابتسم عمور: هي صح ..
نوره: عيل ما قلت لي ان خالي احمد رضا عنه..
عمور: منوه خبرج..؟؟
نوره: السالفه من اسبوع و ما تباني اعرف ..
عمور: اكيد خوله خبرتج ..
نوره: مب مهم ..انت ليش ما قلت لي..
عمور: احيدج ما اتحبين اطريه لج..الحينه ليش تعاتبيني ..
نوره: صدقك انا الغلطانه ..

كنت بسير المطبخ بس تذكرت العزومه اليوم..
نوره: بتروح بيت خالوه مريم بتتغدا هناك..
هز راسه بمعنى هي..
نوره: زين عيل بروح معاك ..."اتطنز"ولا بتاخذ فـارس .
عمور: لا باخذج انتي افا عليج انتي..
حسيت نبرة طنازه طالعه منه بس طنشته ..سرت المطبخ..سويت لي حليب ...بعد ما شربت و خلصت فكرت اخذ له كوب حليب ..قبل ما يظهر من البيت ....طلعت من المطبخ..جفت عمور طالع من الشقه عاد ..
===
وصلنا انا و عمور بيت خالوه مريم ..جفت كذا سياره برع البيت ..عرفت ان شي رياييل معزومين غير اهلنا ..يمكن ربع خالي احمد ...نزلت من سيارته و سرت صوب الفله..اما عمور فدش الميلس ..
دشيت الصاله ..جفت خالوه مريم و ام سيف قاعداات ..
نوره: السلام عليكم..
=عليكم السلام..
خالوه عايشه: هلا و الله زين جفناج حرمة ولدي..
ابتسمت لها و بستها فوق راسها ...
خالوه عايشه: لها الدرجه متلومه مول ما بينتي من هذاك اليوم ...
ام سيف: كلهن جي يوم ينخطبن ..

معقوله !! يعني الي انا سويته كان شي طبيعي لا لا ما اعتقد ما حد يعرف شعوري هذاك الوقت ...
نوره: الا وين خالوه مريم ...؟؟؟
خالوه عايشه: هناك فـ المطبخ اتعابل في الغـدا ...
نوره: زين عيل بروح اساعدها ...
خالوه عايشه: ابرايج يلسي ارتاحي خوله عندها ...
نوره: عيل وين خلود و نهله"سالتها عن نهله بس اجاملها "
خالوه عايشه: هناك في الحجره يالسات ...معاهن رضيه و عزه..
نوره: و الله و شيما هني بعد ...
ام سيف:هههههه هي هني ...
نوره: زين و الله ...بروح اسلم عليهن..اسمحولي عيل...
خالوه عايشه: خذي راحتج يمه..

سرت صوب حجرة خوله..دقيت الباب .. و دشيت..عليهن و هن يضحكن...
سلمت: السلام عليكم ..
الكل: عليكم السلام ...
نوره: اشحالكن "وسلمت ع وحده وحده "
= ابخير ربي يسلمج ...
جفت عيال صغار غير جسوم ..
نوره: هاي العسوله بنت منوه خطيبه جسوم ...؟؟
عزه: هذي بنتي مهره...؟؟
نوره: اممم حلوه .."وشليتها الاعبها "
سمعت نهله اتقولي: صلي ع النبي ..عن تحسدينها..
اتصدقون ما كان لي خلق ارمسها..طالعتها بطرف عيني فسكتت ..زين فهمت ..
خلود: نهلووه نوره امسويه لج رعب ...
نهله: لا و الله تدري اني اسولف معاها ..
طالعت شيما: شحالج حرمة خليفه..
شيما متلومه: ابخير ربي يسلمج...مبروك ع الخطوبه ..
رديت عليها: الله يبارك فيج.عاد نهله صارت حماتي..
خلود: تستاهلين..
نهله: لج الشرف حرمة اخوي ..

يلست اغير الموضوع : يالله جسوم ما يستحي راقد و خطبيته هني ..ولا ربعه موجودين و هو لابسنهم..
خلود:هههههههه ما يستحي طالع ع ابوه ..
شيما: منوه ربعه..
نوره:- عيال رضيه لااه..
رضيه: هي و الله حمدان بعمره و خالد اكبر عنهم بسنه و نص ..
نوره: بروح عند خوله المطبخ ..
خلود: روحي بلحق عقب ..
نوره: ما اظني اتيين ...و انتي مجابله نهله ..
الكل: هههههههههه
طلعت و سرت المطبخ..دشيت
_ السلام عليكم ..
الكل: عليكم السلام..

جفت خليفه داخل المطبخ مع خالوه و خوله..بس الصدمه الي كانت مثل الصفعه ان فارس واقف جريب من خليفه..يا ربي انا شو يابني هني ...
خليفه: شحالج ام لسان ..
حسيت ابربكه : ابخير ..
خوله: اتاخرتي ..
نوره: ترييت عمور ..تراني يايه معاه..
خالوه مريم: خوله يمه وزعي السلطه في الملل .. و عطيها حق اخوانج ياخذونها الميلس ..اتاخرنا ع الرياييل ...
كنت احس نظرات فارس علي او اني كنت اتوهم ما اعرف ..طنشت و عطيته ظهري
اسال خالوه :- تبيني اساعدج في شي خالتي ..
خالوه مريم: ناولي ها الصحن لـ فارس .." وصدت لـ فارس " يمه خذه الميلس

شهقت ..و انا كل ما بغيت اسوي شي خير ..يطلع لي هالسبال بويهي..امريي لله ..شليت الصحن.. و مديت يدي اعطيه ..ما قدرت احط عيني بعيونه ..بس اتعمدت اراويه دبلتي ..يمكن علشان اغايضه ..او اقهره.. ليش هو شو يهمه ..اصلا ..
خالوه مريم: نوره انتي ما قد جفتي فارس ..سلمتي عليه..
نوره: هي سلمت ...
خالوه مريم: غدا رياال و الله اتغير شكله مليون درجه..
انزين انا شو اسوي .. زين بعد هاي الرمسه ما طلعت منها يوم كان فارس موجود ...
نوره: هي وايد تغير ...
يحليلج خالوه ما تدري ان جايفتنه اكثر من مره و هازبتنه لي ما قلت بس ...
خالوه مريم : خليفه شيل السلطه ...

شليت انا صينية الماااي... و طلعت من المطبخ عشان اعطيها لـ خليفه بعد ما يوصل السلطه ...بس فاجاني حميد بويهي..هذي اول مره اجوفه من انخطبت له ...
ابتسم لي: شحالج..العروس
رديت الابتسامه: ابخير .
حميد: خلي عنج "وناولته صينية الماي" ليش ما اتردين ع اتصالاتي..
هزيت جتفي: مدري..
حميد: تتغلين..."طالع ايدي" ايدج حلوه محلتنه الدبله..
نوره: ههههه شكرا ...
حميد: ابا ارمسج فـ موضوع...
لمحت خليفه و فارس ياييين من بعيد ...
نوره: مب وقته حميد ...روح خذ الماي ..
خليفه: اوب اوب ...صوبناا..و الله قلبي كان حااس ...
حميد: طوف طوف ..
خليفه: عمور تعال الحق ع اختك ..عيني عينك...

ضحك حميد ابصوت عالي بس الي لفتني ان فارس كمل طريجه ع المطبخ امطنش الموقف ولا كن اوادم واقفين حذاله...
تنهدت: انا بسير داخل بطرش خلود اتساعد خالتي و خوله..
حميد: زعلتها ترا..
خليفه: نوره زعلتي ..
نوره: من شو ازعل ...؟؟
خليفه: و انا اقول هاي متى حست..
حميد: عن الغلـط ...
خليفه: هههههههههه
نوره: ترا حرمتك داخل لا اتخليني اشيشها عليك..
خليفه: اتسوينها و الله ...
نوره: عيل انطم ولا تتحرش فيني ...

فجاه ركض حميد بصينيه الماي صوب الميلس .. و خليفه ركض صوب المطبخ و انا سرت صوب الصاله يوم سمعنا خالوه مريم اتزاعج علينا: يالله تعالوا المطبخ شو تتريـون ...
دشيت الصاله جفت البنات..ظهرن من حجرة خوله و يلسن مع ام سيف و خالوه عايشه...يلست معاهم بعد ما طلبت من خلود اتروح المطبخ اتساعد خالوه مريم و خوله ...مر الوقت ..حسيت كل شي رجع طبيعي حياتنا ... يمعتنا..سوالفنا..يوم جفت فارس موجود داخل بيت خالي احمد ....

تغدينا و خلصنا ... بس من بعد ما رجعت المطبخ و انا ملاحظ ع نهله ..شحوب وييها ..مع انها كانت قبل غير ...مدري شو بلاها..يمكن يتها الحاله ..كنا انسولف و نضحك .. و يوم تعدل مزاجي حاولت اتحرش فيها علشان اترد علي.. و اغثها برمستي..بس كانت تبتسم و اطنش...الي اكثر لفتني و حيرني ..ان رضيه علاقتها صارت قويه بـ نهله ..شي حلو...
شليت جسوم عن امه لانه كان يصيح وايـد ...شويه ورن موبايل خلود..و كان ريلها ..يقولها تظهر جسوم برع ...عشان ياخذه عنده في الميلس.
خلود: نوره طلعيه برع صدع براسنا..
خالوه عايشه: حرام عليج خلود اتسوين فـ الصبي جي..
خلود: و الله ابوه يباه برع ..انا قاعده اتغدا ...
نوره: خلاص انزين لا تضاربون انا باخذه..كلي انتي هني و عافيه ...ع قلبج ..
خالوه عايشه: فديتها خطيبه ولدي..
خلود: هاه من الحينه بدينا نقارن ..
الكل= هههههههههههه
بس نهله ما ضحكت شي غريب الي يصير !!المهم طلعت من الصاله و معاي جسوم صديت صوب الميلس و جفت فـــــــــــارس يتريـــــــــــــااا برع يبا جسـوم ..

المساهمات : 350 تاريخ التسجيل : 02/08/2007

.:"؛,’.(( الحـلقـــــة الحــاديـــة عــشــر ...)) .:"؛,’

"شفتـــــك شفتك قلبي رجف صبري ضعف...شفتك يالهفت خاطري لوني تغير وانخطف..الكلمه انطقها وترد..حتى الكلام طعمه اختلف...وانا في صمتي اقول الله يا زين الصدف...حالتي يا حالتي عيت الخطوه تطول..خاطري ولهفتي امروني بالوقوف...حاولت اصبر واداري الشوق تحت رمشي..حاولت اصبر واصد عنك انا وامشي...قضيت الوقت في حيره وصمت"

وقفت ابمكاني من جفت فارس ..بس جسوم الطفس يلس يصيح يباه يشيله ...اتجدم منا فارس ..حسيت برجفه يمكن لان الجو كان بارد ..
من غير ما اطالعه : وين محمد ..
بكل دفاشه يير عني جسوم اصلا جسوم بعد عفد له : انا باخذه داخل ..

مسرع جسوم الهيس تعود عليه تراه من صنف الرياييل كلهم نفس الطينه ...طاحت عيني بعيون فارس ..يا الله رموشه جنها رموش حريم كثيفه و طويله ...جفته يبوس جسوم و جسوم يضحك ابصوت عالي ...انا شو موقفني كنت بروح بس سمعته يقلي : شو رايج اسبج و اروغج من البيت مثل ما كنتي اتسوين لي ..في بيتكم ...
صديت له و طالعته باشمئزاز: هذا بيت خالي احمد و خالوه مريم مب بيتك ...
تمنيت افقع عيونه يوم طالعني بنظراته الشيطانيه: خالج احمد يطلع ابوي يعني اللي له لي..
مدري شو الي خلني اتجدم منه و ارفع راسي بعناد: انت مالك مكان هني ..للحين مب مصدقه كيف خالي احمد استقبل حثاله مثلك فـ بيته .. أي دقه يته براسه...

حسيت ان فارس شويه بضربني ..المهم عقيت عليه الرمسه و حسيت بالانتصار.. و علشان ثاني مره يعرف يرمس منوه ...عطيته ظهري و رحت عنه ...و قبل ما ادش الصاله ..جفته دش ويا جسوم الميلس عند الرياييل ..يا الخنزير ...
دشيت داخل الصاله.. و كانوا الحريم مندمجات بالسوالف .بس نهله و رضيه ما كانوا في الصاله ..؟؟؟..سرت و يلست حذال خوله..
خوله: شفيج معصبه..؟؟
نوره: اختج السباله اتقولي اخذ جسوم لـ محمد.. و يوم اطلع اجوف فارس يترياني.
خوله: و زين شو يعني ...؟؟
طالعتها بنظراه رفعت ايدها: خلاص خلاص سوري ...ادري سؤالي غبي ..
نوره: وينها اختج الغبيه خليني اهزبها ...؟؟
خوله: هههههه هناك في الحجره الثانيه مع نهله و رضيه مدري شو عندهم ..؟؟

كنت بقول خوله اني لاحظت ع نهله انها متضايجه ..بس اتصل بي عمور يقولي اذا بروح الحينه لان بيطلع بروح تدريب التجديف ....ما صدقت قلته بروح ...
خالوه مريم :يلسي تو النااس...؟؟؟
نوره: لا سمحيلي عمور اموصلني الحينه بيروح التدريب محد بوصلني و اخاف يتاخر لـ فليل ..
خالوه عايشه: تمي خطيبج بوصلج..
ضحكت متلومه
ام سيف: يحليلها ..استحت البنيه..
خالوه مريم: عيل اسمحيلي يمه تعبتج معاي في المطبخ..
نوره: لا و الله عادي ..لا تعب ولا شياته ...بروح البس عبايتي ..السموحه منكم..

سرت حجرة خوله.. و كانت فاضيه ع بالي خلود و نهله و رضيه هني..انا متاكده ..هذيلا عندهم سر ...
ما عليه يا خبر بفلوس باجر بيكون ببلاش ...لبست عبايتي و تحجبت زين ما زين ... و قبل ما اطلع من الحجرة سمعت صوت مثل الهمس و خفيف...مع صيـاح ..اتجدمت ..مب عارفه اميز منو صاحب الصوت ..اتجدمت شويه شويه..بطلت عيوني متفاجاه يوم جفت ..نهله واقفه بنهايه الممر ..و معطتني ظهرها..كانت ترمس بالموبايل انا كنت شاكه ان هالبنيه اليوم مب طبيعيه فيها شي ...ياني فضول اعرف شو سالفتها خاصه يوم سمعتها اتحرج ...شو السالفه ...؟؟؟..تميت واقفه ابمكاني ...اسمعها ..

نهله بعصبيه : انت ما تفهم ...؟؟ اقولك بعد جم يوم .."ويلست اتصيح" هي..قلتها ..مب موافقه..لا امايه ما تدري ..خلود تقنعني..."ترجع اتصيح" زين شسوي ...؟ساعدني الله يخليك ساعدني عمر ..
ابيييييييييه وقف قلبي ..الحبيبه تشكي لـ عمور ... يعني هي و عمور يرمسون بعض بالتلفون.. و الله قلبي كان حاس..حسيت بغيض ..كنت بطلع و بدوسها ..بجبدها..اتحركت افج كل الباب ..بس صدمتني الكلمتين الي سمعتها منها يوم قالت : انا ما ابا سيف ما اباااااه
هـاه هاي هي السالفه ..و انا اجوف رضيه لاصقه فـ نهله..في رحلة البر .. و الحينه في العزيمه يبونها حق سيف .. و اونها رافضه عشان عمور ...الحمدلله ..اخيرا نهله بتنخطب و بفتك منها الحينه لازم ارمس حميد ...شويه وصكرت نهله الموبايل و يلست تمسح دموعها..اوني طالعه من حجرة خوله..
نوره: اووه نهله شتسوين هني ...؟؟؟
نهله من غير ما اتصد صوبي ما تبا تراويني دموعها: ماشي ...
اتجدمت منها: من شو مضايجه...
واجهتني و مسحت دموعها: ماشي نوره بس ممكن طلب..
لا يكون تباني اساعدها نجوم السما اقرب لج .: ................."من غير رد"
نهله ترجتني: بس طلب واحد..
نوره: شو ..؟
نهله: ساعديني اطلع من بيت خالوه و اروح بيتنا من غير ما حد يحس فيني ..بليز..
نوره: ليش ...؟؟
نهله: بس ما اباهم يجوف جي حالتي ..

رن موبايلي و كان عمور ..تعمدت ارد عليه جدام نهله..
نوره: هلا عمور شوه ...؟؟
عمور بعصبيه : يالله طلعي شو تترين..
نوره: زييييين اعصابك ..
عمور: يالله اترياج..
نوره: اوكى دقايق ..

جفت عذاب بـ عيون نهله.يوم سمعتني اطري عمور ....جي الي يحبون يتعذبون ...؟؟ صكرت عن عمور و طالعتها ..
سالتها: تبين اتروحين بيتكم..
هزت راسها ..
ابتسمت لها: بالاول قولي لي ليش مضايجه و اتصيحين..
نهله ............."ماشي رد"
نوره: ما احب الوحده اتكون جي ضعيفه ...و انا اقدر اعرف شو فيج بس من غير ما اعرف شو السالفه بالضبط..
طالعتني مستغربه همست : شدراج ...؟؟
ضحكت لها: ترا وايد بنات اييون يتشكون من عمور .. و يكون جي حالتهم مثل حزن و عذاب و صياح..
ردت نهله بسرعه: يتشكون من عمور ...؟؟؟
نوره: هي من عمور..ترا عمور مب مخلي بنيه فـ حالها ..يقولهم نفس الرمسه و يوعدهم بالزواج.. و من يعرف انهم انخطبوا يسوي روحه متعذب و من هناك ما يصدق يفتك منهم ...
كنت بضحك بصوت عالي و انا اجوف نهله امبطله عيونها اطالعني مصدومه ..حرجت منها يوم قالت لي ..
نهله: انتي جذابه "و يلست اتصيح"
نوره: جذابه !! ليش انتي بتعرفين عمور اكثر عني انا الي عايشه معاه.. و يوم يتوهق مع الي يغازلهم يطرشهم لي ارمسهم...فـ يا حبيبتي قبل ما يطرشني لج عمور قلت ارمسج...
نهله: انا و عمور ما بينا شيء ...
قاطعتها: الا بينكم اكثر من شي ..و عمور يخبرني بكل شي.. و انا قلت بختصر الطريج عليه..روحي بنصيبج..و لا تترين الوهم..الوحده ما اتييها فرصتها الا مره فـ العمر.. وايد بنات قاعدات فـ البيت ..من غير زواج ...جوفيني مثلا.انا ما اريد اخوج ولا يهمني.
.بس وافقت عليه لان الوحده ما اتيها فرصه الا مره... ولا اتضيعين الفرصه من ايدج...لو عمور يحبج صج..هذيج الساعه رفضي بس عمور يلعب عليج...
نهله: انتي وحده حقوده و جذابه..عمور يحبني من يوم كنت صغيره..
نوره: لو صج يحبج ..ليش خبرني كل شي بينكم و انتي و عمور متفجين محد يعرف الي بينكم.. "وضربتها ع جتفها" و بعدين يا ماما هذا ما يسمونه حب ها حب الطفوله يحبج شرات اخته بس يتسلى...
رن موبايلي مره ثاني ..
نوره: هاه عمور متصل فيني ... انا قلتلج و نصحتج.."ييرت عنها موبايلها و مسحت رقم عمور من موبايلها و انا ارمسها" و الحينه دبري روحج كيف توصلين بيتج.

ورحت عنها..حسيت بعمري جاسيه ...قلبي حديد..عذبتها..مدري كيف صرت جي متوحشه ؟؟؟البنيه تترجاني و انا ازيدها..مدري هالقسوه من وين يايبتنها..المهم بسوي أي شي دام فيه مصلحتي و مصلحة خوله الي طيرت منها جابر ...
طلعت من الصاله.. و سلمت عليهن.. و طلعت.. و عند باب الحوي جفت حميد و فارس يسولفون ...و خليفه قاعد في الحوي ..يسولف فـ الموبايل سرت صوبه: زين هي داخل حق شو ها الحركات و الخساير..
خليفه يبتسم: طوفي طوفي لاخبر عليج "ويقلد صوتي" حميدااااااااااااان
نوره: مسود ويه ..ههههههههههه
و سرت عنه ..طفت فارس و حميد ولا حظت انهم سكتوا يوم صرت جريبه منهم..فتحت باب الحوي عشان اظهر بس تذكرت شي ..
طالعت وراي: حميداااااااان..
طالعني حميد مبتسم : لبيه ..
نوره: اتصل بي اباك فـ موضوع ضروري ..
ما اترييت منه رد لاني صكرت الباب .. و سرت صوب سياره عمور..ركبت السياره..
عمور محرج: سنة ..
رديت ابرود : سنتين..
طالعني ..سكت حسيت به محرج هااااا صح تذكرت ترا حبيبة القلب من شويه متصله تشكى انها بزوجونها..هههههههه وناسه ..كل شي يسير بصالحي يا ويل حالي..بلحظه حسيت ان كل شي خلاص انتهى..بس كل شي انجلب لـ صالحي...حسيت بوناسه عكس عمور الي بداخله ميت قهر و غيض ..
عمور: متى بتملجين..
هااااااا الحبيب يبا يزوجني علشان يلحق يخطب نهله ..يا الدب..بس الكلام الي قلته لـ نهله ما اظني يخليها اتوافق على عمور خلاص ...
نوره: بعدني ..ليش ..؟؟
عمور: انا بقول حميد تملجون بعد اسبوع..
نوره محتجه: لا و الله ..ع كيفك هو.. ما ابا املج الحينه انا و حميد متفجين انت شو لك اترز بويهك ..
عمور صرخ علي: متى يعني بتملجون..
طالعته مستغربه ليش يصرخ علي جي ..انا شو علاقتي ..
عمور: نوره انا بروحي يالله بـ ديني..لا تقهرني و تغايضيني..
نوره بكل براءه: انا شو قلتلك عشان اغايضك..هذي حياتي و انا حره فيها ...؟؟ انا و حميد اتفجنا نملج بالصيف..لان انا باخذ دوره و هو عنده مشاكل في الدوام يبا يحلها..
عمور: زين ها شو علاقته ..؟؟الا هي ملجه مب زواج..؟؟
نوره: ما نبا شي يشغلنا ..انت مب من حقك اتحدد ملجتي ..و انا و حميد متفجين ..

يا رب يقتنع بـ جذبتي و ما يروح يسال حميد و انفضح ...بس حميد مستحيل يفكر يملج الا بعد ما تنخطب نهله او تملج ..عشان اضمن شرطي...فاجاني يوم ضرب السكان بايده بكل قوه ..
عمور: ماشي فايده ماشي ..
نوره : شو فيك محرج..
عمور: انا انا من باجر بخطب نهله ...
فجيت حلجي عشان اقوله ايهبي الا انت بس قاطعني: ولا كلمه انا بخطبها..و بعدين لو نملج سنه ولا سنتين ..مب مهم المهم اتكون لي ..

وصلت الشقه و انا مدري اضحك ولا اصيح..مدري شو قاعد يصير ..مواقف ورااا بعض و كل موقف يجر موقف ...انا لازم ارمس حميد و اذكره بشرطي قبل ما يتقدم عمور باي خطوه ...
يلست ع نار اتريا اتصال حميد..بس يااه وقت المغرب و حميد للحين ما اتصل.. و عمور يدش البيت و يظهر..و كأن الدنيا ضايجه فيه..مب عارف وين يروح ...زين بيبان الشقه ما اتكسرت من كثر ما يفتحها و يصكرها بعصبيه ... ع الساعه 8 سمعت باب الشقه ينفتح بقوه ..هاه اكيد عمور.

.طلعت من حجرتي جفته دش حجرته...دقيت باب حجرته..ازقره ما رد علي الظاهر دش الحمام... يتني ضحكه ..اتخيل حال نهله مثل حال عمور..اونهم متعذبين..هاه الي يسمونه الحب و خرابيطه... فيني رقاااااااد ميته بس ها الغبي ما اتصل للحين ...يلست ع الكنبه ..لمحت موبايل عمور طايح ع الكنبه الثانيه..نقزت..صوبه شيكت ع المكالمات الصادره..جفته متصل لـ نهله اكثر من عشر مرات ...
شيكت ع المكالمات المستلمه..الظاهر نهله ما كانت اترد عليه ...

المساهمات : 350 تاريخ التسجيل : 02/08/2007

فتحت لستت الرسايل ..جفت الوارد.. رساله وحده من نهله فتحتها و انا احس برجفه بداخلي "خلاص انتهى كل شي و مالنا نصيب" ...يلست اترقص ابمكاني من الوناسه..
فتحت الرسايل المرسله جفت اشكثر رسايل امطرشنها عمور ..فتح اول رساله" ردي علي ليش مطنشتني ردي ضروري.." مثل ما توقعت نهله مطنشه عمور الظاهر قامت اتحس و كلامي فادها ...كنت بفتح الرساله الثانيه بس..

سمعت صوت فـ حجرة عمور..صكرت الموبايل.. و فريته مكانه و ركضت صوب المطبخ قبل لا يجوفني عمور ...تميت يالسه فـ المطبخ لـ ما سمعت باب الشقه يتصكر ...خفت من الي سويته..انا صج قاسيه..حطمت وايد قلوب..بس لانهم ما يعرفون مصلحتهم.. انا لازم ازوج خوله لـ عمور.. و نهله خلاص ياها نصيبها..لكن خوله يحليلها منوه بيفكر فيها ....ها الغبي حميد ما اتصل ...سويت لي سندويج لبنه بالزعتر.. و سرت انخمد.. و قبل ما ارقد ..رن موبايلي..
رديت: الو ..
حميد: السلام عليكم..
نقزت من مكاني ع بالي خوله: عليكم السلام..
حميد: راقده شوه ..؟؟
نوره: توني كنت برقد ..اتاخرت من متى اترياك...؟؟
حميد: انشغلت و الله ..اخيرا حسيتي ..ولا و بعد ابروحج قلتي اتصل فيني زين منج..
نوره: هههههههه الا ما جفت عمور ...؟؟؟
حميد: لا و الله جفته فـ التدريب بس ..حتى فارس يدوره
نوره: اها ..
حميد: ليش شو مستوي ..؟؟
نوره استهبل عليه : شوه ...؟؟
حميد: مب انتي قايله اتصل فيني اباك فـ موضوع ضروري ..
نوره: هـي ...عمور يبانا نملج..
حميد مستانس: و انا موافق باي وقت ان شاء الله من باجر..
نوره: ايه شو من باجر انت نسيت شرطي شوه..
حميد: و الله ما نسيته ذليتيني ..
نوره: زين بخبرك شي صار اليوم..
حميد: شوه...؟
نوره: انا سمعت الحريم يرمسون ..ام سيف ..تبا تخطب ولدها حق نهله..
حميد: سيف ريال و النعم فيه ...؟؟؟
نوره: زين يعني لو تقدم لها رسمي بتوافق عليه ...؟
حميد: الريال ما ينعاب يا نوره ...
نوره: زين و لو خطبها عمور بعد ...؟؟
حميد: .................." ماشي رد"
نوره: ليش سكتت..
حميد: شو السالفه نوره ..انا مب فاهم شيء ..؟؟
نوره: ماشي بس انا اسالك لو مثلا عمور خطب نهله و بنفس الوقت خطبها سيف ..؟؟شو بيقولون اهلك لو رديت عمور ..و هو اولى فيها ...؟؟
حميد: خليها علي ..
نوره: تذكر ..اذا عمور صار من نصيب نهله انا و انت مالنا نصيب..
حميد: نفسي اعرف ليش ..ما تبينهم لبـعض...
نوره: لي اسبابي..
حميد: مب من حقي اعرف..؟؟
نوره: امبلى انت من حقك كل شي بس بعد ما انعرس ..
حميد: فديتج و الله نوااري..
نوره: احم احم ..عيب عيب استحى..
حميد: ههههههههههه
نوره: انت بتم جي لوتي..
حميد: الله يسامحج ...؟؟ انتي بعدج جايفتني لوتي ..
نوره: حميدااااااااان
حميد: ابوي ..
نوره: جم وحده اترمسها للحين...؟؟
حميد: اممممممممممم وحده اسمها نوره ..
نوره: هههههههه علينااااااا
حميد: ما اتصدقيني..
نوره: انا لا بس قلبي هيه..
حميد: يهمني قلبج .
نوره: زين حميد باجر علي دوام و انا ابا ارقد..
حميد: زين الساعه تسع تو الناس..
نوره: أي تو الناس انا الحينه سهرانه..
حميد: يا ويلي ..باجر بعلمج السهر.
نوره: زين زين يالله ابا انااااااااااااام
حميد: تصبحين ع خير ..؟؟
نوره: و انت من اهله ...حميداااااااان
حميد: هلا ...
نوره: اذا صار أي شي خبرني..
حميد: اكيد..فيمان الله حبي..
نوره: مع السلامه ...
الحينه برقد و انا مرتاحه و مستانسه..الله ..حلو الواحد يكون مرتاح... و كل شي يباه يتحقق له..حتى لو كان بعد معاناه ...رقدت و انا افكر بانتصاراتي اليوم...من غير ما احس ابعمري .. ...رقدت !!

XXX

في الدوام قلبي ياكلني ابا اعرف شو صار ..بس كل شي مر ابرود ...اتصلت لـ خوله ارمسها..كانت سوالفنا عاديه..بغيت اعرف شي اخبار بس الظاهر للحين ماشي ...قبل ما اصكر عنها عزمتها ع عرس نوف رفيجتي يوم الاربعاء ...فديتها نوف قدمت لي خدمه انسانيه عمري ما راح انساها .. و اليوم خذت اجازتها..عشان زواجها..يا ربي بفتقد انسانه غاليه ع قلبي ...الله يسعدج نوف .بعدين ما بنتجاوف بتروح بوظبي ...يحليلج ..وصلت الشقه .. جفت عمور منسدح ع الكنبه يطالع التلفزيون و باين عليه سرحان ...
نوره: السلام عليكم...؟؟
عمور: عليج السلام..
نوره: تغديت ..؟؟
عمور: ما اشتهي ..
نوره: ليش ..؟؟ يبت معاي صحن عيش يكفينا...بروح اصلي و بعدين نتغدا مع بعض زين..
عمور: اونج من متى انتي جي..
نوره: ما برد عليك بس اجوف حالتك صعبه....

ما رد علي..دشيت حجرتي بدلت ملابسي ..و صليت الظهر...طلعت جفت عمور مب موجود في الصاله ...سرت حجرته ...بعد جفته محد يستهبل هاه ..قلتله اتريا.اونه لها الدرجه معذبه فراق نهله راعيه المشاكل فكه منها ...خطر ع بالي اسوي شي جايد يمكن ينفع اني ابعد نهله موليه عن عمور..سرت المطبخ اتغدا ...شويه و يااه عمور .
نوره: بسم الله من وين طلعت...
عمور: ليش ساحر ...؟؟
نوره: توني كنت ادورك عشان تتغدا ..
عمور: نزلت تحت ارمس فارس ...انتي مسويه له رعب مب رايم يوصل عند عتبة الباب ..
نوره: ههههههههههههه زين طلع فيه احساااس ..
عمور:نوره بسج عن حركات اليهال ..شو تبين فيه ...
نوره: خليه يولي تعال تغدا..
عمور: ما ابا .."شرب ماي و طلع من المطبخ "
لحقته: زعلان عشان نهله ...؟؟
طالعني: و انتي شدراج ...؟؟
هزيت جتفي بكل براءه: البارحه قلت تبا تخطبها.. و بعد البارحه سمعت ام سيف انها تبا تخطب سيف لـ نهله ..
حسيت ملامح عمور تغيرت...حسيت بغبنه يوم جفت حاله جي الله ياخذج نهله عذبتي اخوي ...طنشي و يلس ع الكنبه ...
نوره: انزين يوم تباها ليش ما اتخطبها ..
عمور: خلاص كل شي انتهى ...؟؟
نوره: ليش انخطبت رسمي لـ سيف..
عمور: ما ادري ..بس نهله ما تباني ..
نوره: تسواك هي ...صج ما تستحي ولا اتعرف قدرك قلتلك من البدايه هذي وحده.....
قاطعني: بس نوره فكيني كافي الي فيني ..

اتجدمت منه و يلست ع الارض و هو كان ع الكنبه ...
نوره: ما اتهون علي اجوفك بهذي الحاله ..
عمور: من عيونج ما تبيني اخطب نهله..هذي ها راحت مني..
نوره: خلاص عيوني اتصل بها ..و اتفاهم معاها ..
رد بعصبيه : انتي ما تفهمين اقولج ما اترد عليه افهمي ...
نوره: زين لا اتحرج..ها يزاتي ابا اساعدك بس لانك اخوي و ما اتهون علي اجوفك بها الحاله"وقفت" بس انت مب ويه حد يساعدك انجلع ...
كنت بروح المطبخ اكمل غداي بس زخني من ايدي: خلاص حقج علي يالله شو بتسوين ...؟؟
نوره: بتصل بـ نهله من موبايلي و كلمها ..شو قلت ...؟؟
عمور: علني فداج نوره ..ليش انا ما فكرت جي ...
نوره ابتسمت له: ثواني بروح اييب موبايلي ...
ضحكت فـ داخلي هههههههه مسكين عمور ما يدري اني ابا اعميها له و هو يتحراني ابا اكحلها...اتصلت بـ نهله ..
نوره: ما اترد علي ..
تضايج عمور و قعد ع الكنبه: جفتي الظاهر تبا سيف بن عبدالله ..
نوره: تبا الصراحه احسن. "طالعني عمور" بس انا بساعدك ...
رديت و اتصلت بـ نهله قلت في خاطري هاي الدبه بعد امسويه لها راس صج ما تنعطى ويه ...ردت علي
نوره: السلام عليكم...
نهله: عليكم السلام ..
عفد عمور من مكانه يبا يير عني الموبايل بس انا ما خليته و اشرت له يصبر ..
نوره: شحالج نهله..
نهله: بخير شحالج انتي ..؟؟
نوره: الحمدلله طيبه ..
نهله: غريبه متصله بي ...
نوره: قلتلج البارحه لازم بتصل بج تذكرين ...
نهله : هي الظاهر كلامج صحيح ...

يحليله عمور مب فاهم شي يتحراني ارمسها بموضوع ثاني ما يدري انه اقصد ..قاعد ياشر لي دشي في الموضوع ...
نوره: عشان بس تصدقيني ..المهم مب ها موضوعنا ...
نهله: شو بغيتي نوره..؟؟
عليت ع الصوت ..عشان اسمع نهله شو بتغرد .
نوره: عمور يبا يرمسج..
يير عمور من ايدي الموبايل ..
عمور: الو نهله ...اسمعيني...و الله العظيم انا احبـــ....
نهله صرخت عليه: انت واحد حقير ..و ما تستحي ع ويهك..انا خلاص انخطبت .. وافقت لا تقعد اطرش لي اختك علشان تقنعني مثل غيري ..
عمور: لحظه نه....."طالعني صكرت الخط.."
فديتك عمور بلحظه حسيت اني ابا احضنه اخفف عنه ..هالحيوانه ما تستاهله ..منو تطلع نهله عشان ترمس عمور بهاي الطريقه ...
نوره: عمور ..نهله ما تباك ..؟؟

حسيته مب رايم يتكلم ...اقشعر جسمي يوم جفت عيونه تدمع حط موبايلي ع الطاوله و طلع من الشقه..ابكل برود..شو الي قاعد يستوي..عمور عمري ما اتخيلته ولا توقعته في يوم اجوفه ضعيف.... و جي حالته ..هاي نهله شو تتحرا عمرهااا ...؟؟اخ بعيده عني و الله لو كانت جريبه كنت مسحت فيها الارض ولا هاي الذبابه اتسوي بعمور جي ..

سرت المطبخ اتغدا بس اتصدقون ..انسدت نفسي مدري ليش ...رحت حجرتي و انا اتخيل ملامح عمور يوم صرخت عليه نهله ...هالموقف و هاي الصوره مستحيل في يوم اتغيب عن بالي ...

يوم الاربعاء..يوم زواج نوف..اليوم بجوف صديقتي في الدوام عروس..عقبال ما اجوف خوله عروس لـ عمور ..اتفجت مع خوله انها اتمر علي ..ع الساعه 8 العشاا ...
صرت ما احب المناسبات و العزايم لانها اتخليني اسهر و اتخرب روتين حياتي ...لبست هالمره فستان مع ان الجو كان بارد الا . اني قلت فـ القاعه اكيد بحس بالحر ...اتفاجات ان خالوه مريم يايه معانا العرس ...وصلنا خليفه ...يلسنا ع الطاوله الخاصه ...تعشينا و قعدنا انسولف ..ابصراحه المفاجاه الي قالتها لي خوله في العرس.. و ترا هاي البنيه ما اطلع لي مفاجاتها الا فـ اوقات و اماكن ما اتخليني اعبر فيها ...
خوله: تدرين نوره ...؟؟
نوره: شو مستوي بعد ...؟؟
خوله: نهله انخطبت..
كنت بغص باللقمه الي كانت في حلجي ...شربت ماي ..حسبي الله ع ابليسج يا خوله ..
خالوه مريم: بسم الله الرحمن الرحيم شو فيج يمه..
نوره: هذي بنتج ..
خوله: هههههههههه و انا شدراني انج بتتفاجئن جي ...؟؟
نوره: انزين كملي شو السالفه ...؟؟
خوله: نهله انخطبت
نوره: درينـا بس متى و شو السالفه..
خالوه مريم: انخطبت لـ سيف ولد عم عيالي ..
نوره: و الله مبروك "بصوت واطي" تستاهل غريبه حميد ما قال لي !!
سمعتني خوله فقالت: ليش انتي ترمسين حميد..
دستها ع ريولها من تحت الطاوله لان خالوه مريم سمعتنا صرخت خوله متعوره ..
خالوه مريم: عفانا الله شو فيكم انتوا ...بقوم اغير الطاوله فضيحه انتن..
خوله: طاعي انتي الحينه امايه هي الي تستحي تقعد ويانا ..
نوره:هههههههههههه
خالوه مريم: مب عايبتنج شوه
خوله: لالا محشومه ...

ردت الفرقه اتغنى.. و صار من الصعوبه انا نرمس الا اذا علينا صوتنا عشان نسمع بعض لان الفرقه صوتها وايد عالي ...ساسرت خوله : متى بتملج نهله ...؟؟
خوله: نهايه هالشهر ...؟؟
نوره: الحينه نحن نهايه شهر يناير ..
خوله: يا الغبيه اقصد نهايه شهر فبراير..
نوره اعلي صوتي: مب جنه ابسرعه..
خوله: هي بس قوم عمي مستعييليين...
نوره: عيل متى عرس خليفه و شيما..
خوله ما تسمعني بسبب الفرقه الي شاله القاعه شل: شووووووو
نوره عليت صوتي حسيت ان بلاعيمي طاحت: متى عرررررررررس خلييييييييييفه..
خوله: هييييييييييي شهر اربع بعد نهايته ..
نوره: انتوا كل مناسباتكم نهايه الشهر ...
خوله: حتى انا تطلقت نهايه الشهر..
نوره: هههههههههه ما عليج بتنخطبين نهايه هالشهر ..
ضحكنا: ههههههههه

شويه و نزلت نوف من فوق..و كانت مثل الاميره ...كل شي كان فيها روعه...ويها فستانها مسكتها تسريحتها..كل شي فيها جميل ...ابتسمت يوم جافتني..سرت فوق سلمت عليها ...و باركت لها.. و بنفس الوقت ودعتها..لاني خلاص ما بجوفها مره ثانيه حسيت انها بتصيح بس انا قعدت اضحكها ..ما ابا اتخرب مكياجها و ريلها بعده ما جافها ...سلمت عليها خوله و خالوه مريم و طلعنا برع الصاله بعد ما اتصلت خوله بـ خليفه ...ركبنا السياره بس خالوه مريم تاخرت لانها كانت اترمس وحده من فريجنا جافتها واقفه برع الصاله .....كانت سياره خليفه بس الي داخلها مب خليفه هذا فـارس الشيطان ...يلست اقرص خوله من تحت لـ تحت ...كنت بنزل من السياره بس مسكتني خوله ..
خوله: لا تستهبلين...؟؟
نوره: ليش ما قلتي ان ها بوصلنا ...
فارس: قولي بعد الحثاله...
خوله: و الله انا شدراني اتصلت بـ خليفه ..و تفاجات بـ فارس شو بياكلج...
فارس: هي انا ما اكل اللحوم الي طعمها مر ..
رديت بعصبيه: انت اسكت محد رمسك..و انتي خوله دواج عندي بجوفين شو بسوي فيج..
فتحت باب السياره خوله: تعالي يا الهبله وين رايحه..

نزلت من السياره و انا ميته من الغيض اخر زمن هالحثاله يوصلني البيت...سرت ع الرصيف ادور لي تاكسي بس زختني خالوه مريم من ذراعي: طوفي السياره ابسرعه ...؟؟
عااد هني ما قدرت ارد ع خالوه مريم..صخيت .. و سرت معاها ..ركبت السياره و انا مقهوره.. ...يلست اقرص خوله من تحت لـ تحت ...ما تكلمت ولا كلمه بس خالوه مريم و خوله قاعدين يرمسون عن العرس.. و عرفت ان المعرس رفيج فارس عشان جي حضرته ياي العرس ..

.اخيرا وصلت الشقه نزلت من السياره و من غير ما اسلم عليهم ...ولا اقولهم تصبحون ع خير ..صكرت باب السياره و عفدت فوق صوب شقتي ...أأأأأأأأأأأأأأه اخيرا نهله بتملج يلست احسب باجي اربع اسابيع وايد يالله متى ايي هاليوم ...صج برتاح بس بقعد اعد الايام و الساعات..عشان افتك من نهله.. و افتك من هاي الدبله فسختها و فريتها ع التسريحه.. فكرت اتريا عمور عشان ابشره بـ ملجة نهله..بس ما ابا ازيد عليه عذابه..باجر يصير خير ..رقدت ابسرعه لاني كنت تعبانه ..
.اوني سهرانه كانت الساعه 11 فـ ليل ...

في اليوم الثاني العصر ..رحت بيت خالوه مريم...ابصراحه ما كان ودي علشان ما اجابل فارس..بس الحمدلله ..ولا سياره كانت موجوده عند باب البيت..دشيت..و سرت حجرة خوله..البيت كان فاضي محد موجود ...و انا طالعه من الصاله جفت بويهـي فــــــــــارس ...

المساهمات : 350 تاريخ التسجيل : 02/08/2007

[].،؛"(( الـــحلقـة الثــــانيــــــــة عشــــــــــــر ))"؛:.,.
"مد الخطاوي وعاود يا خلي بساع..في خافقي صار حبك يالزين مطبوع
الحب بيني وبينك مكشوف القناع...يعطي البراهين مابين آهات ودموع"
خفت حسيت ابرجفه يوم جفت فارس داش كان امنزل ويهه و انا كنت اراقبه ..يلس ع الدري يفسخ جوتيه شكله ياي من برع يسوي رياضه..
سمعته يقول : الغاليه خوله ناوليني كلاس ماي ...؟ميت من العطش
الغاليه خوله !! بس انا مب خوله كيف اقوله..كل ها العيون و مانتبه اذا انا خوله ولا نوره...يعني ما يجوفني لابسه عبايه..لا يكون خوله طول الوقت تلبس عبااه في البيت !!!تميت واقفه اطالعه يفسخ جوتيه ..
وقف : شـو بــــ
بس ماتت الكلمات بشفايفه يوم جافني واقفه ابويهه حسيت به ارتبك ..
قعد ينظف ايده من التراب ابصراحه كان شكله مقزز كأنه متسبح بالرمل ..
ينظف ايده: سوري ع بالي خوله ...
صديت الصوب الثاني: وينها خوله محد فـ البيت موجود ..
فارس: انتي اهلج ما علموج اتسلمين..
طالعته: اهلك اهلي ولا رباني ربااك ...
اتجدم مني فرجعت تلقائي : زين يعني اعترفتي ان اهلي"واشر ع نفسه" هم اهلج "واشر ع علي"
رجعت قبل لا يتمادى..كنت ابا اتحرك بس ها الحثاله امصكر الدرب ..
نوره: وخر بطوف ..
فارس يتمصخر: طوف حد ميودنج...
نوره: حضرتك امصكر الدرب .طووف ..
رفع حياته : لها الدرجه انا ضخم ولا ما تخاف لا ادقيني..
حرجت منه شو يعني يستفزني: خـووز
هز راسه بمعنى لا..حركاته ماصخه و انااا مب طايقتنه ...فاجاني يوم جفته ياشر ع دبلتي ...
فارس: هذي ترا مكانها غلط..
رجعت ايدي ورا و صرخت عليه: ما يخـصك ..
استفزتني ضحكته: هههههههههاااااااااي

مدري يوم سمعت رنة ضحكته حسيت اني رجعت الـ 8 سنوات وراا ايام ما كان عايشين فـ بيت خالوه مريم..تذكرت يوم كنا انخطط لـ بعض علشان في النهايه كل واحد ياخذ ضرب من خالوه مريم او خالي احمد ..كرهت هاي الذكرى الي مرت فـ بالي ...لورا و كاني مشمزه منه
فابتسم: لا اتخافين ما بخيسج ..
حسيت انه هو المتحكم بالموقف ..فقررت انسحب
صكيت ع اسناني: خوز عن دربي ..
طالعني بنظرات غريبه: لج معاي حساب طويـــــــــــل يا نوره ..بتدفعين الثمن غالي ..
نوره: هههههههههه اتهددني ..انت !!
فارس: للاسف الشديد انا ما اهدد حريم ولا احط راسي من راسهن..
اتمصخرت عليه: عيل ليش واقف و اتضيع وقت معاي خوز عن طريجي خليني اطوف ...
فارس: قلتلج طوفي ..ولا انتي تبين اتسولفين معاي...
نوره: بعد هالقاصر انا انزل مستواي و اسولف مع الحثاله للاسف خالي احمد ما علمني هالشي..بالعكس حذرني منهم ...و الدليل انه قام يروغ كل من حاول يشوه سمعته حتى لو كان من لحمه و دمه ..
فارس: انتي الي فرقتيني عن اهلي ..
رديت عليه بعصبيه: انت و بحركاتك الوسخه ..و انا قلت الي جفته ..يا محترم..

كان بيرد علي بس انا ما عطيته فرصه..و حسيت برجفه لو تميت ابمكاني بعرف اني ارتجف ..و انا ما اباه يظن اني خايفه منه .
..اتجدمت و طلعت دزيته ابكل قوتي عشان اقدر اطوف..رجع بعيد و سمعت ضحكته استفزتني من الخاطر...حسيت انه قدر يهزني و ها الي موتني غيض..و بدربي مريت ع جوتيه الممزور رمل شليته من الطرف.. صدت جفته دخل الصاله لحقته..التفت لصوته بطل حلجه يوم جافني واقفه عند باب الصاله..فريته بالجوتي بكل قوتي..سمعته يصرخ..مدري صابته او لا..لاني مجرد ما فريته ركضت برع ..بكل سرعتي...سمعت صوته يقول كلام وايد بس مدري شو كان يقول لان دقات قلبي كانت اترن باذوني ..تميت اركض لـ ما دخلت بيت خالوه عايشه صكرت الباب ...و انا اتنفس بصعوبه من كثر ما كنت اركض يالله مدري متى اخر مره ركضت ..
.المهم بردت النار الي شبها في قلبي ..

فتحت عيوني..يوم سمعت صوت حميد:- شو بلاج نوره ..شو فيج اتنافخين.جي..
يوم حسيت اني خلاص صرت بعيده عن فارس غطيت ايدي بويهي و يلست اصيح منهاره ابصوت عالي ما قدرت ايود عمري خلاص فارس ظهر بحياتي من يديد..و انا ها الشي ما اريده ..بيقعد يكتم ع انفاسي كل مره شرات الياثوم...
حميد: نوره هدي شو بلاج ..
حسيت ابعمري هبله... و انا قاعده اصيح و حميد مب عارف شو يسوي ...مسحت دموعي بظهر ايدي...
و انا احاول اتماسك: خوله داخل ...
رد علي: لا بس خلود موجوده و نهله..دشي ارتاحي داخل ..
انا ما صدقت افتك من فارس بعد تباني اجابل اختك نهله..عشان انفجر بعد...
نوره: لا انا بروح بيتي ..
حميد: ليش دخلي الحينه و بعد ما ارجع من التدريب بوصلج ...ابروحي..
عاندته: لا بروح البيت .."رفعت راسي اترجاه" بتوصلني..
حميد: هي اكيد...
سرت صوب سيارتي و كنت ميته من الخوف لا يطلع فارس فجاه و يضربني شرات ما ضربته ..بس زين حميد موجود جريب مني..ركبت سيارتي و شغلتها ابسرعه ..اتحركت بسيارتي و لحقني حميد..حسيت بالامان يوم جفت حميد يلحقني بسيارته..لو عمور كان هني بالعكس بيودني عشان فارس يضربني مثل ما كان يسوي زمااااااااان ..

وصلت البنايه..اتصلت بـ حميد قبل لا انزل ..
حميد: هلا نوره...
نوره: مشكور حميد ...ما اتقصر ..
حميد: ما سويت شي..بس ما بتخبريني شو مضايجنج..
نوره: الحينه لاااه ..بس ما اباك اتخبر حد ..اتمنى الي صار يكون سر من بينا..
حميد: انتي وايد غامضه بس مب مشكله ...سرج فـ بير...
نوره: مشكور حميد انا لولاك ما كنت عارفه شو بسوي ..
حميد: فديتج انتي الغاليه ..
نوره: تسلم لي يالله فيمان الله..
حميد: الله يحفظج مع السلامه..

وصلت الشقه..قررت هذي اخر مره اروح بيت خالوه مريم..و الي يباني اييني فـ بيتي ...سرت اشرب ماي ابرد ع قلبي ..انسدحت ع الكنبه اطالع السقف..مر علي الموقف يوم ضربت فارس بالجوتي ضحكت من الخاطر..ضحكت و انا اتذكر صرخته..و مت من الضحك يوم ركضت و اسمعه يتحرطم بس مدري شو كان يقول...يلست اضحك شرات المينونه...بس سكت يوم تذكرته يقولي ..حسابج طويل و كانه يوعد و يهدد...حسيت ببروده داخل جسمي ...خايفه من الي ياي ..و ليش اخاف دام انا بعيده عن فارس و كل الي اباه يتحقق ...
ما صدقت اذن المغرب رحت صليت و سويت لي عشى خفيف..تعشيت .. و يلست اقرا روايه لي ما اذن العشا..صليت و انخمدت بعد ما لبست زلاغي و كوتي ...اقصد كوت عمور ..

باليوم الثاني يتني خوله الشقه..لاني حلفت لها بالتلفون اني ما مستحل امر عليهم و فارس موجود عندهم في البيت ...
طلعنا انا و خوله رحنا كارفور بعد ما اتفجنا ..ان انسوي غدا ..في الشقه..استانست خوله بتتغدا معاي يا رب يكون عمور موجود..يقول الوصول لـ قلب الرجل عن طريق معدته ..و اذا خوله طبخت عمور بيقعد يتمدح و يسوي شرات هذاك اليوم..المهم فهمتها ان عمور ما بيكون موجود ع الغدا بس اتمنى العكس...انا كنت شرات المرافق..خوله الي كانت تشتري الاغراض ..و اللوزام حق الغدا. جفتها اتشيل دياي ..و خيشه عيش صغيره.. و خضره.. مدري شو بتسوي لنا يمكن غوزي ...؟؟
سالتها: خولوه ها كله يسونه بالغداا.
خوله: هي طبعا..
نوره: وين !!
خوله: هههههههه شو وين انتي ما اتعرفين شي..اتعلمي باجر شو بتطبخين حق حميد...
نوره: هههههه ها اذا تميت خطيبته..

طالعتني بنظرات ان كلامي ما عيبها..بس طنشتها حياتي و انا الي اقررها..
نوره: بس خلصتي ...؟؟
خوله: هي خلصت انتي مب خاطرج شي ...تشتري قبل لا انحاسب ...؟؟
نوره: امبلى بشنترى عصاير ..و حلويات و كاكااو ...
خوله: ياهل شوه..
نوره: هي مستحيل اطلع من كارفو و انا مب مشتريه هالسوالف ...
خوله: يالله زين خلصينا ..

بعد ما دفعنا الحساب..اتفجنا انروح صوب المطاعم نتريق ..كنت الساعه عشر ..شي وقت ع طباخ الغداا..
خوله: نوره لو حد جافنا بجتلونا...؟؟
نوره: ما عليج الصبح اتكون المطاعم فاضيه...
خوله: انتي نسيتي اليوم الجمعه و اجازه ..يعني الكل هني...
اشرت ابيدي مب مهتمه: عادي شو يعني ما سوينا شي جايد..صح اول مره نظهر فيها ارواحنا بس اول مره و اخر مره ..
مرينا ع ميرانا غاليري ...
خوله: تعالي انجوف يمكن شي حلو ينلبس فـ ملجة نهله...
نوره: جوفي انزين انا بترياج ...
خوله: ليش ما بتشترين من هني..
نوره: من قالج بشتري .. اصلا من قالج اني بحضر الملجه..
خوله: ما بتحضرين ليش..انتي خطيبة اخوها و بنت خالتج ..تبين خالوه عايشه تزعل..
نوره: بتزعل شويه و بترضى ..بتحجج باي شي..
خوله: ولا اتازرين عمور اخوج ..؟؟
نوره: عمور !! اصلا عمور مب مهتم بالسالفه ليش حد قالج ان عمور ميت بنهله..؟؟
خوله: لا بس اذكر مره قلتي انه يبا يخطبها ..
نوره: كان يبا يغايضني..عادي عمور عنده اصلا ما يفكر بالزواج...

المساهمات : 350 تاريخ التسجيل : 02/08/2007

الحمدلله ان خوله صدقتني ما فيني ترفض عمور اذا فكر يخطبها بحجه انه كان يبا نهله..احلى شي سووه نهله و عمور ان علاقتهم تمت بالسر محد يعرف غيري انا كشفتهم..و كان هالشي من صالحي ...و صار الي صار و كل واحد اصبح ابطريج...المهم ما بقى شي ع ملجة نهله ...طلعنا من المحل..
خوله: ما عيبني شي الظاهر بروح مع نهله...
نوره: وين ...؟؟
خوله: بتروح دبي ادور لها فستان للملجه..
نوره: ما يحتاي كل هاه...؟؟
خوله: ليش ما يحتاي الملجه بتكون فـ قاعه..
نوره: اونه ..ما عندهم سالفه مدلعين نهلوووه ..ما يدرون شو طينتها..
خوله: حرام عليج..خليها تستانس جم مره بتعرس فـ حياتها ..
نوره: متى بتروح دبي ...؟؟
خوله: مدري امحمد بيوديها.خلود طبعا بتروح و انا بروح معاهم و انتي طبعا اذا تبين ادورين فستان لج...

وصلنا المطاعم و يلسنا ...صوب مكانا المفضل الركن الفرنسي...
نوره: متى بتروحون مره ثانيه عشان تشترون فساتين لـ عرس خليفه ما بقى شي للعرس..
خوله: مره وحده بنششتري..
نوره: نععععععم شو مره اسفه ...لا تشترون فساتين لـ عرس خليفه خلوها مشيه ثانيه عشان بروح معاكم...
خوله: اوكى بنجوف ..و الله محد قالج ما اتتييين..
رديت عليه: لمي ثمج خوله ..
طلبنا كروااسون.. و بيتزا.. و تركش كوفي بس خوله طلبت كابتشينو ...
رفعت راسي يوم سمعت خوله تزقرني: نوره ...
طالعتها من غير ما ارد عليها نبرة صوتها اثرت فيني ...
خوله: جابر امطرش لي شيما بنت عمي عبدالله..
بلعت اللقمه ابصعوبه ردينا ع طاري جابر ما صدقت افتكينا منه ...ما رديت كنت خايفه لا اتقول بعد وافقت عليه...
خوله: يبا يتفاهم معاي ..
رديت بنبرة جديه: كيف يعني يبا يتفاهم معاج...؟
خوله همست: يرمسني بالتلفون..؟؟
نوره: و انتي شو رايج..
خوله: قلت شيما ما ابا منه شي..و طلبت منها انها ما تطري لي اسمه موليه..
استانست: توج حرمه...
خوله: خلاص الي ياني منه وايد..
نوره: زين رفضتي ترمسينه شو يتحرااج..صح انه ابسرعه ياثر عليج علشان طلب يرمسج ما عنده طريقه غيرها..
خوله: بس تعرفين يوم طلب مني ارمسه ها يدل ع انه له علاقات بالتلفون ..و الي اتصلت لي من فتره ما جذبت بشي..

فديت نوف ...حبيبتي هاي الخاينه تزوجت و روحت عني بوظبي الحينه ابروحي هناك في الدوام..اتغشت خوله فجاه...
نوره: شو بلاج...؟؟
خوله: مدري شلت شباب يطالعونا..
نوره: لا يكون جاابر منهم..
خوله: ما ادري تدرين بي عميه ما اجوف من بعيد بس لا اطالعين وراا علشان ما يحسون انا انتبهنا لهم..
نوره: فيني فضول ابا اعرف منوه ...اخاف جابر؟؟
خوله: ابسرعه كلي خلينا انروح ...
نوره: وين نظارتج البسيها ..و جوفي منوه ...
خوله: انتي بعدج..
لحظه فضول صديت لـورا...
شهقت: خوله يا الخبله عمور و اخوانج ...احيدني هديته فـ البيت راقد ..منوه وصله هني..
خوله: حلفي...اخواني ...
نوره: و الله لمحت خليفه..ابيه لا يكون هالحثاله معاهم ..
خوله: حثاله !!!
نوره وقفت ابسرعه: يالله قومي انروح ...
خوله: شفيج نوره مب من ساعه اتقولين عادي..
نوره: انتي ما تدرين انا شو سويت البارحه يوم ييت بيتكم...قومي طوفي...
سمعت صوت من وراي: صباح الخير ...
اتنهدت مرتاحه: خليفه حسبي الله ع ابليسك..
خليفه: وين شارده..
جفت خوله بعدها يالسه ابمكانها فرجعت و يلست و خليفه يلس معانا...
خليفه: شو هـا الزط دوم تعزمونا و الحينه ابروحكم قاعدين تكرفون...
خوله: قل اعوذ برب الفلق..
نوره: و نحن ما انروم نطلع مكان الا لحقتونا..حميد معاكم "بيني و بينكم ابا اعرف فارس هناك اولا "
خليفه"يشيل البيزا و ياكلها" لا محد لا اتخافين...
رديت بطنازه: اخاف !!!
خليفه: لو جفت شيما معاكم كنت سحبتها من كشتها ...بس انتن متعود اجوفكم بها المكان و بهاي الطاوله جنه طاولة طوايفكن..
خوله: ههههههههه و الله هذي اول مره نقعد بهاي الطاوله و انت مب موجود معانا ...
نوره: بعد مره كان حميد معنا تذكرين يوم كنا نشتري فستان علشان ملجته
حط خليفه ويه بـ ويهي: هــــــا لقاءات من ورانا..
ضربته ع جتفه و ضحكنا و قلته: يا السخيف..
خوله: اعطيك بيزات عشان تطلب لك و لربعك الظاهر امفلسين اجوفك صرطت فطورنا كله...
خليفه: لا طالبين لنا بس فطوركم لذيذ...اقول نوره..
نوره: هـلا ؟؟؟؟
خليفه: انتي شو مسويه البارحه بـ فارس تراني كنت موجود في البيت ..
خوله: شو السالفه ..؟؟
نوره: يستاهل
خليفه: هههههههههههههههه و الله يا نوره ليومج كل ما اتذكر صريخ فارس انقع من الضحك ههههههههههههههههههههههههههه
خوله: اسكت فضحتنا الناس قامت تطالعنا ..
ضحكت ع ضحكة خليفه: ههههههههههه
خليفه: ههههههههههههههههههه وين شردتي ..دورناج انا و فارس ما لقيناج...
نوره: ههههههه رحت البيت خليت حميد يوصلني...
خوله: ايه ابا اعرف شو السالفه ..
خليفه: هاه حميد من صغره امسوي روحه بطل و ينقذج تذكرين..
نوره: هي اذكر ايام حلوه..
خليفه: الظاهر هالايام ردت..برجوع فارس بس الي تغير ان كبرنا..
خوله: اوووووووووف شو السالفه ..
نوره: بخبرج و نحن رادين البيت...اقولك خلوف بيتكم ما بدخله الا بعد ما ينجلع ضرس النحس..
خليفه رد راسه لوراا: هههههههههههههههههههههههههههههههههههههههه
خوله: فضحنا جوفي كيف يضحك..
نوره: هههههه خليفه لا تستوي بايخ...
خليفه: تعال فارس اسمع يقولون عنك ضرس النحس...
خوله: عيب خليفه حشم الناس اطالعنا ...
خليفه: هههههههههه و الله نوره اسميج سوالف ..
بلعت ريجي: فارس هني معاكم..
خليفه: قصدج ضرس النحس هههههههههههههههههه هي موجود ...
سمعت صوت عمور من وراي: السلام عليكم...؟؟
الكل : عليكم السلام ...
عمور: شو عندك تضحك فضحتنا ...نوره شو اتسوين هني...
خوله: شحالك عمر..؟؟
عمور: ابخير شحالج انتي..
خوله: الحمدلله طيبه..
نوره: ماشي اتفجنا انا و خوله انسوي اليوم غدا ييني نشري السمان و قلنا بالمره انمر المطاعم نتريق...
خوله: اسمحلنا عاد ما بنضيفك خليفه بلع كل شي موجود..
عمور يبتسم: زين ما بلعكن...
خليفه: عمور ما قالت لك اختك شو البارحه..
عمور: ليش انا اجوفها عشان اتقولي..
نوره: خلوف لا تستوي بايخ اوووووووف يا ثجل دمك...
عمور: يالله روحن البيت شو تتريون ما خلصتن ريوق..
خوله: يالله نوره..
خليفه: مشكورين ع الريوق و ع القعده الحلوه ابصراحه من زمان ما ضحكت ...
نوره : عفوا تعال كل يوم...اقول عمور حاول اتيي تتغدا اليوم انزين..
طالعت خوله جفتها اطالعني بنظرات ...ابتسمت لها..
عمور: زين بجوف جان عندي وقت...يالله تغشي جوفي خوله متغشيه...
نوره: اووه ما احب اتغشى..مب متعوده..يالله خوله انروح ..فيمان الله خليفه
خوله: مع السلاامه
خليفه: مع السلامه..

سرنا صوب سيارتي..
خوله: اول مره اجوف عمور جي جااد شو بلاه..
نوره: يمكن لانه ناش من الرقاد..
خوله: يمكن بس ليش خلنا انروح البيت ...؟؟
نوره: تلقين ها السبال قاله تعال عمور خاتم بصبع فارس
خوله: اونج انتي..يالله خبريني شو السالفه الي مخليه خليفه ينقع جي من الضحك ...

وصلنا الشقه خوله سوت الغدا..و انا كنت قاعده اراقبها..و اسولف لها بالي صار البارحه..ضحكنا ..سرت اصلي الظهر..بعدها لحقتني خوله وقامت اتصلي..و انا كنت قاعده فـ الصاله و مليون فكره ادق فـ راسي كيف اخلي عمور يفكر بـ خوله و يخطبها.
.اقدر افرق و اسوي لكن صعب اجمع بين قلبين..صعب اني اتدخل في مشاعرهم ..خوله يمكن عندها عادي ..بس اليوم عمور حتى انه ما فكر يسلم بـ خوله لولا خوله هي الي بدت...ليش طنشها !!! يمكن اعتزل الحريم بعد ست الحسن و الدلال نهله ...يت خوله ..و قعدت مجابلتني...
خوله: نوره ..لي متى...؟؟
طالعتها: شوه ...؟؟
خوله: اتعاملين فارس جي..
نوره: هالحقير ما رجع حياتنا الا هالاشهر..خليه يولي سود ويوهنا..
خوله: زين السالفه مرت عليها سنين...و كلنا نسينا الا انتي شايله بـ قلبج..
نوره: البارحه هددني اونه بدفع الثمن لاني انا الي فرقته عنكم..
خوله: و انتي شو يخصج
نوره: مدري ..بس عشان تفهمين انه يبادلني نفس المشاعر ...
خوله: يمكن لانج انتي هذاك اليوم خبرتي عليه ابوي..
نوره: انا قلت الي جفته ..ما غلطت ابشيء...
خوله: الله يهديكم..
نوره: هو خلاص بتم هني كل ما اروح فريجكم لازم اجوفه يعني ...؟؟
خوله: لااااااااا وين..ما ايينا الا نهايه الاسبوع ..اقولج عنده اشغاله هناك..
نوره: زين عيل نهايه الاسبوع ما بطب فريجكم ابصراحه هالانسان امسوي لي رعب...
خوله: زين يكون احسن عشان ما اتصير مشاكل من بينكم ...
نوره : احسن بعد..بتصل بـ عمور بجوفه جان بيي يتغدا...
خوله: بروح المطبخ بشيك ع المجبوس...
نوره: روحي الشيف خوله..
خوله: هههههههه
نوره: هلا عمور ...
عمور: هلا نوره شو ..؟؟
نوره: شو شو.......؟ شو ها الدفاشه ...؟؟
عمور: عندي شباب بغيتي شي..؟؟
نوره: ما بتيي تتغدا..
عمور: لاااا
نوره: قول و الله انت بس..
عمور: نوره انا مشغول.
نوره: خلاص عيل بخلي لك غدا..
عمور: ما اشتهي ..انا ما برجع البيت الا بعد التدريب..
نوره: مب كيفك..
عمور: اوووووووه شو براسج انتي
قهرتني جملته: ماشي بس انت ما تنعطى ويه.."وصكرت التلفون ابوييه"
طلعت خوله من الطبخ: بلاج...؟؟
نوره: ماشي يالله نتغدا..
خوله: اخوج ما بيي
نوره: يولي..

دشينا المطبخ و تغدينا..عقبها سرنا اطالع تلفزيون..و قعدنا نشرب شاي ..و انسولف بمواضيع كثيره..كانت خوله تقنعني اروح معاهم دبي بس انا موليه ما رضيت..اتولي نهله هالقاصر اروح ملجة نهله ...قبل اذان المغرب بشويه روحت خوله..محمد و خلود مروا عليها...
استانست بوجودها..صدق هاي الانسانه تملي علي حياتي ...لو لاها مدري شو صار فيني..يا رب اتصير من نصيب عمور اخوي ...
بعد ما صليت المغرب..ما كان لي نفس اكل..فيلست اقرا مجله كانت موجوده ع الطاوله يلست اتصفحهااا بها الحزه دش عمور : السلام عليكم..
طنشته
عمور: السلام لله..
رديت من غير نفس: عليك السلام...
عمور: زين ممكن اتسخنين لي العيش لي ما اسبح..
طالعته و رمسته من طرف خشمي: ماشي عيش خلص و الباجي طرشته بيت خالوه مريم ..
عمور: زين بعد ما كان لي نفس بس كنت ابا ارراضيج..

دش حجرته من غير ما يسمع ردي..ما تستحي ع ويهك ..قليل الادب..امصدق روحه ايحب امسوي روحه قيس بن الملوح ..رن موبايله..عفدت من مكاني اجوف منوه المتصل جفت اسم " طارق" رجعت ابمكاني..يوم سمعت باب حجرته ينفتح..شل موبايله و رد علي رفيجه بعد ما دش حجرته ..ياني شعور اني اغيضه ..اترييته يظهر من حجرته...جفته كاشخ ع الاخر مب بالعاده !!
نوره: شو هالكشخه..؟؟
عمور: و الله كاشخ ..حليو
هزيت راسي : عسل ...وين بتروح..
عمور: بروح دبي مع الشباب..
نوره: حتى انا بروح دبي بعد جم يوم...؟؟
عمور: شتسوين ..و مع منوه بتروحين..؟؟
اتنهدت اغايضه: مع قوم خالوه بنشتري فساتين عشان ملجة و نطقت اسم نهله بكل رقه" نهله..
اونه طنش: زين روحي." بصوت واطي".متى بتملج ...؟؟
نوره: ما ادري متى بالضبط بس جريب وايد...
عمور: باركي لها..

و طلع من الشقه..ضحكت ابصوت عالي ...غايضته يستاهل خليه يتادب..بس شي يقهر من زينها هاي الي اسمها نهله عشان تجلب حاله و حياته جي ..و الله مدري شو جايف فيها ...
خطفت علينا الايام شرات البرق ...كل شي مر ابسرعه ..بس بيني و بينكم انا الوحيده كنت احس ان الايام اتمر ببطيء وايد و كانت ممله...
ما قمت اروح فريج بيت خالوه الا نادرا بس عشان كنت اخاف لا اتصادف مع فارس..اتفاجات يوم اتصلت بي خوله اتقولي اليوم الصبح ملجت نهله..مع اني كنت احسب الايام..الا ان نسيت سالفتها...حسيت برعشه..ملجت نهله يعني حميد و الكل بفكر فـ ملجتي ع حميد..مب مهم اليوم الدنيا مب شايلتني..اخيرا نهله صارت في ذمة ريال مب عمور..زين سيف يناسبها..انا احس جي...رن موبايلي يقطع حبل افكاري..
نوره: السلام عليكم...؟؟
خالوه عايشه: عليج السلام حالج بنتي.
رديت مصدومه: الحمدلله ابخير اشحالج انتي...؟؟
خالوه عايشه: الحمدلله بخير شوبلاه صوتج..
نوره: كح كح تعبانه شويه..
خالوه عايشه: سمعت ما بتين حفلتنا الليله صج هاي الرمسه..
نوره: كح كح كح كيف اقدر ايي كح كح و انا ميته من الكحه..
حسيت فـ خوف بنبرة صوتهاا: ليش ما اتروحين الطبيب ..
نوره: ما احب الدواء و اخاف من الابر كح كح كح
خالوه عايشه: سوي لج زعتر زين للصدر..
نوره: ان شاء الله كح كح كح كح
خالوه عايشه: ماجوره ان شاء الله ...معذوره عيل ما بنلومج
نوره: سامحيني خالوه كان ودي احضر ملجة اختي نهله بس تعبانه كح كح كح
خالوه عايشه: ما عليه سمي بالرحمن و ارقدي..
نوره: ان شاء الله سلمي ع نهله و باركي لها..
خالوه عايشه: يبلغ يمه فيمان الله..
نوره: كح كح مع السلامه

ههههههههههههههههههههههه نقعت من الضحك بعد ما صكرت خالوه عايشه و الله انفع اكون ممثله..يصلح لي ..يحليلج خالوه عايشه علني فداج..ما ودي اجذب عليج بس بنتج ما اطيقها...سرت ارقد بس ما ياني رقاد خاطري اجوف عمور شو حالته ..خليت باب حجرتي مفتوح علشان انش ع صوت باب الشقه يوم بنفتح..يمكن اجوف عمور.. رقدت ..وعيت ع اذان الفير..قمت ابسرعه صوب حجرة عمور جفته ما ياااااه هاه وين رااح...صليت الفير و قرأة القران ..ع الساعه ست..نورت الدنياا ..

.لبست زلاغي و الكوت الاخضر.. يلست اتجلب ع الشبريه ..افكر بـ عمور وين راح...ها اكيد تخبل ..معقوله يسوي بروحه شي ..مثلا ينتحر !! لالا مب لها الدرجه ..عمور انسان مؤمن ..و راضي بكتبة ربه...يالله لها الدرجه انا شريره حطمت قلوب..و انا شو يخصني ها كله قسمه و نصيب...انا مالي دخل...نشيت يوم سمعت صوت الباب ينفتح..عفدت صوب الصاله..
جفت عمور: عمور .....؟؟
التفت صوبي..حسيت بهزه بكل جسمي يا ليتني مت قبل لا اجوف حاله عمور جي جنه انسان ضايع ..الله ياخذج يا نهله...اتجدمت منه حسيت اني بصيح ...

نوره: كنت احاتيك....؟؟
عمور: ليش اول مره اتاخر..
نوره: ليش جي حالتك..
مسح ع ايده و شعره: تعبان مب راقد ابا ارقد...اموااصل من البارحه...
نوره: خليني اسوي لك شي تاكله
طافني و راح حجرته : ما ابا شي ..
لحقته ..يودته من ذراعه..حسيت بالدموع تتيمع فـ عيوني ..
عمور مستغرب: شو بلاج ..؟؟
نوره: لا اتسوي ابروحك جي ما في شي بالدنيا يستاهل ...
ابتسم بس كانت ابتسامته باهته : ما فيني شي..
صرخت عليه و انا اصيح: انت اتقص ع روحك و الا علي ..
مسك ايدي الي كانت ع ذراعه و نزلها طالعني بنظرات مبهمه ما عرفت شو يقصد و سار حجرته..بس انا لحقته ...ما خليته ..كنت اترياه من البارحه علشان اشمت فيه..بس يوم جفت حالته جي ما هان عليه ...انا لو ادري جي بيصير له و الله ما فرقت من بينهم ...
عمور بصوت ميهود: ظهري خليني ارقد...
نوره: بالاول اوعدني انك ...
قاطعني: نوره مب فايج لج..خليني بحالي شو تبين فيني ...
مسحت دموعي بظهر ايدي: ابيع دنيا كلها علشانك..عمور انت الوحيد الي بقى لي في الدنيا..لا اتسوي بروحك جي ..لا اتخليني ..حرام عليك..كافي ابوي الي هدني "ويلست ع الارض منهاره اصيح.."
اتجدم مني عمور و حضني و قعد يمسح ع راسي ..
كملت كلامي : اتسوي احساااب لكل البشر الا انا ..ليييييييش ...؟؟
عمور همس: لا اتقولين جي..انتي اختي الوحيده ..حتى انت الوحيده الي بقت لي بها الدنيا ...
رديت عليه بنبره اترجاه: عيل لا اتسوي ابروحك جي..الله يخليك
عمور: غصبن علي نوره ..انسانه حبيتها من صغري و كبرت و كبر حبها فـ قلبي ..فـ لحظه اتصير من نصيب غيري شو تبغيني اسوي ...

كنت احس قلبي يتقطع ابكل كلمه ينطقها عمور...انا حطمت حبه الي انولد و كبر من الايام..انا بانانيتي..ما تخيلت هالكثر عمور متولع بـ نهله..ما اتصورت هالكثر عمور يموت بـ نهله..و الله عمري ما اتوقعت ان بتصير جي حالة عمور بزواج نهله من سيف...فديت عمور..حسيت بـ شعور اول مره احس به شعور النـدم...حتى ها الشعور ما حسيت به يوم خوله يتني هذاك اليوم منهاره يوم اكتشفت ان جاابر يقص عليها..يا رب سامحني ..
رفعت راسي ارمس عمور: سامحني.. كل مني انا السبب "ورجعت اصيح"
باسني ع راسي : انتي ما يخصج .. يالله قومي ارقدي فـ حجرتج ارتاحي و خليني انا بعد ارقد ولا ما اهون عليج...
هزيت راسي بمعنى نعم و انا ابتسم له.بالغصب.
نوره: حاسب ع نفسك..
عمور : ان شاء الله ...
وقفت عند باب حجرتي اراقبه لي ما دش حجرته و صكر عليه الباب ...رجعت شبريتي و يلست اصيح منهاره..و شي غريب اني رجعتت ورقدت وبها الوقت

المساهمات : 350 تاريخ التسجيل : 02/08/2007

.,:؛" (( الحلــــــقة الثـــــالثــــة عشـــــــر )).":.؟؛،,..0

ما كنت ابا اطلع معاهم الرحله بس عمور ترجاني و ما بغيت ارده.. طلعنا بـ4 مراكب..مركب فيه خالي احمد..و خالوه مريم و خالوه عايشه و انا و خوله و خلود و نهله و محمد.. و المركب الثاني خالي عبدالله و معاهم ام سيف و سيف و شيما و عزه و بنتها مهره..اما ريل عزه فكان راكب المركب الثالث و معاه خليفه و حميد و محملين معاهم الاغراض ....

و المركب الرابع فيه فارس و عمور فيه باجي الاغراض و شنطتنا تمينا فـ البحر خمس ساعات كنا طالعين وقت الفير مره..كان الشمس روعه و هي تشرق صج من قال عنها شرات العروس و خيوطها جنها طرحتها ...خمس ساعات قضينها بالبحر ..كانت من اروع الاوقات الي عشتها ...
حسيت كلنا محتاجين هالتغيير .. و مدري أي دقه خبال طلعت في خالي احمد و خالي عبدالله ..
.نطلع رحله ع جزيره قشم الايرانيه و سوينا حسابنا انتـم فيها اسبوع...ضحكنا و سولفنا..حسيت نهله اتغيرت.. بس ما اقدر اقولكم تغير سلبي و لا ايجابي..
المهم لا حظت عليها وايد تسولف عن سيف.. جنها هي اول وحده تملج..
المهم الظاهر ما كان حبها لـ عمور لهاك الزود لانها امبين عليها ابسرعه نسته ..من طريقة كلامها عن ريلها سيف..طالعت دبلتي هاي لازم افسخها و جريب ..

.كنا انسولف و نضحك.. و فـ البدايه كنت احس برهبه و خوف من الفكره و اني اتم فـ البحر خمس ساعات بس بعدين..اتعودت ع الجو.. و زين ان يبنا معانا كاميرات فيديـو .. اكيد ها الاسبوع بيكون تاريخي و حافل فيـ حياتتا ..سكتنا يوم خالي احمد و خالي عبدالله و ريل عزه قاموا ينهمون و يغنون اغاني زمان اول...
ساسرت عزه: ريلج كم عمره...؟؟
عزه: ههههههه 27
نوره: يعني ابعمر حميد..
عزه: تقريبا ليش ..؟؟
نوره: اجوفه قاعد يغني مع الشواب .. طاعي الباجين شرات البقر الي جايفين حريجه..
ضحكت عزه ابصوت عالي ...ضحكت معاها ...
خوله: شو اتقولون ...؟؟
نوره: ما يخصج اسرار..
خوله: اعرفها اسرارج اتحشين بـ فلان و علان .. و عزه مره ع الدقه تنقع من الضحك...

للحظه الكل سكت..مب سالفه انا حسينا بالملل لا..المكان الي نحن فيه مستحيل الواحد يحس بالملل..الطبيعه وايد روعه...بس يمكن كل واحد يتامل و يسرح و فـ عالمه ..وصلنا الجزيره.و قارب خالي احمد كان اول الواصلين .....وقفوا حذالنا كذا قارب..الظاهر قفر السواحل التابعين لـ ايران..حسيت بالخوف..من شكلهم و لبسهم..
سمعت خالوه مريم: يخوفي ما انرد دارنا..

يتني ضحكه...بس خالي احمد طلع ورقة لترخيص.. ما قدرنا نتحرك ..لـ ما وصلوا باجي المراكب..فتشوا كل المراكب.. و خذوه ورقة الترخيص الي تسمح لنا انا اندش الجزيره..الحمدلله هاي لحظات كلنا حطينا ايدنا ع قلوبنا ...قمنا نحن الحيم انزل الاغراض و الشنط.. الشبااب قاموا يربطون المراكب ابمكانهااا انا سرت صوب المركب الي فيه ريل عزه و خليفه و حميد.. و تم حميد يناولني السامان.. و معاي خوله و خالوه مريم.. و الباجي روحوا صوب المركب الي فيه حميد و فارس ...
بعد ما خلصنا..سرنا داخل الشاليهات ...انترتب الاغراض ..خالي احمد و عبدالله انشغلوا...بالخيمه الي كانوا يسونها ع السيف ..علشان يلستهم و يراقبون المراكب..

طالعت حولي اتوقعت اجوف الجزيره ممزروه زراعه..بس كل شي جريب منا كله صخور و رمل...شي يخوف..فتره اسبوع اتخوف ...بس دام خالي احمد و عبدالله موجودين عندنا ان شاء الله كل شي امان ..
سمعت حميد: ليش واقفه ابروحج هني..
طالعته: اتامل البحر و الجزيره توقعتها غير ...
حميد: شو رايج انيي هني شهر العسل..
ضحكت: هههههههه مينونه ..انا الحينه مب حاسه بالامان...؟؟
حميد: انا جريب منج بتكونين ابخير..
ردت عليه اتمصخر: اتمنى ..
سمعت صوت محمد يزقر حميد: روح يبونك..
حميد: تعالي لا اتمين ابروحج هني...
نوره: محد بياكلني..
حميد: تعالي نوره سمعي الرمسه..

رحت معاه ...ابتسم لي وراح صوب الشباب ..الي قاعدين يعابلون بخيوط الصيد اونهم عاد بيصيدون وشلكم فـ البحر و اهواله ...
خوله: نوره تعالي معانا اندور حطب علشان النار ...
ركضت صوبها..
خالي احمد: لا اتروحون بعيد خلكم جريب منا ... فهد "ريل عزه" اتحمل فيهم..
فهد: ما يهمك..
طلعنا فوق انا و خوله و نهله و عزه و ريلها...اما خلود تمت هي و شيما مع اليهال ...ركبنا فوق الصخور..
عزه: وين هني مستحيل انلاقي حطب..
فهد: امبلى داخل شي ..بتتفاجاون يوم بنوصل فوق اخر الصخر..
وصل فهد ويير وساعد عزه ووصلت انا و ساعدت نهله و خوله.. انصدمنا..عالم ثاني ..طالعنا تحت يعني نحن يالسن ع الشاطيء... و هني باجي الجزيره بس ابصراحه جنان..
خوله: خساره ما يبنا الكاميرا ...
هني كله اشجار صغيره و كبيره ...
عزه: فهد ماشي ناس هني ساكنين...؟؟
فهد: امبلى شي بس نحن بطرف الجزيره و من ورا... و لو سرنا داخل بتجوفون بيوت و سكان ومحلات كل شي ...
نهله: ليش ما نسكن هني..
عزه: خلاص خبري سيف يسكنج هني..
خوله: ابصراحه رهيب المكان..

انا ما علقت علي شي لان روعه المنظر شل كل عقلي و تفكيري ...يمعنا اشكثر حطب .. و شي حطب كان فهد يرده لانه ما يصلح لنار او اونه صعب يشب بـ بالنار ...يمعنا حطب اشكثر يكفي لايام...
نوره: كيف بنوصل كل ها الحطب ع السييف؟؟
عزه: صج كل ها نحن بنشيله..
قام فهد و رتب الحطب .و ساعدناه.. و ربطه بالحبل .. و سوا تقريبا خمس حزم ...
فهد: وحده اتروح تزقر الشباب اييوون يساعدونا..
خوله: انا بزقرهم بس مشغولين في الصيد..
نوره: يا حافظ..الا يسمعج يقولون بييبون هواااااامير ...
ضحكنا: هههههههههههههه
سارت خوله يلست اتزاعج..: تعالوا شيلو الحطب ...تعالوا...
فهد شل حزمه: تعالوا نرجع ..خلي الباجي الشباب بيشلونه ..
رجعنا مكان ما يينا.. و نزلنا من الصخور..المتيمعه... و ما شاء الله عليه فهد نزل بسهوله و بيده حزمة حطب اشكثر .. خليفه و سيف و فارس يوو علشان يشيلون الحطب..
خليفه: وين انلاقيه..؟؟
فهد: بتجوفه ع طول ..

ردينا ع السيف..سوينا نحن البنات برزة و يلسنا عليها..طبخنا الغدا.. و شوينا كذاا سمجه صادوها الشباب ...راقبت عمور حسيت نفسيه وايد صارت اوكى ...ارتحت من داخلي ..بعد ما تغدينا قمنا نتمشي.. و نستكشف المكان بس خالي احمد ما كان يخلينا نبتعد وايد.. وقت المغرب ..حسينا فـ البدايه بالخوف من الظلمه ..مع ان النار كانت اتشب ...شويه و توزعنا نحن الحريم في الشاليهات و رقدنا و الشباب تموا سهرانين يسولفون و يضحكون .. مر يومين ..و نحن مب حاسين بعمرنا كناا في قمة الوناسه.. و الضحك..

كانوا الشباب ابروحهم و البنات ابروحهن و هالشي الي كان مريحني..احيانا اتصير تعليقات يوم خليفه يسولف مع شيما.. و حميد يسولف معاي ...و نهله مع سيف ..كنت اراقب عمور يوم اتصير التعليقات ع سيف و نهله.. ما كنت اقدر اجوف او اقرا ملامحه كانت شبه غامضه..
المهم كنت احس انه مرتاح...

المساهمات : 350 تاريخ التسجيل : 02/08/2007

فتره ما كنا بالجزيره كنت احاول اجرب خوله و عمور ...بس كل واحد يحمل مشاعر لطرف الثاني مشاعر الاخوه و هالشي اللي كان يغيضني شويه ...
في ثالث يوم..نشينا الفير ع صوت اذان خالي عبدالله ...اتييدنا بماي البحر و صلينا.. و كالعاده سيف كان الامام..الي صلى بالرياييل..الكل رجع يرقد الا انا كنت اطالع الشمس يوم تشرق..سبحانك ربي ما اعظمك..؟؟!!منظر رهيب...قمت و اتمشى صوب البحر ابتعدت ع الشاليهات..خذت معاي الكاميرا..كنت ابا اصور الشمس و هي تشرق.

.ما كنت ابا اطول فـ التصوير عشان البطاريه ما اتفضي..بس لفتني صوت فـ البحر اتروعت و قفت ابعيد..الظاهر سمجه عوده جريبه من السيف.
.ضغطت ع الدجمة التصوير و يلست اصور اراقب حركات المـااي الي يتناثر في الهوى من حركة السمجه..شويه شويه اتجدمت مني.اتروعت..فكرت اصرخ بس الكل رقود..بعدين بحصل الهزبه و الضرابه ..
.تميت ارجع لورا و انا اصور ..شهقت..هاي مب سمجه ..جدمت عدسه التصوير ذراع بشر !! حوريه بحر !! امبلى حوريه..يعني الحوريه صج بالواقع مب بالخيال.
.بس ذراعها اسمر..انا سمعت ان الحوريه اتكون جميله و بيضه.من بياضها جنها نور .رجعت لورا متروعه و انا اجوف هالمخلوق الغريب يتجدم مني.
.حسيت بخوف طحت..ع الارض .. حسيت بيغمي علي..حطت ايدي ع حلجي و انا اجوف هالحيوان الي ظهر من البحر و ياي صوبي ...بالبدايه كنت اظنها سمجه و بعدين حوريه بحر...
حسيت اني ابا اصرخ بس كنت مخنوقه.. كانت الكاميرا بعيده عني طاحت مني يوم طحت ع الارض..شليت حصى جريب مني كنت بفره علشان احمي نفسي..
فارس: يا ويلج .الجوتي و سكت عنج ...؟؟
تميت يالسه ابمكاني امبطله عيوني ها شبح ولا انس ..
سمعته يضحك: ههههههههه و الله انا فارس مب جني.

انتبهت لـ نفسي و لـ حالتي و لـ فارس الي كان لابس بنطلون من غير فانيله اتلومت ... فوقفت ابمكاني انفض ايدي من الرمل ... سرت صوب الكاميرا و شلتها ..
فارس: شتسوين بها الوقت ...؟؟
نوره: انت الي شو اتسوي..انا من يومين اراقب الشمس يوم تشرق..و بعدين انتوا هناك مكانكم شو اتسوي ياي صوب الحريم...؟؟
ابتسم: اونج اتراقبين الشمس يوم تشرق ..ما اتناسبج الرومانسيه موليه و الله العظيم..
طالعته باحتقار و صديت عنه
سمعته يقول: كنت اسبح هناك..بس جفت وحده خبله واقفه هني "و اشر ع مكان كنت واقفه اصور" و قاعده اتصور ع بالي جنيه ولا ساحره فاتجدمت اجوف شو هالمخلوق و طلعتي انتي هههههههههههههههههههه
رديت عليه بعصبيه : ما يضحك ...
فارس: امبلى يضحك بس انتي شرات الدراام وارمه يبالج ابره اتفجرج يا ثجيله الدم.
طالعت : انا شرات الدرام يا...........
بس ركض صوب البحر يسبح... ها الانسان من شو مخلوق الدنيا برد..ما يحس ..وين يحس شرات الحيوان بس الحيوان يحس !!! متفيج يسبح ولا بها الوقت..جفته يبتعد...و سبح ناحيه المراكب...رديت الشاليه حطيت الكاميرا ابمكانها و انخمدت ...فتحت عيوني ع حشره جسوم و صياحه تذكرت السوري ..ابتسمت شكل اليوم حـلو..نشيت ..طاحت عيوني ع شنطة الكاميرا..تذكرت الموقف الي صار الفير !! كنت احلم ...؟؟ شكيت اذا كان حلم او واقع..طلعت بعد ما اتغسلت.. جفتهم يالسين يتريقون يلست اتريق معاهم ...نشن الحريم يسون الغدا...و نحن البنات تمشينا ...لمحت عمور يالس ابروحه ع صخره يعدل خيوط الصيد رحت صوبه..
جافني ابتسمت له : ليش قاعد ابروحك ...؟؟
عمور: اعبل بالخيوط..ليش ودرتي رباعتج ...؟؟
يلست حذاله: جفتك ابروحك قلت ايي اسولف معاك...ما تنجاف ...
عمور: هههههههه لازم عندج هالبنات وين بتذكرين اخوج الوحيد..
نوره: علني فداك..
عمور: ياه ياه نوره تتفداني زين ابوي فادتج الرحله اتغيرتي 80 درجه..
نوره: لا تستهبل بس تصدق احس الكل تبدل يمكن جو الرحله مؤثر..
عمور : وايـــــــــد..
نوره: عمور خذني هناك ابا اروح بعيد...؟؟
عمور: روحي بروحج..
نوره: خالي احمد يراقبنا ..انت لو خذتني ما بيقول شي دخيلك ابا اجوف الجزيره من هاك الصوب...
عمور: صبري خليني اخلص الي بايدي...
نوره: متى بتخلص بعدين بنتغدا..
عمور: زين بعد الغدا..
نوره: اتقص علي بتروح عند الشباب ...
فر الخيوط: امري لله يالله طوفي ..
رديت مستانسه :- فديتك و الله "زقرت خوله" تعالي خوله تعالي ..
عمور: لازم ..؟؟
نوره: عيل هي بعد خاطرها اتروح هاك الصوب ...
عمور اتجدم : يالله زين...
نوره: تعالي اركضي ..
خوله: شوه .
زخيت ايدها :- تعالي عمور بياخذنا هناك...امشي ..
خوله: ابوي بيحشرني..
نوره: لا اتخافين عمور معانا ما بيقول شي..
عمور: بتييون ولا اقعد اعابل بخيوط الصيد...
نوره: يالله يالله ..
تمشينا انا و خوله و كنا مستانسات.. و عمور كان يمشي معانا بس شويه كان بعيد عنا...سرنا ع الطرف..ركبنا الصخور..ساعدني عمور..لي ما وصلت اخر الصخره و بدوري ساعدت خوله...كان شكل البحر رهيب من ابعيد ...الامواج تضرب بالصخور ردت خوله لوراء..
ضحكت عليها: هههههههههه خفتي ...
خوله: هي شكله المنظر يخوف ..
نوره: بس حلو..وايد..انتي خوافه..
خوله: شسوي..؟؟؟
مسكت حصى و اتفتت ابيدي بسهوله : جوفي خوله الحصى بسرعه يتفتت..
خوله: ابيه اخاف انطيح ..نوره جوفي ها الحفره الموجوده هني ..
نوره : هي شكلها يخوف..عمور شي حفره ..
طالعت عمور جفته سرحان و كأنه كان بعالم ثاني يتأمل البحر ..
زقرته: عمووووووور
طالعني من غير ما يرد..
نوره: شي حفره صوبنا ..
عمور: هي نسيت اقولكم تحملوا عن تطيحون ترا الصخر الي تحتكم يزحلق ...
نوره: زين ..
خوله: نوره تعالي نحفر حرفي و حرفج ..يمكن يوم من الايام نمر هني..
يلسنا ننحت حرفي و حرف خوله..بصعوبه..و نحت حرف عمور شويه بعيد عن حروفنا لانه هو يايبنا هالمكان ...
عمور: يالله نرجع ....؟؟
نوره: ما طولنا شو هاه ...
خوله: بس لااه نرجع..المكان من هني يخوف وايد...
اتجدم عمور : يالله تعالن بنزلكن..
مسك يدي و مسكت يد خوله.. و نزلت من ع الصخور...و نحن و نازلين تزحلق عمور و طاح ع ركبته ...بس انا و خوله تماسكنا لان خلاص وصلنا تحت...بالبدايه تمينا اطالع بعض انا و خوله مستغربات من طيحت عمور..
همست: عمور.
عمور رفع راسه فجأه : بووووووووووووو
ضحكنا عليه كان امبين منحرج من الطيحه يلسنا نضحك عليه..بس سكتنا يوم طلع ركبته و جفنا الدم..
نوره: ابيه انجرحت...
عمور: ما عليه بسيطه...يالله انروح...
مشينا و جريب نوصل صوب قوم خالاتي..
نوره: يالله يا ممرضه داوي عمور ..
عمور: ما يحتاي بغسل الدم و خلاص...
خوله: بس انت تنزف ..اصبر بييب المطهر و لزقه الجروح..
نوره: يا عيني..
قعد عمور: صج ممرضه امسويه احتياطاتها ...
اتجدم منا فارس ما لاحظته الا يوم سمعت صوته: شو بلاك عمور...
عمور: طحت من هاك المنحدر..
فارس: شتسوي رايح هناك ما تدري هناك خطر ع الطرف ..و شي حفره
عمور: شسوي نوره الحت علي الا اخذها..
فارس: منو يلعب بمخك غير ها البنات ما وراهن الا الشقى..
رديت عليه ابسرعه: انت ما يخصك سالفه بين اخوي و بيني ..لا تدخل ..
عمور يعاتبني: بس نوره عيب..
كان بخاطري اروح بس كنت اتريا خوله لي ما اتيب المطهر ابا اجوفها يوم اداوي عمور ..
فارس: كل شي يتغير بالدنيا الا لسان اختك..
صرخت عليه: لا تطريني ع لسانك مفهوووووووم..و بعدين انا و اخوي واقفين انت ليش تحشر نفسك..
بطلت عيوني يوم جفته يقعد حذال عمور ابتسم: لا يكون ملكتي الجزيره ...
صديت عنه اطالع البحر الصوب الثاني سمعت عمور: نوره روحي عند البنات ..
رديت من غير ما اطالعه: ما بروح أي مكان بتريا خوله ...
شويه ووصلت خوله..يلست اطالعها فتحت شنطة الاسعافات الاوليه الي يابتنها معاها
فارس يقول لـ خوله: علني فداج يا الغاليه..
طالعني يوم رقصت براطمي يمين و شمال ..
خوله: لا ترفسني يوم بداويك..
عمور: مب لهاك الزود يعورني ...
خوله: بنجوف ...
فارس يحاول يستفزني: لو انت مب سامع رمسه هذي " و اشر علي " كنت مرتاح
رديت عليه بسرعه: ما يخصك محد طلب رايك ..
فارس و جنه قاعد يتسلي : ما وراها الا المشاكل..
صرخت: عمور سكته و الله بفره بالحصى ..هالحثاله...
كانت خوله تفرك جرح عمور بالمطهر و كان عمور يتألم : أي أي شوي شويه خوله..
خوله: تحمل عشاني..لا ترفسني ههههههه
فارس: يالله ذوق الويع بسبب هاي الشيطانه..
طالعته بنظرات: و انت ليش غيران انت لو فيك خير ...
قاطعني عمور و هو يتألم : بس نوره صخي عن الريال ...
رديت و انا مقهوره: سكت ربيعك ليش اييي معانا الرحله هاه ..تدري بكل مكان يتواجد يخترب كل شي ..
فارس: و الله انا ياي مع ابوي و اهلي مب ياي معاج.. و بعدين عمور بسبب منوه يتويع ..
رديت عليه و احس اني احترق بداخلي: انت رزه مالك اب كلهم متبرين منك..
خوله: بس اسكتوا خلوني اعرف اشتغل...
نوره: سكتي هالحثاله لو انا منج احرقه ..
فارس: و لو انا منك عمور كنت فريتها بالحفره الموجوده ع الطرف ما منها فايده ام لسان طويل...
طلعت لساني اغايضه: ها ها اطول عن شفيتك بعد ها ها "و انا امد لساني حسيت انه عورني"
فارس: عله القص..
نوره: قص الله لسانك..
عمور: نوره صخي شويه اووووووووف..يعور خوله..
خوله: خلاص بلزق الجرح بس لا تسبح فـ البحر..
فارس : هاه شو خذت من ورا هاي"و اشر علي"
صرخت: عمور سكته ترا و الله بفلعه بالحصى..
عمور: بس فارس صخ عنها ..
فارس: هههههههههه علشانك بس..يالله بروح ويا قوم عمي حرقت دمج شويه..
عطانا ظهره فرديت عليه: بالي ما يحفظك..
ما رد علي و كمل طريجه و كأنه ما سمعني..يلست ع الارض مضايجه اكرررررهه و يلست اصيح ...بصوت واطي...
عمور: نوره من صجج اتصيحين..
رديت و انا اصيح: قاعد يقرضني و انت صاخ عنه عايبنك..
خوله: زين ما قصرتي فيه جوفي حتى ما رد عليج اخر شي ما قدر عليج..
عمور: نوره انتي ياهل اتسوين هالحركات..
صج يوم فارس معانا احس بعمري ياهل..لها الدرجه استصغر نفسي جدامه...
خوله: ها خلصنا لا تسبح اليوم انزين حاول ..
عمور: ان شاء الله عادي امشي..
خوله: هههههههه هي عادي ...
نوره: ايه نسيتوني شوه ..
عمور: لا ما نسيناج تعالي وصليني لـ برزتنا...
زخيت ايده: يالله ..
عمور ابتسم لـ خوله : مشكوره الغاليه..
ابتسمت خوله: العفو ما سوينا شي..
استانست من خاطري يالله اتجرب عمور من خوله .. و اتزوجهم يا رب يا كريم ..اتغدينا و بعد فتره الغداء كنت اتجنب فارس .وما اتواجد بالمكان الي يكون موجود فيه ..مر الوقت بسرعه بس كنا نحس بالوناسه بكل ساعه اتمر علينـا بعد ما خلصنا صلاة العشى..تعشينا.. و سرت انا الشاليه علشان ارقد..متعوده ارقد من وقت ...رحله ولا غيره مستحيل اغير روتين حياتي ...فتحت عيوني ع اذان الفير ع صوت خالي عبدالله ...نشيت يلست اراقب الشباب يوم يصلون الجماعه..ما شاء الله عليه سيف صوته جميل.. يا حظها نهله لو انا منها بخليه كل يوم يقرا لي قران علشان صوته العذب بس نهله مب ويه تسمع قرآن فقدتها ...نشيت اصلي الفير ..يوم جفت خالوه عايشه اتقوم خالوه مريم و ام سيف ..صليت معاهم ...و قاموا البنات يصلين بعد ما خلصن...فكرت اطلع علشان اجوف الشمس يوم تشرق بس خفت لا اجوف فارس يسبح..علشان جي تميت ابمكاني اتجلب لي ما نشرت الشمس نورها ابكل مكان...الله يا روعة المكان..يوم يصير منور بعد الظلمه ...نشيت ...بس الكل كان رقود الا ام سيف ..سرت صوبها كانت تيمع الحطب علشان اتشب النار
نوره: بساعدج..
ام سيف: شتسوين ناشه من وقت...
نوره: دوم انش من وقت..بس اتم بفراشي الحينه لمحتج قلت بساعدج...؟؟
ام سيف: بسوي خبز رقاق ..
نوره: زين بساعدج ما اعرف اطبخ بس اذا تبين مساعده ما بقصر..
ام سيف : زين تعالي...
شبينا النار ..بين صخرتين صغار.. و حطت ام سيف التاوه ع الصخرتين..و يلست تخبز بعد ما عينت العجين..يلست ارااقبها ..عطتني اول خبزه سوتها اكلتها كانت لذيذه...
نوره: خالوه اسوي حليب ع الغاز ..
ام سيف: اتعرفين..
نوره: طبعا ها الشي الوحيد الي اعرفه بعد البيض و الطماط...
ام سيف: هههههههه زين سوي ...
سويت الحليب و خلصت..بعدها نشت خالوه عايشه و مريم..و خلود الي ولدها كان يصيح..فقمت سرت اتمشي ع البحر..
خالوه مريم: خلج بعيد عن الموج..
نوره: ان شاء الله ..
يلست اتمشي ع الشاطيء و الموج كان يضرب ريولي ....رفعت راسي اطالع الدنيا..جفت الشمس غطتها الغيوم..شكل الدنيا بتمطر عليناا...التفت لصوت الي كان وراي..
حميد: صباح الخير..
طالعته جفته شايل كوب حليب و خبزه و قاعد ياكل : صباح النور ...ناش من وقت...
حميد: صراخ جسوم واصل عندنا ...شتسوين..
نوره: حلو الجـور ..
مشيت فـ لحقني :بشو اتفكرين..
نوره: ماشي كنت اقول يمكن الدنيا اتمطر..
حميد: ما اظني..جوفي هناك الغيم وايد خفيف..
هزيت جتفي: يمكن ..."حسيت ابرجفه من البرد"
حميد: بردانه ..
نوره: شويه...
مد ايده: خذي الحليب شربيه عشان اتحسين بالدفى
نوره: ما عيبك طعمه..
حميد: امبلى بس عشان تدفين...
خذت عنه الكوب: شكرا انا مسويه الحليب..
حميد: تسلم ايدج...
طالعت وراي جفنا ابتعدنا زياده ع اللزوم: حميد تعال نرجع وايد ابتعدنا ...
حميد: يالله ...نوره..
التفت له جفته وقف ابمكانه يطالع السما: متى تبينا نملج...
بلعت ريجي بصعوبه هالمكان مب مناسب اقوله ما اباك ..سكت مب عارفه شو ارد عليه...
حميد: ولا بعدج تبين تتاكدين اني ودرت المغازله..
اتجدمت منه: مستحيل تقنعني ..انك ودرت اللواته..
حميد: وغلاتج ...علشانج بسوي أي شي...
نوره: قعدت ابمكاني: ادري ..
قعد جريب مني: كيف عرفتي ...؟؟
نوره: موافقتك ع شرطي..حميد انت وايد طيب.. و الوحده بها الزمن ادور الواحد الي يحبها ..و يحسسها بالامااان...
حميد: الحب وينه ...؟؟
يلست افر الحصى ف، البحر: الوحده يوم بتحس ريلها اموفر لها كل شي و ماا تقدر اتودره معناتها اتحبه..
حميد: هاه قصدج الحب ايي بعد الزواج...!!
نوره: طبعـا ..
حميد: فديتج علشان جي كنت اباج لانج غير
طالعته و ابتسمت له: حتى انت غيررر عن باجي البشر..
مدري اذا كنت اقول شعوري الصجي لـ حميد او اني اقص عليه..وقفت و مديت ايدي: يالله نرجع اكيد كلهم نشوا من الرقاد و بفتقدونا..
حميد وقف تم ماسك ايدي: عادي انتي خطيبتي و باجر بنملج...

المساهمات : 350 تاريخ التسجيل : 02/08/2007

التفتناللصوت الي كان جريب منا: احـم احـم ..
فارس: قيس ليلى يبونكم هنــــــــاك " اشر ع مكان يالسن الاهل .."
حميد: ههههههههه انت ليش لاحقنا..
فارس: انا كنت رايح بطريجي و طلبوا مني ازقركم..
كرهت قربه منا..اكررره اكثر و اكثر يوم اجوف نظراته الشيطانيه..
ييريت حميد من ايده: يالله انروح حميدااااااااان
حميد: نتجاوف هناك بو الفوارس..
فارس: ما يهمك..

يلست امشي ابسرعه و بعصبيه مدري يوم اجوف شيفه هالحيوان اتضايج جي...ييرني حميد فوقفت
حميد: شو فيج جنج تركضين..
نوره: اكررررررررهه ما احبه..
طالعني مستغرب : ليش!!!
نوره: طالع نظراته و بتعرف ليش ..الحينه جان فيك خير اسبقني لـ شاليه..
ركضت و لحقني..حميد..كنت اسبقه و شي طبيعي بحسسني اني انا الفايزه عليه بس من جربنا صوب الشاليه سبقني..
صرخت: غشااااااااش يا الغشاااااااااااش استوب ما العب..
حميد: هههههههههههههههههه غلبتج خلاص ...
وقفت و انا احس ميته من التعب حميد سريع..خيبه ما يتعب ولا يعرف التعب عنبوه ..لازم ريال يتحمل..قعدت ع الارض الاهث..رفعت راسي اسمع صوته:تعالي يا العيوز انا وصلت ..
قمت و انا اضحك مشيت لي ما وصلت صوب قوم خالاتي..كانوا الشباب يتريقون..
شيما: شكلكم يضحك و انتوا تركضون
نوره: هههههههه جفتونا فشله
خلود: قص عليج حميد..
نوره: غشااااااش
حميد: اسمعج نوورووه ..
رفعت راسي اطالع صوب حميد..لفتني عمور قاعد و خوله جريب منه الظاهر اتغير اللزقه..سرت صوبهم ..
نوره: شتسوون...؟؟
عمور: وين كنتي انتي...؟؟
نوره: كنت هناك سرت بعيد مع حميد اتسابقنا ..
خوله: يعورك الحينه !!!
عمور: لا ابد ما احس موليه بويع.
خوله: خلاص عيل بلزق الجرح بس علشان يتم الجرح نظيف...
عمور: بعد ما بتسبح اليوم ...؟؟
خوله: هههههههه باجر تسبح..
عمور: ضيعتوا علي الرحله..
نوره: باجي ثلاثه تيام..يكفي تسبح ع كيف كيفك...
خوله: زين باجر تسبح زين بعد ماي البحر بنظف جرحك يقولون زين...
وقف عمور: زين مشكوره..

التفتنا كلنا لـ صرخت نهله..يالله تعالوا انجوف حركات الدلع الحينه ...جفنا سيف قاعد يرشها بماي و الظاهر انه ماي بارد.. و اونها اتصرخ ..ويا ويها تدلع ...طالعت عمور جفت حزن انرسم بعيونه ..
عمور: انا بروح ..
فديتك اخوي:عمور جفت فارس هناك"واشرت مكان كنا انا و حميد"
عمور: زين بروح له...
بعد ما روح قلت لـ خوله: خاطري اضربها...ضرب..
خوله: ههههههههه منوه ..؟؟
نوره: من غيرها هاي الدلوعه جوفيها جوفيها اونها تضارب ويا سيف تقهر..
خوله: ابرايها خليها فـ حالهااا يالله نقعد صوب امايه ..

بجت ثلاثة ايام و بنودع ها الجزيره بوناستنا و ضيجنا و ضحكتنا و دموعنا .. و ها اليوم الخامس...لنـااا..وقت العصر اتيمعنا كلنا ع الشاطيء...
خالي احمد: يالله منو بسابقني بالسباحه...
عمور: انا اتحدااك...؟؟
خليفه: انا اغر عنكم و بغلبكم..
خالوه عايشه: ههههههههههه يمه خليفه الريال كل ما كان عود كان اسرع الخبره اتساعده..
حميد: ماشي عود صغير انا الفايز...
فسخ فارس فاتيلته: الي يبا يتحداني يتجرب مني...
خالوه مريم: شووه كلكم بتسبحون ..ع الاقل واحد يتم نضمنه يردنا الدار ...
الكل: هههههههههههههه
سيف : خلاص علشان حرمة عمي انا بسابقك وياكم...؟؟
زخته نهله من ذراعه: انت لا سيف لا...
ام سيف: هههههههه ما عليج ماخذ دورات سباحه..
ساسرت خوله: يوم اقولج يبالها ضرب..
خوله:ههههههههه يحليلها خليهاا مستانسه بريلهاا...
محمد : يالله انـااا وياكم...
خالوه مريم: منوه بتم معانا عيل..

صاح جسوم يوم سمع صوت ابوه و يلس يصارخ...
خلود: اووه اشتغلت صفارة الحكم ....
نوره: انا الحكم يالله ...
طالعوني كلهم بنظرات و جني ما استحي ع ويهي رازه بويهي فسكت متلومه ...
خالي عبدالله: انا مساعد الحكم ..
نوره: ههههههههههههه انت الي فيهم
فارس: الحريم و البنات بعيد بعيد ...لا تدخلون بـ شغل الرياييل ...

طالعته بنظرات كرهه و ما يستحي ع ويهه له ويه يوقف حذالنا و يسولف عادي مب جنه امسوي بلاويه من سنين..صج ان لم تستحي فأفعل ما شئت..
خالي احمد: خلهم خلهم مشجعين..الي بتشجعني توقف جريب منا ولا ما بتشجعني..اتروح بعيد ...
الكل: هههههههههه
خوله: انا بشجع باباتيه ...
خالوه مريم: انا بعد بشجع ريلي وولدي
فارس: و انا ...؟؟
خالوه مريم:علني فدااك انت اول واحد بشجعه عيل...
اووووووووف اختربت اللعبه قبل ما تبدا...ام سيف: كل واحد يشجع اهله.
خالوه عايشه: كلنا اهل
عزه: قصدها كل واحد يشجع اقرب شخص له ..حبيبي ما بتشارك..؟؟
فهد: امبلى انا اولهم..
خالوه مريم: عيل منو بتم برع كلكم بتروحون مره وحده منوه بوصلنا الدار..
الكل: ههههههههههه
خالي عبدالله: يالله صفوا يا شباب الشباب هالصوب و الشواب هالصوب..
خالي احمد: تقصدني هااااااا اصغر عنك انا ...
الكل: هههههههههههه
حسينا بالوناسه؟...كلنا مستانسين.. وينك يا خالي احمد اطلع لنا هاللعبه علشان كلنا نتيمع جي...رجعنا لـورا ..شويه..و اصطفوا المتسابقين حذال بعض...
خالي عبدالله يأشر:ادورون هالبقعه كلها
خليفه: هااااااااااااااااااااه
عمور: وين وين !!!!!!!!!!!
خالي احمد: ههههههههههههه وشلكم بالبحر و اهواله ...
خالي عبدالله:شفيكم توكم انا بفوز و انا و انا يالله راوونا...
حسيت ان خالي احمد بيفوز ...لان عنده خبره و حياته قبل كل فـ البحر..بس ما يندرى..دشوا المتسابقين البحر..زخت خوله ايدي لا اراديااا طالعتها فابتسمت لي...
خالي عبدالله: يالله بسم الله واحد اثنين ثــــــــــــلاااااااااااااااااااث...

دشوا المتسابقين يسبحون..فـ البدايه كلنا يلسنا نضحك عليهم كان شكلهم يضحك...ضحكنا من الخاطر بس بعدين انجلبت اللعبه جد.. و كل وحده تمت اتصارخ اتشجع فـ البدايه عمور كان الاول.. و فهد الثاني..و فارس و سيف تقريبا متعادلين.. و عقبهم خالي احمد..بس حميد و محمد و خليفه فضحونا كانوا وراا وايد.
شيما: طالعوا خليفه حراااااام الاخير ...
الكل: هههههههههههههه
شيما: تسونه انتن ريلي علشان تضحكون عليه..
نهله: جوفوا سيف وايد متجدم عليهم شكله بيطلع الاول..
خالوه عايشه: فديت عيالي ثنينتهم الاخير..
الكل: ههههههههههههههه
خالي عبدالله: تو النـاس مب الحينه تحدد النتيجه يوم بوصلون ...

قعدنا انصارخ و نشجع حتى خالوه عايشه قامت اتزاعج شراتنا و الله شي حـلو..اتشجعنا اكثر يوم جفناهم رادين..
خالي حميد: حمييييييييييد طرد من السباق غشاش..
نوره :فضحني خطيبي...
خوله: ههههههههههههه
بالفعل حميد حاول يختصر...علشان جي يستاهل الطرد.. و اتجدموا جريب وايد ...ما كنا نقدر انحدد منوه الاول.. و حركتهم في السباحه وايد قلت يمكن لانهم تعبـوا ...اتجدم خالي عبدالله داخل البحر ع اساس يحدد المراكز ...و كان اول الواصلين ..خالي احمد...اتناقزت خوله و حضنت خالي مستانسه و
خالوه مريم: كولولولوللووللوولوللوش
خلود: هييييييييي بابتيه الاول دام محمد الاخير ..
بعدها وصل فهد..عقبه فارس و الي بعده عمور.. و عقبه سيف...و بعدين محمد...و عقب دقااااااااايق ..وصل خليفه..
نوره: حمدلله ع السلامه زين انك وصلت...
شيما: حرام عليكم لا اتعيبون ع ريلي ...
اتجدمت من حميد: فضحتنا يا الغشاش..
حميد: ههههههههههههههههههههههههههه
محمد: هب هب خالي احمد
خلود: صل ع النبي بتاكل ابوي ...
خالي احمد: قلتلكم محد بغلبني..

ابصراحه ما اعرف اذا بتصدقون ان هاليوم كااان احلى ايام رحلتنا ...لان اول مره جي نتيمع كلنا مع بعض ...المتسابقين تموا راقدين ع ظهرهم من التعب ..اونهم يرتاحون..عقب فتره ..
خالي احمد: منو بتحداني بالغوص...
خليفه: هالمره مستحيل تفوز...
نوره: دخيلك اسكت ...انا لو منك استحي ارمس...
خليفه: طاعي خطيبج انتي انسحب..
حميد: و الله ما انسحبت راغوني

اخرتها اتفجوا كلهم يتسابقون ع الغوص الي بتم اخر واحد هو الفايز...و بعد خالي عبدالله هم الحكم ....دشوا كانوا وايد جريب منا ...بدايه ما صفر بايده خالي عبدالله غطسوا كلهم..ها المره كانت ايدنا ع قلوبنا...مرت دقيقه محد ظهر...
خوله: ابيه ولا واحد ظهر..
و ع طول طلع فهد يشاهق...
عزه: سلامتك بو بنتي...
عقبه طلع محمد...و حميد و خليفه طلعوا مع بعض عقبهم سيف..تموا عمور و خالي احمد و فارس مرت ثلاث دقايق...
حسيت بالخوف اتخيلت للحظه ان عمور موليه ما بيظهر اتجدمت لا ارادي صوب البحر..
زخني خالي عبدالله: وين رايحه تمي هني أأمن لج..
طالعته: عمور ما ظهر تاخر ...
خليفه: زين فارس و ابوي بعدهم...
طلع عمور و يلست اصارخ مستانسه ..
حميد: عيل لو طلع الاول شو بتسوين نوره...
نوره: ههههههههههه استانست لاني جفته مب مهم جم يطلع ...

بس لحظه صمت كلنا سكتنا يوم تموا خالي احمد و فارس داخل..اتخيلت ان سمك القرش بلع فارس احسن فكه..بس لحظات و ظهر خالي احمد ..و بقى فارس ...
انصدم خالي احمد يوم طلع و جاف فارس بعده تحت الماي ع باله هو الاول ...
خوله: فارس وايد تاخر مب معقوله كل ها تحت الماي...
لي روعنا يوم جفنا ملامح خالي عبدالله و خالي احمد اتغيرت...معقوله فارس للحين تحت الماي مستحيل !! بيني و بينكم ما كنت مهتمه ...
عمور: شو فيكم فارس ما ينخاف عليه..
خالوه مريم: وينه زين ما بين وينه الصبي روحوا دوروه...
اتجدم خالي احمد علشان يغطس يدور فارس...بس قبل ما يدش البحر طلع فارس يشاهق و كانه مخنوق ...
طالعنا مستغرب : شو بلاكم ...؟؟
محد رد عليه لانه خوفنا عليه وايد...
خالي احمد: من وين لك كل هالنسخ..
خالي عبدالله: فـــــــــارس الاول

استانسوا و باركوا له ..بس انا ما كنت مهتمه ...كان يهمني اني بعد يومين خلاص بنودع هالمكان الجميل..الي بالفعل قضينا فيه احلى و اجمل اوقات عمرنا ...مر اليوم السادس علينا ابسرعه.. و لحقه اليوم الاخير لنا .الصبح كلنا انيمع اغاضنا و انحطها في الشنط خـلاص..كنا متضايجين لانا بنودر هالمكان ....خلاص و كل شخص بتكون له ذكرى خاصه له بها المكان...كنت يالسه سرحانه اشرب الحليب ...اسمع سوالف خالوه مريم و عايشه و ام سيف..
ام سيف: مهره لا تلعبين بالرمل اخييييييج..عزه تعالي شيلي بنتج..
عزه: قاعده ارتب شنطتي خليها عندج..
خالوه عايشه: خليها يمكن تكتب حرفها و حرف امها و ابوها و اتحوطهم بدايره..
طالعت خالوه عايشه مستغربه من رمستها
ام سيف: شدراها هاي الياهل بالكتابه..
خالوه مريم: ههههههههههه تذكرين عايشه يوم كنا انقيض بمسندم اخر يوم نكتب حروف اسامينا و اسامي رياييلنا و انحوطهابدايره...
خالوه عايشه: هههههههههه زمان..خرافات بس كنا نتسلى ...
سالتها مستغربه : و ليش الدايره شو معناتها...
خالوه عايشه: يقولون انا بنرجع نفس المكان و ما بنفترق موليه...
ام سيف: لا اتصدقين خرافات ..
خالوه مريم: هي بس يمكن يستوي ..شدرااج...

شي غريب افكار عجيبه و غريبه لـ العيايز ...نشيت من مكاني سرت ادور ع خوله..ما لقيتها داخل الشاليهات بعدين عرفت انها قامت تتمشى مع خوله الخاينه انا اراويها الخاينه ...رحت ادورها...سمعت صوت من وراي
فارس: شتسوين هني ...؟؟
من غير ما اطالعه: ما يخصك...
فارس: روحي يمعي اغراضج بنطلع عقب شويه..
طالعته بنظرات احتقار: و انت شو يخصك ايمع اغراضي ولا لاء ...
فارس: انتي ليش من بين كل هالبنات لسانج طويل ...نفسي اعرف ..
رفعت راسي اطالعه: بعد هالشي ما يخصك...
و سرت عنه سمعته يقولي : عشان ما عندج رد اتقولين ما يخصك..
كنت عارفه انه يحاول يستفزني طنشته
فارس: مدري عمور كيف مستحملنج بقوله ايي يسكن معاي فـ بوظبي ..
طالعته و صرخت عليه: يا ويلك..

كنت اعرف تاثير فارس لـ عمور وايد ..و عادي يقنعه..
فارس قعد ع الرمل: بنجوف يا انا يا انتي..
اتجدمت منه: انت بتم حثاله و حقير مهما سويت...انت لو فيك خير ما سودت ويه ابوك و راغك من البيت...
ابتسم ابتسامه خلتني ارتجف من الغيض: ع الاقل راغوني و ردوا فتحوا ذراعهم لي..مب شراتج فرج ابوج و ما يدري عنكم شي..عاد صج ها التبري بعيونه ..
بغيت احط حد لهاي المصخره و لـ نظراته الي ترفع الضغط..شليت اجرب حصى مني و فريته..ييت ع راسي..وقف بس انا ركضت ابسرعه.. و الحمدلله قوم خالاتي وايد جريبين مني سمعته يهدد بس طنشته لاني حسيت بالامان مع اهلي...انشغلنا انحط الاغراض في المركب.

.التفت جفت خوله تضحك مع عمور...ابتسمت من الخاطر اتذكرت سالفه خالوه عايشه الي يحوط حرفين فـ مكان انهم برجعون بنفس المكان ويا بعض..طالعت الطرف الثاني صوب المنحدر الي خذني له عمور انا و خوله..لقيت شي وقت ع الاقل لي ما اروح هناك احوط ع حرف عمور و خوله..يمكن يردون هالمكان فـ شهر العسل..غافلت خالاتي ..وركضت صوب المنحدر..ركضت بكل سرعتي ..
.ركبت و كنت اتزحلق بس حاولت اتماسك...اخرتها وصلت فوق...جفت حرفي و حرف خوله .. و حرف عمور الي نحته بعيد عن حرفي و حرف خوله..شليت حصى ابيدي و حاولت احوط حرف خوله و حرف عمور ابتسمت ..يمكن اييون هني يوم من الايام..فديت حرفي تم ابروحه.
.سمعت صوت التفت جفت فارس ياي صوبي رديت ورا خايفه لا يضربني ..لاني من ساعه فلعته...فتزحلقت اريولي و طحت بالحفره...صرخت من الويع
فارس: نوره نـوره ..
غمضت عيوني حسيت اني بموت خلاص..بس جفت فارس يمد ايده..
فارس: تعالي ..عطيني ايدج..
رديت لورا: لا بتضربني..
فارس : ما بضربج يالله بروحون عنا ..
نوره اتجدمت ازخ ايده بس غيرت رايي انا ما احط ايدي بايد هالحثاله ...كنت احس جسمي كله متكسر يعورني بس كنت احاول اتماسك...
فارس: ترا بروح عنج محد بفتقدج بتمين هني ابروحج ..
نوره صحت : ازقر عمور ايي يطلعني.
عصب علي: تعالي اقولج بظهرج من هني ..
نوره: ما ابااك ..انا ما احط ايدي بايدك يا الحثاله...ازقر عمور..و يلست اصارخ عمور عمور ..
فارس: لو تموتين محد بسمعج ..
مد ايده : تعالي يالله ...حلفت بالله ما بضربج..
نوره : ما ابا ازقر عمور ..
فــــــــارس: يالله شو هالعناد الي عليج..لو سرت ازقره...بشكون بالسالفه و بحتشرون عليج تبين هالي يصير ..
نوره: هي اهون علي من انك تظهرني من الحفره..
فارس بنبرة تهديد: ما بتيين...؟؟
نوره: ازقر عمور ...
فارس: خلاص عيل بروح عنج.. و انتي خيسي هني محد بفتقدج خالي احمد بتحرااج فـ مركب خالي عبدالله و نفس الشي خالي عبدالله بتحراج فـ مركب خالي احمد ...
مد ايده: يالله تعالي و الله اني ما بضربج تعالي ...
نوره صرخت عليه و انا اصيح: جذاااااااااااب ازقر عمـــــــــــور اخوي ..
وقف فارس: ابرايج انا امروح شغلوا المراكب ..
و اختفى من عيوني تميت يالسه مستحيل ما يفتقدوني اكيد خوله بتسال عني ...و عمور لازم بيحس اني مب موجوده ...
سمعت صوت محرك المراكب.فيلست اصارخ
صرخت باعلي صوتي و كان صوت المراكب اتغطي ع صوتـي..
حطيت ايدي ع اذوني و يلست ازقر فارس لانه يمكن يكون جريب مني ..
صرخت: فــــــــــــارس فــــــــــــارس تعال طلعني لا اتخليـني ابروحي فــــــــــارس ..تعالي اضربني اجتلني لا اتخليني هني بروحي ...فـــــــــــــارس فاررررررررررررررس ..

المساهمات : 350 تاريخ التسجيل : 02/08/2007

0":.,؛،’,((الحلقــــــــة الرابــــــــــعة عشـــــــــــر )),.،؛."0.

"فديتك ريح اعصابك انا مازلت متماهل..انا عنك اشيل الشوك وارمي الورد بدروبك
احبك وانت ماادري علي اليوم تتجاهل..ضنونك خلها عنك ابيك تغير اسلوبك..حلفت وقلت لك غيرك مااحد بالحب يستاهل"

يلست اصرخ باعلى صوتي :فارس فارس..
بس ماشي كان رد..راح و خلني ابروحي: فارس تعال طلعني الله يخليك..فارس.
عمور: نوره نـــــــــوره نشـي نوره..
نشيت و انا اشاهق : شو وين انا ...
عمور: شو بلاج اتزاعجين حلمانه شو..
سالته: ردينا...؟؟
عمور: من وين..
نوره : من جزيرة قشم...!!
عمور: جزيرة قشم "وانفجر ضحك" ههههههههههههههههههه تحلمين

حطيت ايدي ع رقبتي اطالع حجرتي الظاهر اني كنت احلم !!معقوله ..كل ها حلم..؟؟ جزيره و مراكب و رحله و ضرابه سوالف و ضحك كله حلم ..
عمور يبتسم: شو بلاج اتزاعجين تبين فارس ...
طالعته :فارس !!
عمور : هي فارس ما يسمعج حميد ..
نشيت من ع الشبريه : كنت احلم..
سرت صوب التسريحه امشط شعري بعصبيه ..حتى بالحلم اتضارب معاه النذل ...
عمور: انا بطلع
نوره: عيل ليش قومتني..
عمور: شدراني سمعتج تزاعجين تبين فارس..
صديت عنه: طووووووووف ..
عمور: جزيره قشم هاه ...ههههههههههههه
صرخت عليه: اطلع برررررررع

طلع عمور هو يضحك ابتسمت بس الحلم ابصراحه كان حـلو و جميل..اتذكرت حاله عمور الصبح يوم داش علي..ركضت الحقه..
زقرته: عمور عمور..
عمور: هلا ..
نوره: شحالك الحينه...؟؟اتذكرت الفير كنت مضايج..
عمور: الحمدلله احسن...
ابتسمت له: جفتك بالحلم..بستوي لك شي حلو "كنت اقصد ارتباطه بـ خوله"
تطنز علي: وين بالجزيره ..

طلعت لساني و دشيت حجرتي سمعت ضحكته ..حالته اتحسنت وايد..طالعت الساعه كانت 12 الظهر ...معقوله انا ارقد لها الوقت ..اخترب رقاادي كل من عمور ...سرت المطبخ سويت لي معكرونه ..بعد صليت الظهر..اتغديت ...كنت ابا اتصل بـ خوله ابا اعرف شو كانت حفلة ملجة نهله ..

.بس غيرت رايي ما يهمني شو كانت ..المهم الحينه كيف ابطل خطوبتي عن حميد و من غير ما اجرحه لانه ما يستاهل ...بس ما اعرف كيف ..الحينه بقعد يز باذوني متى بنملج و متى بنملج ...اووووووووف يا هي بلوى بس تدرون ما ببطل ع الخطبه الحينه بعد ما يقرر عمور يخطب خوله.. و بتم أأجل الملجه قد ما اقدر ...بس يا رب خالي احمد ما يتدخل بالسالفه ..

يوم الخميس و الجمعه حسيت بملل فضيع..لاني كنت حابسه روحي بالشقه..ما رحت بيت قوم خالاتي لان ويه النحس فارس هناك...؟؟ و بعدين ما ابا خالوه عايشه تطري لي سالفه ملجتي مع حميد ...انا صج وهقت عمري ...اخيرا يااه يوم السبت...رحت دوامي ابدا يوم يديد و اسبوع يديد من حياتي ...بس بعد زواج نوف حسيت ابفارغ كبير .. و رفيجتي سوسن مب وايد معاها اصلا ما احس بالراحه من صوبها علشان جي مب وايد احتك فيها ....خلص الدوام..اتصلت بعمور اذا بييب غداا او انا اشتري بطريجي...
نوره: هلا عمور ..وينك..
عمور: توني داش الشقه...؟؟
نوره: شريت لك غدا ولا انا اشتري..
عمور: زين بعد فكرتي فيني ..لا خلاص انا اشتريت...؟؟
نوره: زين عيل ..كنت بمر اشتري خلاص دقايق و بوصل البيت..
عمور: لا يكون انتي الريال و انا لاحرمه..
نوره: هههههههههه اجلب ويهك..
عمور: ههههههه مع السلامه..

شي جميل ان عمور تحسنت نفسيته و الدليل انه طلب له غدا زين زين شي طيب..مر ع بالي يوم رمستني خوله امس فـ ليل تسالني ليش ما ييت بيتهم.. و مع اني مخبرتنها اني ما بيي نهايه الاسبوع ابسبب الحثاله الموجود فـ بيتهم...بس انا سالتها اذا جافت عمور مر بيت خالوه عايشه..لان بالعاده كل جمعه يكون هناك..علشان يجوف الحبايب ..مدري اذا تغيرت العاده او لاء...بس قالت انها جافته واقف حذال باب البيت ما دش..طلعت له خالوه عايشه و سلمت عليه...

استانست يوم قالت لي ان جافها و قعد يسالها و طلب منها ان تطبخ له غدااء ...ما يستحي ويه لووح ..مرابع فارس شو بتعلم من هالاشكال ...يس الظاهر تبدلت الصوره الحينه قامت اللقاءات تتغير ..صارت ابيت خالوه مريم.. و الحبيبه صارت خوله..بس ها تفكيري و امنياتي لان كل مره الاحظ خوله اتسولف عن عمور مثل ما انا اسولف عن خليفه..يعني مشاعر اخوه لا اكثر شي ينرفز و يقهر ....سالتها عن حفله ملجة نهله..قالت كانت حلوه بس ناس وايد و زحمة لازم بصاله شي طبيعي بيكون زحمة ....و قالت بعد اونه نهله يلست اتصيح..هاي عليها منكر دلوعه..لو فيها خير ما نست عمور بهاي السهوله جان صدق اتحبه..ولا صدقتني بالكلمتين الي قالتـها...هذاك اليوم..

المساهمات : 350 تاريخ التسجيل : 02/08/2007

.امممممم ما بجى شي ع عرس خليفه...هالاسبوع بنروح دبي بس انا بخلي هالمره عمور ياخذنا...بس ان شاء الله هالحثاله ما يرز ويهه...وصلت الشقه...اتوقعت اجوف عمور منسدح ع الكنبه كالعاده بس ما كان موجود...سرت حجرتي بدلت ملابسي و صليت..لبست زلاغي و الكوت ابصراحه اليوم وايد برد...طلعت من الصاله جفت عمور واقف بوسط الصاله يجلب التلفزيون من قناة لـ قناة ...
نوره: انت من وين طلعت يا الساحر....؟
نقز عمور يوم سمع صوتي: انا الساحر ولا انتي..؟؟متى ييتي...!!
سرت المطبخ و انا اقول: من شويه بدلت و صليت..تعال نتغدا..
عمور: اوووه ييبي الغداا هني فـ الصاله..
نوره: اوكىىىى احمد ربك بغديك بعد تشرط..."ما اعتقد سمعني لاني ما سمعت أي رد منه"
حطيت العيش في الصحون ويا السلطه..و شلت الصينيه.. و سرت الصاله..قعدت ع الارض و يلس عمور جري مني...
عمور: غريبه !!
نوره: ادري ادري شو بتقول..ليش متغيره !!
عمور: صدق ليش !!
نوره: تبا الصج..
عمور: اكيييييييييييييد..
نوره: اممممممم بالاول خلص غداك علشان ما اسد نفسك..بعدين بقولك..
عمور: احسن بعد...
نوره: عمور اخوي حبيبي انته..
عمورمندمج فـ بالاكل: شو تبين...؟؟
نوره: يوم الخميس نهاية الشهرخذني دبي
عمور: يوم الخميس بنروح بوظبي سباق التجديف بيكون يوم الجمعه
نوره:اممممم خلاص يوم الاربعاء الصبح
عمور: و دوامج..؟؟
نوره: بترخص
عمور من غير ما يطالعني: شو عندج...؟؟
نوره: فساتين حق عرس خليفه..ما بقى ع عرسه غير شهر
عمور: خلاص يا ابوي خلي خليفه يوصلج...
نوره: ما ارررررررريد انت خذني..
عمور: اوووووووه ما اقدر...
نوره: ما يخصني فضيحه كل مره قوم خالاتي ياخذوني ...
عمور: زين زين.تونا بالاول الاسبوع..لـ يوم الاربعاء ربج يفرجها.."ونش يغسل ايده"

لحقته بدوري و غسلت ايديني...شربت ماي ..كنت بطلع من المطبخ بس جفت عمور يتريانـي عند الباب ..طالعته بنظرات استفهاميه
عمور: نسيتي شوه...؟؟
نوره:شو..
عمور: ليش كل هالتغير مب قلتي بتخبريني عقب علشان اخذ راحتي فـ الاكل هذا ها انا خلصت...
نوره: هيييييييييي
دزيته اطلعه من المطبخ ..هو جدام و انا ورااه ادزه..
عمور: خوزي عني يا الياهل..
نوره: ههههههههههههه اقعد ع الكنبه...
قعد و يلست مجابلتنه ...
عمور: هـا اكيد تبين اخبر حميداااااااان انج تبين تملجين..
نوره: لاااااااااااااااااع
عمور: امممممممممم عيل تبين اخذج دبي
نوره: لاااااااااااااااااع
عمور: اخذج المنار
نوره: لاااااااع لاااااااااع لاااااااااع
عمور: زين قولي
نوره ابتسمت و غمضت عيوني: شو رايك اتخطب خوله بنت خالوه مريم..
فتحت عيوني اطالع ردت فعله طالعني بنظرات... ونش من مكانه رايح حجرته..
.لحقته :لحظه لحظه ما خلصت كلامي...

كان بيصكر الباب بس دزيته احاول افتحه...بس عمور غلبني و صكر الباب : ما عليه يا الدب...
رفست باب حجرته بغيض و سرت الصاله انظف مكان ما تغدينا...رجعت حجرتي متغصصه الظاهر عمور عمره ما بيفكر يخطب خوله بموووووووت من الغيض شي ينرفز يا ربي ...لي متى لي متى بتم جي اووووووف اترييت يأذن العصر ..

صليت و بدلت ملابسي غايتي بيت خالوه مريم..قبلها اتصلت اتاكد اذا فارس موجود او لاء و الحمدلله طلع مش موجود و انه ذلف بوظبي البارحه ...طلعت من حجرتي.. قبل لا افتح باب شقتي علشان اظهر تذكرت عمور..رجعت وصلت حجرة عمور و رفست باب حجرته حتى حسيت ان ريولي انكسرت صرخت من الويع "الله يغربل عناد عمور" و طلعت رايحه بيت خالوه مريم ...دشيت كالعاده البيت ما به حد الا خوله..زين جفتها اليوم بعد..قعدنا انسولف بوايد مواضيع و منها عن عرس خليفه..بس كنت اتعمد وايد اطري عمور فـ كلامي يمكن هاي بعد اتحس و اتحبه..
قلتها: خولووه ع فكره ترا عمور احتمال ياخذنا دبي شو رايج...؟؟
خوله: مدري ع حسب ماماتيه ...
خوله: اونج..بنروح انا و انتي و خلود..طبعا نهله الحينه معرسه ما اظن ريلها يسمح لها...
خوله: هي يمكن...شو رايج انروح بيت خالوه عايشه
نوره: اووووووه فكرت انا و رايحه امر عليهم بسلم و بظهر ماا فيني يحشروني متى الملجه صار الموضوع ممل..
نشت خوله تلبس عبايتها: نشي نشي استحي حرمة ولدهم و للحين ما باركتي ع نهله قومي
عاندت: ما بروح كيفج شوه...؟؟
خوله: نووره كافي انج ما حضرتي ملجتها...
نوره: بعد عرسهاا ما بحضره...؟؟
خوله: زين عرسها بالصيف ...بتغيرين رايج لـ يوم عرسها..
رديت ابرود: بنجوف...
خوله: يا برووووودج قومـي ...
رديت طفرانه من خوله: زيييييييييييييييييييين اوووووف لو ما ييتج احسن...
خوله: اتهبين انتي طوفي جدامي..
طلعت من الحجره و هي وراي: يا رب تزوجين عمور
حسيت ابكس ع ظهري صرخت من الويع خوله: هههههههههه دواج...
نوره: يعور يا الدبه...

صخينا يوم طلعنا من البيت مره.. و سرنا صوب بيت خالوه عايشه دشينا و كالعاده خالوه يالسه تحت البلكونه بس هالمره ابروحها .بس جسوم علني فدااه راقد جريب منها .....سلمنا عليها...
خالوه عايشه: يمه نوره شحالج الحينه ان شاء الله احسن..؟؟
نوره: الحمدلله ..صدري بس شويه يعورني"طالعت خوله بنظرات فردت علي بنظرات حاده لاني اجذب "
خالوه عايشه: رحتي الطبيب
نوره: هي سرت عطتني ابررررره اووووف و انا اتويع قلت الله يسامحج خالوه عايشه..
خالوه عايشه: ههههههههههه المهم صرتي احسن ...مب زين اتمين بويعج يمه ما زين...
نوره: الحمدلله...
خوله: الا وين امايه ع بالي هني ...؟؟؟
خالوه عايشه: لا طلعت مع خلود و محمد ما ادري وين تبا اتروح بس جنها تبا تشتري عطور عشان عرس اخوج...
خوله: هي ما بقى الشي نهاية الشهر الياي ...
خالوه عايشه: حتى التجديف ما بقى له شي شادين حيلهم قاموا عيالنا ما ينجافون ...الا المعرس وياهم يجدف
خوله: عيييييييل احسن عنهم شوه...؟؟
خالوه عايشه: هههههههه يحليله...
خوله: امايه كل يوم ضرابه مع ابويه اتقوله ها معرس و انت بسوده تحت الشمس المفروض ما اتعبه...
خالوه عايشه: هههههههههه صدقها امج..بس ما عليه ريااااال اخوج و الريال ما ينعاب "طالعتني و ابوي ها الي كنت خايفه منه الله يغربلج خوله يوم يبتيني هني" عقبال حميد و نوره طولت خطبتهم
ابتسمت و انا اطالع خوله بنظرات عتب و لوم : يالله خل سباق التجديف يخلص و نملج عقبها علشان حميد يدش الصاله و بشرته زوينه و حلوه مب شرات خليفه..
خالوه عايشه: يبتيهااااااا هههههههه نهله مرتاحه ريلها لا تجدف ولا شياته...
نوره: الا ع طاري نهله وينها كنت ابا اسلم عليها و ابارك لها ترا ما جفتها ...
خالوه عايشه: دااااااااخل مدري شتسوي
خوله: جي ما تيلس وياج امخلتنج ابروحج...
خالوه عايشه: كانت يالسه بس من شويه دشت مدري وين سارت دشوا شوفوها ...
نشينا انا و نهله افففففف تعالوا جابلوا شيفة نهله الحينه..دقينا عليها باب الحجره..
نهله: منوووووووو
قلدتها منووووووووووو فضربتني خوله: انا خوله و نوره معاي نبا انسلم عليج...
نهله: لحظه ...
نوره بصوت واطي: جفتي هاي ما فيها مذهب الله يغربلها ان شاء الله تطلق..
ضربتني خوله بايدي: ايه حرام عليج ...ليش تتفاولين ع البنيه..
كنت برد ع خوله بس نهله فجت الباب : السلام عليكم..
ابصراحه نهله محلوه جي الزواج يغير شكل الوحده عيل من باجر بملج سلمت عليها و باركت لها ...
خوله: شتسويييييييين...؟؟
نهله: كنت ارمس سيف ..
نوره: يا حبيبي
خوله + نهله= هههههههههههه
نوره: حبيتيه ...؟؟
نهله اونها استحت صدق ما تستحين ع ويهج من جم اسبوع قاعده اتصيحين ما تبينه اونج تبين عمور اخ يا منكر البنات ...
خوله: نوره لا تحرجين البنيه...
نوره: زين قال احبج...
نهله اونها متلومه ما اترد..
خوله: بس نوره شفيج..
نهله: بعد ما تملجين بـ حميد و اتعرسين برد ع اسئلتج و بسالج نفس السؤال ...
نوره: زين يوم بملج يصير خيرررررررررررر
طالعتني خوله بنظرات تباني انجب لان ردي كان امبين و جني اقول لـ نهله يوم بيبيض الديج بملج بـ حميد\اااااااااان
نهله: خوله ما انخطبتي بجيتي انتي ...
خوله تبتسم بس انا احس ابداخلها انجرحت الحماره ما اتعرف ترمس: لا ما انخطبت خلاص راحت علي
ضربتها بيدها: شو راحت عليج توج عمرج 21 ترمسين جنج عيوز..
نهله:هههههههههه بعد جم شهر بدش 22 سنة..
خوله تنهدت: صدقها نهله..
نوره كنت منقهره من نهله و اسلوبها الدفش: ما توقعتج جي خوله ..اول مره اكتشف فيج هالصفه..
خوله تطالعني مستغربه : شـوه ...؟؟
نوره: اجوفج قمتي اتسويت شرات بعض البنات الي يخشون كل شي زين يخافون الحسد..حتى لو يحلفون جذب..
نهله: هههههههههه ع شو بحسد خوله ..خوله شو عندج ما تبين اتقولينه و اتخافين احسدج...؟؟
طالعتني خوله ابتسمت اغايض نهله: ترا اقولج ما بتقولج..
نهله :قولي انتي انزين ....؟؟؟
نوره: ليش ما تدرين ان عمور يبا يخطب خوله..
ههههههههههههه ضحكت ع ملامح خوله الي تغيرت.. فجت عيونها و جنه شويه بتطلع منهاا..بس خوله جفت الابتسامه اختفت من ويهها و جنه حد صفعها ع ويها..ما كانت تتوقع الخبر..شو تتحرااا هي بتعرس و عمور بتم عازب طول حياته عشانها ....لا يا حبيبتي لااااا عمور بيخطب خوله ..
خوله: اممممم نوره ..جب عن......
نوره: جفتي نهله كيف تبا تنكر...شو بلاج نهله ههههههههههه
نهله بصوت واطي: ماشي مبروك خوله
خوله: هذي نوره و الله..........
ييريت خوله ووقفنا: يالله نهله بروح الحينه بيأذن المغرب لازم ارد البيت ..في أمان الله..
وسحبت خوله معاي و خوله كانت تعترض بس الظاهر نهله ..من الصدمه ما كانت تسمع شو اتقول خوله...ادري خوله محرجه مني الله يعين ..سلمنا ع خالوه عايشه و بسنا جسوم الي كان بعده رااقد...و سرنا بيت خالوه مريم من دشينـا واجهتني خوله : انتي شو الي سويته..
نوره: شوه..
صرخت علي : شوه شو ما بغيتي تطلعين هاي الجذبه الا جدام نهله الحينه بتحشر كل المخاليق و بتطلع عني اشاعه..
طنشتها رايحه داخل : شو يعني..
يرتني من شيلتي للحظه حسيت اني بختنق: لازم ما بتهتمين لان انتي ما بيمسج شي لكـن انا...
ييريت شيلتي من ايدها و صرخت عليها: نهله ما بتقول شي انا اعرفها لا اتكبرين السالفه ...و شو يعني لو انتشرت هاي الاشاعه شو بلاه عمور اخوي ...
ردت اتصرخ علي بالاول كنت خايفه صوتنا ينسمع برع بس الحينه يسمع الي يسمع ما يهمني هالغبيه عصبت فيني فردت علي خوله: ما بلاه شي بس انت ثمني رمستج لا اتعقين أي رمسه اذا انتي عندج عادي انا لا ما اسمح لج
هذي اول مره نتضارب فيها انا و خوله صرخت عليهااا: بس صخي ..شو تتحرين عمرج و شو يعني شو بيصيبج كل ها علشان انتي مطلقه و خايفه ينتشر عنج شي..."جفت ملامح خوله اتغيرت و جني جرحتها بس كملت كلامي" وايد ناس تطلقوا ما سوا الي انتي سويته ...و بعدين نهله ما بتطلع الرمسه الي قلتها لاي مخلوق .. و اذا وصلتج الرمسه الي قلتها لـ نهله عن طريق غير نهله..هذيج الساعه تعالي صرخي و عقي رمسه ع كيفج ...
سكت يوم جفت خليفه داش البيت جنه رجع من التدريب: شو عندكن فضحتونا صوتكن واصل برع ...
دشيت داخل اييب شنطتي و سويج سيارتي و طلعت امطنشه خوله و خليفه من غير ما اقولهم أي كلمه ...سمعت خليفه يقولي: سلمي زين ...؟؟
ما رديت صكرت باب لحوي بعصبيه ركبت سيارتي و الحمدلله ما جفت حميد بطريجي ..مب فايجه اسولف معاه..كنت امفوله بداخلي..لي متى هاي بتاخذ أي سالفه عنها بحساسيه زين تطلقتي شو يعني شو صابج ..اففففففففف الله يغربلك ياا جابر ...
انا مب هبله اعق أي رمسه انا ما قلت عمور يبا يخطب خوله لـ نهله الا لاني متاكده انها مستحيل تطلع هاي الرمسه برع.. لان الملامح الي انرسمت ع نهله ..اكددت لي انها بعدها ما نست عمور... و انا بهاي الطريقه جرحتها فشيء طبيعي انها ما بتروم اتقول لاي مخلوق عمور يبا يخطب خوله ما بيهون عليها ..بس خوله ما تنلام لانها ما اتعرف علاقه عمور ـ نهله كيف كانت لو كانت تعرف ..ما بتحرج جي هاي السخيفه ...
دشيت شقتي و صكرت الباب بعصبيه ..
.اتفاجات بـ عمور طالع من الصاله الصغيره: شوي شوي كسرتي الباب ..شو عندج انتي اليوم تدريب اتقوين عضلالات ريولج بـ بيبان الشقه ..
صرخت عليه حتى انه نقز مب متوقع ردي: ما يخصـك انا كيفي اكسر ارفس حتى لو اكسر راسك ما يخصك فيني م ا ي خ ص ك فيني مفهووووووم ولا لاء ..
وسرت داخل حجرتي لو ما كنت محرجه كنت بضحك ع شكل ملامح عمور بس يولي مب فايجه له..فسخت عبايتي و شيلتي بكل عصبيه و فريت شنطتي بعصبيه فوق الشبريه ...
عمور: شو فيج..
رديت ابسرعه من غير ما اطالعه: ماشي
عمور: كنت بشك انج جفتي فارس لان حالج ما ينجلب جي الا اذا جفتيه..بس فارس مب موجود هني شو بلاج..
طالعته بنظرات ناقصه انا يطري لي هالحثاله : انت تشبه خوله بشي واحد بس ..
عمور: هـــــــــــــاه يعني خوله .."اتجتف" و بشو ان شاء الله اشبه خـوله ...؟؟
اتجدمت منه و اشرت ع راسه بصبعي: اثنينتكم فيكم مخ حمااااااااااااااااااار...
دزيته و دشيت الحمام اتيدد علشان اصلي المغرب ...جفت عمور واقفني عند باب الحمام ها ما يستحي صج ويه لووح..
طالعته: نعم ...؟؟
عمور: اتسبيني و بعد اتقولين نعم...؟؟
رديت بعصبيه: شو تبا...
عمور خذ نفس طويل : ترا حتى انتي و فارس تشابهون..
و قبل ما يكمل جملته شليت علبه الشامبو علشان افره بس صكر باب الحمام..يا كرهه يوم يكون رايق و متفيج ينكت و انا اعصابي بتتلف من القهر و الغيض.
طلعت من الحمام و صليت المغرب ..سرت المطبخ سويت لي سندويج جبن..و كوب حليب مع نسكافييييييييه ...بعد ما خلصت..يلست ع الكنبه اجلب قنوات التلقزيون..حسيت اني للحينه محرجه..اتذكرت كيف طريقه اكلي جني اتضارب مع السندويجه و الحينه كيف افر قنوات التلفزيون بعصبيه حق شو كل ها ...حاولت اهدي نفسي ...ما صدقت اذن العشىى قمت اصلي .. وانخمدت
مر اسبوعين مقاطعه قوم خالاتي انا معانده و خوله معانده بس فـ نهاية الشهر قامت خوله .. كل شويه ادق لي و انا كنت ما ارد علشان مره ثانيه تتأدب و ما ترمس معاي بهاي الطريجه و بهالاسلوب و انا فـ بيتهم..خلال الايام الي مرت كنت منتفخه حتى لـ عمور مع انه ماله ذنب في مره كنت طالعه من المطبخ بعد ما تعشيت..فاجاني عمور ياي صوبي.
عمور: انتي ليش منتفخه ..
طالعته و طنشته زخني من ذراعي: انا ارمسج..
ييريت ذراعي بعصبيه فضحك: هههههههههه
رديت عليه ابسرعه: ما يضحك..
عمور: ها يزاتي اني ياينج اقولج خلاص انا باااخذكم دبي و انتي جي اتعامليني...
ابتسمت: و الله بتاخذناا
عمور: عيل الحينه تكلمتي..
نوره: ناس ما اتيي الا بالعين بالحمره ...
عمور: معاج انتي الوان قوس قزح
نوره: ههههههه
عمور: بظهر ربعي يتريوني تحت ...
زقرته: ايه لحظه انت اكيد بتاخذني دبي
عمور: هي اكيد..

المساهمات : 350 تاريخ التسجيل : 02/08/2007

و ظهر من الشقه عفدت ادور موبايلي اتذكرت اني فريته تحت شبريتي ..سرت ادوره لقيته جفت بعد خوله متصل بي.. و امطرشه لي مسج" اذا ما رديتي علي بييج البيت" طرشت لها "اذا تبين ارد عليج..قولي انج بتروحين دبي باجر انتي و خلود .. و اذا ما بتروحين لا اتعبين روحج و ادقين .."

اتعشيت و صليت العشى و الحينه بنخمد و خوله ما ردت لي خبر الظاهر ما بتروح تقهر الغبيه..بندت الليت علشان ارقد بس وصلني مسج نقزت اجوفه و كانت خوله " خلاص مروا علينا انا و خلود بس ما قلتي ع الساعه جم بتظهرون..؟" "طرشت لها مسج ع الساعه 8 الصباح ممنوع دخول الشاحات"نهله" .."
و يوم الخميس ع الساعه 8 كنا واقفين حذال بيت خالوه مريم ركبنا خوله و معاها خلود ...و يايبه الحشره جسوم ...بس ابصراحه كان جسوم امونسنا بـ طول الدرب...
طالعت خوله: شحالج..
ردت : ابخير يا ..........؟؟
نوره: ما اتوبين..
خوله: هههههههه
خلود: اخيرا تصالحتوا..
خوله: هي امكبره السالفه..
عمور: و اظني دخلتني بالسالفه و انا مالي ذنب...
نوره: جذاااااااب
عمور: امبلى سبيتيني و قلتي اقول ولا ما اقول ...؟؟
خوله: هههههههههه و انت شو دخلك عمور ...؟؟
نوره: هيييييييي كنت معصبه و طلعت حرتي في عمور..يقهر يجوفني محرجه و هو قاعد يستفزني ...
عمور: المهم اقول ولا ما اقـول ...؟؟
خلود و خوله= هي قـول ...
نوره: لا تستهبل انطم ولا تسوي مشاكل خلنا نشتري ع راحتنا ...؟؟
خوله: ليش شو بعد قلتي ...غير عن الي قلتيه جدام نهله..
اووف انجبي يا خوله ولا يخور لسانج ..طالعني عمور بنظرات استفهمايه بس انا رديت له بابتسامه ...
خلود: هي قالت لي خوله..
نوره: بس اسكتوا "وبطلت عيوني افهمهم انهم يسكتنون و ما يقولون شي جدام عمور"
عمور بصوت واطي: ادريبج مسويه سالفه انتي ما وراج الاالمشاكل

ابتسمت له ..ما فيني اقوله شي عن ينزلني بنص الدرب...الله يغربلكن يا خوله و خلود.. وصلنا دبي .. و اليوم الخميس الخط كان وايد زحمه..بس سوالفنا..نستنا تعب الخط....مرينا ع مركز الغرير ما عيبنا شي.. وصرنا مركز سيتي سنتر بعد ما عيبنا شي...و سرنا المنار بعد ما جفنا شي حلو ..اخرتها حرج علينا عمور و حلف يكون مركز البستان اخر مركز.. و اذا ما شرينا خلاص بردنا راس الخيمه ...و قبل ما انروح انجوف لنا فستان مرينا المصلى صلينا الظهر .
.و اقترح علينا عمور ان نتغدا قبل و عقبها ...انكمل جولتنا ...

سرنا صوب المطاعم...قعدنا و عمور راح يطلب لنا..كنا ميتين يوع من الصبح ما كلنا شي قاعدين انلف بهاي المراكز ...قعدنا نتغدا.. و كنت وايد احاول اجرب عمور من خوله...
كنت اعلق تعليقات.. و خلود مره اتمشي معاي.. لدرجه ان عمور مرات ينحرج.. و مرات خوله تحمر و تزرق و انا و خلود نضحك عليهم .. خلود كانت اتعلق و اتسولف بحسن نيه..
بس انا ككنت اتعمد علشان اجربهم من بعض.. و لها السبب طول الوقت تمت خوله صاخه و مستحيه ووايد يتني قرصات منها ...بس كنت اتحملها ...مرينا ع المحلات الموجوده ...و اخيرا لقينا فساتين عيبتنا .
.انا شليت لون الوردي و خوله كان لو فستانها سماوي مع بيج ...
اما خلود فكان لو فستانها زيتوني ... المهم خلصنا و ريحنا عمرنا...مرينا نشتري اكسسوارات ...و بالمره مرت خلود محلات الاطفال ..تشتري بدله حق جسوم ... و انا شليت فستان عيبني شريته لـ مهره بنت عزه ...
خلصنا ع اذان العصر...كان عمور يمشي معانا خطوه خطوه ..زين زين طلع يعتمد عليه ...صلينا العصر .. و ردينا ..ابصراحه كانت الطلعه وايد حلوه... ضربت عصفورين بحجر.. بس يا رب عمور يغير رايه و يفكر بخوله كـ زوجه مب كـ أخت ....

......فـ يوم الخميس ...ساعدت عمور بترتيب شنطته لانه طالع بوظبي..ويا الشباب و بيكون الجمعه سباق التجديف...طلب مني اروح ارقد بيت خالوه مريم..انا رفضت لاني خفت يكون فارس هناك بس أكد لي انه بيكون فـ بوظبي يطالع السباق ...
نوره: انا دوم ارقد ابروحي بالشقه و انت ما ترجع الا ع الفير شو تفرق..
عمور: يصكر شنطته: الحينه غير بكون بعيد فـ بوظبي و بعدين انا مليون مره قلتلج سهرتي كل اتكون جريب من البنايه يالله روحي زهبي روحج ..باجر بترجعين..
نوره: زين بالاول بتصل بـ خوله خلهم يستقبلوني..
عمور: مالت ..
اتصلت بخوله و فاجاتها اني بيي ارقد الليله عندهم ...وصلني عمور بيت خالوه مريم ...
نوره: شدو حيلكم لا تفضحونا ...
عمور: ما عليج بو الابيض دوم فـ المقدمه ..
نوره: بنجـوف ع هالتدريب كل يوم شو بيطلع لكم..
عمور: دعواتكم لنا..عاد انتي دعوتج ما توصل السقف
نوره:ههههههههههه الله يوفجك...
نزلت و قبل ما اصكر الباب سمعت عمور يقول لي: نوره...؟؟
نوره: خير..
عمور ابتسم : سلمي ع خوله ...؟؟
ما صدقت اذوني: شو شو قلت ..
عمور: يالله صكر الباب السياره ..
نوره: هههههههه يوصل..

صكرت الباب بقوه من الوناسه سمعت عمور يصرخ: كسر راسج كسرتي الباب
ههههههههههه اشرت له بايدي مع السلامه و دشيت بيت خالوه مريم ...دشيت الصاله و كانت خالوه مريم و خوله يتعشون..
نوره: السلام عليكم...؟؟
_ عليكم السلام..
خالوه مريم: قربي نوره تعشي معانا..
نوره: مشكوره الغاليه تعشيت مع عمور الحينه وقت رقادي
خوله: هههههههه ماشي رقاد اليوم بنسهر...
خالوه مريم: بطوفكن السباق عيل..جان بتسهرون
نوره: ليش ببدا السباق بعد صلاة العصر الا خالي احمد وينه..
خالوه مريم: وييييييه خالج احمد من البارحه مروح بوظبي ماخذ الشاحوف و خليفه من ساعه طلع جنهم بروحون بالباص..
نوره: هي قالي عمور..
خوله: طاعي امايه نوره مستانسه و متحمسه جنها هي بتسابق ..
رقصت حياتي: لا حبيبتي شي مونسني بس ما بقولكن.
خالوه مريم: جنها جافت خطيبها حميد..
نوره +خوله: هههههههههههه

بعد ما خلصوا عشى..دشينا انا و خوله حجرتها ..انسدحت ع الشبريه و هالمره سويت احتياطي..فتحت شنطتي و طلعت زلاغي
خوله: انتي ما تملين من ها خلاص الجو ما صار بارد شرات قبل ..
و انا البس زلاغي: امبلى حتى بالصيف عندي ثلج مب برد..
خوله: عفانا الله
قامت اتشغل الكمبيوتر اما انا انسدحت ع الشبريه: عمور يسلم عليج..
ردت ببرود ما كنت متوقعتنها:: الله يسلمه
نوره: بس !!!
طالعتني: عيل شو تبين اكثر ...؟؟
نوره: ما استانستي..
خوله: ههههههههه ليش استانس..؟؟
نوره: زين ما حسيتي بشعور غريب و انا اقولج عمور يسلم عليج..
طالعتني مستغربه : شعور غريب ..بعد لاء ..
شليت المخده و فريتها : ما عندج قلب..
خوله: ههههههههه انتي اصلا هبله..عمور شرات اخوي لا تقعدين تلمحين..
نوره: زين لو خطبج..
طالعتني: اممممممم تبين تضاربين معاي شرات هاك اليوم.. و بعدين ازعلي ولا اتيين بيتنا بالاسابيع ..
نوره: زين سؤال و بعدين سؤالي منطقي مب شي من الخيال صح ولا لاء
ردت علي بعصبيه: اذا صار هالشي هذيج الساعه ربج يفرجها...
اتغطيت بالحاف: مالت عليج...

ما سمعت منها رد اتخاف اكيد لا تضارب معاي و بعدين اقطعهم شرات ما صار قبل اسابيع بسبب هذيج السباله نهله...فتحت عيوني جفت الساعه ست..نقزت هني ما ينسمع صوت الاذان...قمت اتيدد و صليت الفير و قعد بالكرسي الهزاز اقرا قران..بعد ما خلصت..قعدت اتذكر الكلام الي دار بيني و بين خوله ..اتخيل لو تقدم لها عمور و رفضته ..يا ويلها صج بنجلب عليها هذيج الساعه..جفتها تجلب ع الفراش
بطلت عيونها بالغصب: بندي الليت انتي شو اتسوين ناشه بهالوقت..
ييرت عنها اللحاف: قومي بسج رقااد...قومي صلي ..ع الاقل..
خوله تتجلب: زين زين بقوم...
رديت عليها: بروح اسوي لي حليب و اذا ما قمتي يا ويلج...

و ييرت عنها اللحاف فرتني بالمخده بس زخيتها..و فريتها عليها عفانا الله يوم ترقد ..جنها مب راقده من سنين...طلعت من الصاله و سرت صوب المطبخ الظاهر خالوه للحين راقده ...سويت لي حليب ..دورت كافيه بس ما لقيت...المهم شربت الحليب و خلصت رجعت حجرة خوله جفتها بعدها راقده ...انسدحت حذالها ع الشبريه احاول ارقد بس ما رمت..اخرتها جفت الساعه 11 الضحى..قومت خوله بالغصب ضحكت عليها يوم سمعتها تتحرطم و اتقول لا ترقدين هني مره ثانيه ...
اتفجنا نتغدا و بعد الغدا انروح بيت خالوه عايشه علشان انجوف سباق التجديف ع قناة الامارات الارضيه...اتصل فينا خالي احمد و قال انهم في الشوط الرابع و لون العلم ابيض.و رقم القارب 7..اتريينا السباق بشوق..كنا نحسب كل ثانيه و دقيقه و ساعه ...اخيرا طلع سباق التجديف ..اتخبلت يوم عرفت المعلق حارب السويدي فنان تعليقه و ينقل السباق جنه جداامج .صلينا العصر .. ومن بدا الشوط الثاني ربعنا بيت خالوه عايشه..دشينا الصاله.. و جفنا خالوه عايشه و خلود و محمد و نهله متيمعين صوب التلفزيون..
خالوه مريم: خوزي خلوني اجوف ريلي و ولدي...
خالوه عايشه : يا رب الاول يــــــــــــــــا رب ..
محمد: صعب شوطهم معاهم الصاروخ و الريف وين بيفوزون ...
خوله: ان شاء الله بيفوزون ..
.يلسنا نشرب الشاي ...ما بقى ع الشوط الرابع شي.. و محمد كل شويه يتصل بـ خالي احمد..لانه الوحيد يرمسه هو النوخذه ..
خالي احمد: لا تنسون اتسجلون السبااق ...الحينه بنبدأ يالله في أمان الله
محمد: بالتوفيج..
حسيت برجفه و كاني انا الي اشارك معاهمم. و لاحظت كلنا متوترين .من بدا الشوط الرابع عفدنا صوب التلفزيون ...
نهله: وينهم ما ينجافون ...
محمد طفران من حشرتنا: اسكتوا خلنا نسمع المعلق..
نوره: للحين ما طرا بو الابيض ...
خالوه عايشه شويه و بتصيح: خساره تعبهم..
محمد طفران: اصبروا توه بدا السباااااااق اففففففف محد يتابع مع الحريم ...
خالوه مريم: اتصل بـ فارس هو يتابع هناك اكيد يعرف كم مركزهم..
محمد: زين زين خالوه صبري توه الناس
حطيت ايدي بحلجي: الريف للحين الاول
خالوه مريم اتصيح: الله يوفجهم..
محمد معصب: عيز خالي احمد من يقولهم تدربو وين الحين ما يبينون ...
خوله: هذوو القارب مال منوه يتجدم ...
نهله: جم رقم قاربهم ...؟؟
محمد: سبعه..
صرخت: عيل هم بو الابيض ..جوفهم

صرخنا يوم سمعنا حارب السويدي يقول بو الابيض يتجدم ... تمينا تتناقز .. و انصفق .. و كل وحده اتقول يا رب يارب يطلعون الاول ..طبعا الشاشه ما تقدر تعطيك الصوره الكامله لسباق..حسيت بقلبي يدق بقوه و انا اتخيل عمور علني فداك يا رب تطلع الاول ...اتصل محمد بـ فارس لانه الوحيد الي يقدر يقولنا باي مركز هم ...؟؟
محمد: كم الثالث ....؟؟؟
خلود: اساله منو الاول و الثااني و جم باجي ع السباق...؟؟
ساله محمد فكرر اجابه فارس: ما بجى شي ع النهايه و بو الابيض الحينه ينافس الصاروخ ع المركز الثاني و الريف للحين الاول ....
حطينا ايدينا ع قلوبنا و نحن ندعي فـ سرنا ان بو الابيض ياخذ المركز الاول .. و بلفعل فجاه اتاخر الصاروخ .. و تم و حارب السويدي يصارخ ان الريف و بو الابيض يتنافسون ع المركز الاول.. يلسنا انصارخ و نتناقز حتى خالوه عايشه الي دوم تشتكي من ركبتها شاركتنا.. و محمد بس قاعد يضارب و يصارخ علينا يبا يركز بالسباق .يا بروده .. و اخيراا ظهرت المنصه .. و بو الابيض توج المركز الاول...كلنا حطينا عيونا بالشاشه...
صرخت خوله: ابوي جوفوا ابوي ...رفع العلم ...
و انا بعيوني ادور عمور: صرخت جوفوا عمور .. جفته من الوناسه نقز في البحر.. و معاه جم واحد...
نهله: هذا حميد لابس فانيله..
محمد: يغطي كرشته..
ضربته خالوه عايشه: بتاكل ولدي صل ع النبي ...

بس شويه كل الشباب الي بالقوارب عفدوا البحر من الوناسه...الا خالي احمد ...شويه و اتصل فارس يخبر محمد و يأكد له ان بو الابيض طلع الاول ...اتريينا لحظات التتويج.. و كان الشيخ سلطان بن زايد امزين الحضور بوجوده.. و يلس يكرم الاواائل.. و صارخنا يوم ظهر خالي احمد يسلم بالشيخ سلطان و عطاه درع القارب من ذهب..قعدنا انغني و نترقص ..انتصرنا و الناصر الله عاااشووو ..اتنصرنا و الناصر الله .ايووااااا
.صج حسيت اليوم بشعور جميل ..

و اكيد الكل يشاركني بهاي الوناسه..يستاهل بو الابيض هالمركز.. يستاهل خالي احمد و حميد و خليفه و عمور يستاهلووون ...بجت لحظه وناستنا الصجيه يوم يرجوع راس الخيمه و هم رافعين الراس ..كلنا ننظر اللحظه الي بنورون فيها راس الخيمه ..ترجينا محمد ياخذنا معاه في السياره نشارك بالمسيره و خاصه ان سيارته عاكس..
خساره ما ييبت سيارتي ..بس محمد عنيد ما رضى..ترجينااه..حتى خالوه عايشه كانت شويه و بتصيح عليه بس علشان يرضى ...بالاخير وافق بعد ما ذلنا ذل ...اتصل بـ حميد علشان يخبره متى يوصلون راس الخيمه علشان نطلع بالنسيان مع محمد...تعشينا...و صلينا العشى..

و شويه اتصل فينا محمد يخبرنا نظهر..عااد جوفوا المذله ..خمس دقايق اذا محد طلع بروح عنكم..عفدنا كلنا برع نتريااه .. و خوله شلت معاها كاميرة الفيديووو ...ركبنا النسيان...و خالوه عايشه يلست جدااام محمد..صرنا صوب البوابه و اتفاجانا ان وايد سيايير يتريون بو الابيض..دقايق ..
.ولا نسمع صوت المسيره و الشباب يدقون و يغنون ..اتخبلنا عااد تمنيتن لو يبت سيارتي لاني مب ماخذه راحتي مع محمد ...اتجدمت سياره حميد الي كانت تسحب القارب ووراه سيايير و الباص الي فيه الشباب الي شاركوا في السباق و معاهم خالي احمد...كانوا يغنون يابوووووه يابوووووه شكلهم كان روعه...
دورت عمور..اتذكرت انه طلع بسيارته... لمحت سيارته...جداام و كان معاه واحد...
خالوه مريم: انا ما جفت خليفه اتصلوا فيه..جوفووه
محمد: الله يهدااج خالوه اكيد بيكون وياهم ..

اتصلت خلود بس ما يرد..اتصلنا بـ شيما يمكن اتكون رمسته..قالت لنا انه فـ الباص و مع خالي احمد ...المهم...دشينا في المسيره.. و هذي اول مره بـ حياتي ادش في مسيره شباب ..بس بصراااحه كانت روعه ..
ما توقعت هالكثر بيكون الحضور..الكل كان يلحق سياره حميد لانه يسحب القارب ....
.سمحولي ما اقدر اوصف لكم الموقف...من روعته .
.الي طالع من دريشه السياره و الي شايل علم الامارات..و الي قاعد يرزف بالعصايه من فوق السياره ..اليوم الشباب طلعوا كل حركات الخباااااااااال .. من حقهم بو الابيض طالع الاول ...
ابصرحه هاليوم حسيت كل الي فـ راس الخيمه يشارك في هذي المسيره ..

.حتى الشيخ سمح انهم يصيحون ويلات ع الشارع ...و جريب جمعية الخاصه بالقارب بو الابيض دش حميد ..داخل الجمعيه...بس الباجي تموا ع الشارع و صكروا الشوارع و قاموا بعض الشباب يعبرون عن وناستهم بالويلات الي حرقوا فيها الشوارع حرق..اتخبلت و يلست اصيح يوم جفت سياره عمور معاهم ...بس محمد كان يطمني و يقول عمور يسوي اكثر عن ها شويه ...
ها اليوم مستحيل يروح عن بالي او يغيب من سجل ذكرياتي ...و خاصه انها فرحه شاركت فيها اهالي راس الخيمه ... كافي ان القارب نوخذته خالي احمد و اليريره هم اهلنا و خوانا.. و الاهم من ها كله ان بو الابيض يشيل اسم صاحب الدوله و ها اكبر شرف لنااا ....و تمنيت لهم من كل خاطري ان يتمون ع هالمستوى و الانتصار بكل سباق او مشاركه لهم ...

المساهمات : 350 تاريخ التسجيل : 02/08/2007

":؛.,0.(( الحلقـــــــــــة الخــــــــامســــــــة عـشــــــــــر )).0"؟.,؛،ـ’

"سامحني خطيت وخاني التعبير..سامحني والغلطة بعد ما تصير..عاتبني وبالعتاب أرتاح..عاتبني وريحني وسامحني على التقصير..أعترف أعترف ومستعد أنا احلف..صدقني ماكان قصدي ما كان ودي يا حبيبي نختلف..إعترافي لك ما هو معناته ضعف...إعترافي لك من ذوقي و لطفي"

فتحت عيوني و انا مصدعه البارحه رقدت متاخر رديت ع الساعه 12 فـ ليل..بعد ما ردنا محمد بيت خالوه الساعه 11 مر علي عمور..اتذكر اني هزبته يوم جفته يتخبل بالسياره ...حطيت ايدي ع راسي ..نشيت ادور لي حبة ادوول..اخيرا لقيت لي بلعت الحبه و سرت اشرب ماي ....سويت لي حليب و انا ابتسم ...اتذكر خبال البارحه ..حلو و يا ليت يتكرر هالشي كل مره ...آآآآآآآه هذا سباق التجديف و خلص... و الاسبوع الياي عرس خليفه...يالله ...الحينه بحشروني متى بملج ع حميد لازم الحينه احط حد و انهي كل شي بسني لعبت بـ حميد لعب .. حرام اخليه جي معلق آآآآآآمال ...

مر يومين بـ هدوء و لا جنه من جم يوم كلنا نتخبل بفـوز بو الابيض ..قبل عرس خليفه بيومين صارت المفاجاه الي كنت خايفه منها ...ياني عمور ع وقت العشى قبل ما ارقد ...
عمور: حميد كلمني..
طالعته من غير ما ارد عليه ..
عمور: اكيد تدرين شو يبا ...
نوره: شو..؟؟
عمور: يبا يملج ...
كنت ابا اقوله انا غيرت رايي خلاص ما اباه ...بس شي منعني ..
عمور: شورايج ترا سالفه خطبتج طولت ما تلاحظين..
اتنهدت صج ورطت عمري: انت شو قلته..
عمور: قلته اتريا بعد عرس خليفه ايي هني و اتفج معاه شو رايج ...؟؟
ابتسمت له: زين ما سويت مشغوله انا بعرس خليفه ...
عمور: لا يكون انتي العروس..
فريته بالوساده: لا تستخف دمك..
زخ الوساده و حطها جدامه ونش : تبين شي بظهر ...؟؟
نوره: لااااااع
عمور: الناس اتقول سلامتك..
تثاوبت: فيني رقااااااااااد
عمور: بظهر عن تصرطيني
نوره: ههههههههههه مااصخ...
فج الباب و قبل ما يظهر طالعني: نوره..
نوره: شوه بعد ..........؟؟
ابتسم لي: خلاص انا فكرت و قررت
غمضت عيوني ابا ارقد : شو بعد..؟؟
عمور: بخطب خوله ..
بطل عيوني متفاجاه نشيت اركض صوبه: شو قلت..

بس الطفس ضحك و صكر باب الشقه بويهي...دورت ع موبايلي و اتصلت به ما رد علي اتصلت به مره ثانية
سمعت صوته: شو عندج..
نوره: شو قلت ...؟؟
عمور: يايتنج التفاصيل عقب شويه ..
نوره: شو قصدك !!
عمور: ماشي جلبي ويهج.."وصكر التلفون ابويهي"

صرخت عمووووووووووووور يا السبــــــــــــــــال ..اتمنيت بهذيج اللحظه يطلع لي جناح علشان اطير و اطير و اطييييييييييييييييييييير..بتخبل من الوناسه هالاسبوع احلى اسبوع مر علي ..روعه ...اخيرا عمور فكر يخطب خوله بس يا رب ما يغير رايه ...رن موبايلي جفت المتصل خوله
رديت عليها: ساحره يا الدبه ...
خوله: انتي الدبه و البوتمبه و كل شي ..ليش ما خبرتيني ...
نوره: شووووو!!!
خوله: لا تستهبلين شو يعني اتحطيني تحت الامر الواقع..
نوره: اسمعي ارمسي زين لايي اكفخج
خوله : و الله لو انتي جدامي كنت دستج فـ بطنج..
نوره: لا حول هاليوم ابطوله ممل اتريا اللحظه الي برقد فيهاا و يوم يت هاللحظه كل واحد قام يرمس بالالغاز شو عندج قولي
خوله: ليش ما قلتي لي ان عمور طلبني من ابوي
انصدمت حد يصفعني علشان اصدق اني مب قاعده احلم
خوله: الوووووووووو ارمسي
نوره: متى خطبج عمور..؟؟
خوله حرجت علي: لا تستهبلين مب فايجه لج ..
نوره: قسم بالله توه عمور خبرني بالسالفه حتى قال بخطب خوله ما قال لي خطبتها و خلصت هااااااااااااا علشان جي يقولي يايتنج التفاصيل يقصدج انتي ..شو السالفه..
خوله: شو هالخربطه انتي قاعده اتقصين علي...؟؟
نوره: و الله لاء ..و الله ما عرفت الا الحينه ..خبريني ذليتيني الله يغربلج
خوله: هههههههه
نوره: عيبتج الدعوه
خوله: لا عيبني عمور يوم سوا لج طاف و ما خبرج هههههههه
نوره: ما عليه حسابه عندي بس خبريني بالسالفه يا بروودج
خوله: ماشي بس قبل شويه ابويه يااه و قال لي ان عمور طلبج مني يوم كنا فـ بوظبي ...
نوره: و بعد..؟؟
خوله: ماشي قاله انت متفيج ...
نوره: هههههههه هذا عمور خبله
خوله: هي .المهم ابويه قاله بكلم البنيه بعد ما انخلص من ربشه السباق ... و هذا هو توه قالي السالفه..
نوره: و عمور شدرااه ان ابوج قالج !! مب غريبه ..
خوله: اكيد فارس او خليفه خبرووه ...
نوره: خوله تعالي اصفعيني تعالي كفخيني و الله ما تعرفين اشكثر انا مستانسه..حلم عمري تحقق...
خوله: ههههههه
نوره: اجوفج مستانسه...؟؟موافقه يعني
خوله: عمر ما ينعاب ريال و النعم فيه و اشك اني لو فكرت ارفضه ابوي و فارس و خليفه ما بيرحموني
نوره: و انا وين سرت
خوله: هههههههه صح انتي قبلهم كلهم..
نوره: المهم قلتي خالي انج موافقه ولا لاء ...؟؟
خوله: قلته بفكر
نوره: شششششششششو تفكرين ..حرام عليج روحي قولي انج موافقه...
خوله: شو ما صدقت خبر
نوره: انا الي ما صدقت خبر و الله ..كيف برقد اليوم كيف..عمور طير الرقاد من عيني حسبي الله ع ابليسه
خوله: هههههههه روحي سمي بالرحمن و ارقدي
نوره: بحاول ..بس متى بتردين خبر حق ابوج..
خوله: امممممممم ورا باجر
نوره: لا تستهبلين ورا باجر عرس خليفه..
خوله: ترا باجر عرس الرياايل ورا باجر يكون احسن ...
نوره: زين عيل باجر عندكم انا

خوله: هي تعالي بس من وقت لان ...العرس حذال البيت يعني ما بترومين عقب ادشين ...
نوره: خلاص عيل من الساعه 7 الصبح بيي اقومج..
خوله: زين قلتي بقفل حجرتي
نوره: ههههههههه بنجوف يالله بروح احاول انخمد اخييييييييييييرا لا بركه فيج ولا في عمور خبلتوا فيني
خوله: ايه شو فيج تدعين علينا..
نوره: استغفر الله ..يالله فيمان الله
خوله: مع السلامه ..

فـ اليوم الثاني...طلعت من بيت خالوه عايشه انا و خلود و معاها جسوم و نهله..رايحات بيت خالوه مريم..كنت موجوده الصبح بيت خالوه مريم بس يوم عرفت فارس موجود..غيرت رايي و سرت صوب بيت خالوه عايشه....كنت ندمانه انيي ييت هاليوم هني..خالوه عايشه ما رحمتي متى تبين تملجين..يوم بتملجين جي بنسوي.. و يوم بتعرسين انتي و حميد..كلت فؤادي...حتى حسيت اني بصيح لانها بتغمضني اكثر عن حميد يوم بهون عن الخطبه ..

.المهم انتهزنـاا فرصة صلاة الظهر و روحت الريايييل المسجد ..كانت خيمة موجوده عوده صوب بيت خالوه مريم...دشينا..و ما شاء الله عليهن حريم فريجنا ما قصرن..دشوا المطبخ مع خالوه مريم و عايشه يساعدهن في تجهيز الفاكهة و الشاي و القهوه و يتريون الغداا يوصل من المطعم...

الله اليوم ربشه خليفه بيعرس...يحليلك خلوف ...سرنا صوب حجرة خوله ..اتذكرت سالفه خطبتها من عمور ..حسيت بوناسه..
خلود: اكيد راقده ...؟
رديت عليها: دقي الباب خاطري ابوس هالبنيه و احضنها..
نهله:!!!
طالعتها: لا تستغربين بعدين بتعرفون ليش
دقينا الباب فجت خوله الباب و كانت بترجع ترقد ع الشبريه..بس زخيتها من ايدها وخذتها الحمام و يلست ارشها بالماي و هي اتصارخ ...
خوله: خوزي عني نوره بجتلج..
قلتها: الناس مرتبشين و انتي حضرتج منخمده ..
يلست تمسح ويها : ليش كم الساعه...
نوره: الناس يصلون الظهر.."ضربتها بخدهاا"صحصحي يا ماما..يا العروس...
دزتني و طلعتني من الحمام: راويني عرض اكتافج..
نوره: هههههههههه ما عليج بتييييين بتعيشين معاي في الشقه..
قفلت الباب سمعتها اترد ما فهمت شو قالت..رديت الحجره.
نهله: جني سمعت كلمة عروس ..
اتجتفت: شو بلاج انتي كل شي تبين اتعرفينه..
خلود: شفيج نوره ما قاالت شي مهما كان لا تنسين هاي اخت احم احم ريل المستقبل
ابتسمت لهن: ان شاء الله ..
نهله: يالله اشكثر حميد بيعاني..
حطيت ايدي بخصري: ليش ان شاء الله يعاني
نهله: بس بس بلاج ماكله فلفل ما اروم اقولج شي..
يلست ع الكرسي الهزاز: هي جي ثمني رمستج...
خلود: هههههههه صخن جسوم رقد لا تزعجونه ما فيني ع حشرته..

طلعت خوله من الحمام ...
نهله: محلوه خوله شو السالفه..
نشيت حضنت خوله و بستها ورديت ع نهله: مرتاحه بعد عمري علني فداها ...
خلود: جي خوله وافقتي
خوله: نوره خوزي عني بتخنقيني
فجيت عنها: ان شاء الله اليوم ما انروم انقولج شي
طالعت نهله الي كانت ملامح ويهها جنها علامة تعجب و حركت حيايي اغايضها فصدت عني...
خوله: لا بعدني
نهله: انخطبتي خوله..
قبل ما اترد خوله قاطعتها: مفاجاه نهله ..مفاجأه سبرااااااااااااايز
سمعنا دقت باب فجت خوله باب حجرتها ..
.دشت خالوه مريم بصينية العيش: تعالن تغدن
خلود: امايه كل ها بناكله ...
خالوه مريم: هي...لا تظهرون في الحوي ترا البيت ممزور رياييل ...
_انشاء الله
خلود: ما ييت الفرقه..
خالوه مريم :-العصر يالله تبون شي
خوله: نبا سلطه و ماي..
خالوه مريم: ان شاء الله بنطرش لكن...
نهله: بتييبون فرقه !!
خوله : هي فارس يايب فرقة الحربيه هديه لـ خليفه..
رديت اتطنز: يا حافظ ...
خلود: عيل كيف بنجوفهم!!بنتم قاعدات هني
خوله: بنروح فوق السطح بنطالع شو رايكم...
نوره: زين بعد خوله للحين شي حمام ..
خوله: لااااااااااا وين زماااان الحينه ماشي...

كنت بقولها تذكرين يوم فارس ضربني فوق...بس ما بغيت حد يضحك علي..قعدنا نتغدا كنا انسولف و نتفج منو ياخذنا باجر صالون دبي ...اندق باب الحجرة..
خوله: نوره حبيبتي فجي الباب اكيد امايه يايبه السلطه و الماي...
نشيت رايحه صوب الباب": من الحينه تتأمرين علينا...
خوله: ههههههه علني افدااج بس انتي اجرب وحده للباب ..
فجيت الباب و انا ابتسمت بس بعدين غابت ملامح ويهيي و انا اطالع فارس ايمد اييده لي بصينيه السلطه و الماي...
فارس: شحالج نوره ....؟؟؟
طالعت خوله: تعالي خذي عن اخوج ...

و دشيت داخل صح ادري مب حلوه حركتي بس يا ناس انا ما اطيقه ولا احب اجوف ملامح ويهه او نظراته الشيطاانيه اكرهه..نشت خوله و حسيتها منحرجه...بس طنشت و يلست اكل..
خوله: امايه ما عرفت اطرش غيرك...؟؟
فارس: ابرايه الغاليه..انا رايح ابدل و البس ...
خوله: عقبالك
فارس: تسلمين شحالكن خلود + نهله..
سمعت رد : خلود ابخير ...اما نهله سكتت طالعتها كانت متلومه..الله ياخذج هذي ويها لوووح ..طبعا ليش تستحي من عمرها الي سوته معااه سنين..يمكن يكون عندها شي عاادي..الله يغربلها ...
صكرت خوله الباب : حركتج موليه مب شي نوره ..
رديت عليها من غير ما اطالعها: خليني اتغدا ..
حلفت جان وحده علقت ع الموقف بجلب صينيه العيش فوق راسهن بس زين طلعن يحسن و تمينا ناكل ..بعد الغدا تمينا انسولف و نضحك.. و كل وحده شو بخاطرها كيف اتسوي تسريحاتها و من هالسوالف ...بعد ما صلينا العصر ..نشينا روحنا فوق السطح...نهله و خلود و خوله لبسن عبيهم و شيلتهم ..

احتياط عن حد يجوفهن بس انا تميت بشيلتي ..و فسخت العبايه ...بعد هالقاصر البس عبايه في بيت خالوه...المهم عفدنا فوق ..خذنا زاويه اذا وايقنا منها ما ننجاف..انصدمنا يوم جفنا الرياييل اشكثر...يلست ادور عمور بنظراتي..
خلود: طاعي محمد و حميد لابسين ثوب سوده..
خوله: وينهم أي صوب..
طالعت مكان ما اشرت خلود
نهله: معاهم سيف يسولف صح...
خلود: هي اعتقد..
الجهه الثانيه كان الرييايل منهم خالي احمد و خالي عبدالله و كذا ريال يستقبلون المعازيم... و الجهه الثانيه..جفت عمور و معاه ويه النحس فارس و محمد و حميد و سيف و خليفه كلهم لابسين كنادير سوده وبيدهم خيزرانه..عدا خليفه كان لابس كندوره بيضه و ابيده بشت اسود..
علقت: اونهم متفجين ع اللبس
خوله: حركه
الكل: هههههههههه
نهله:: المعرس وينه !!
خلود: يا ويلي ع المعرس...
يلسوا الرياييل يرزفون..و يدقون...لمحت جابر بس ما قلت خوله..حتى لو خبرتها شو يعني صارت خطيبة عمور..
بصوت واطي: خوله هناك جابر..
خوله: شو ابا فيه ..ما ابا اجوفه..
ابتسمت و استانست من رمستها ...جفت خالي احمد يرزف ويا الجماعه ...عقبها دش عمور
نوره: طاعوا عمور علني فدااه يرزف فديتك و الله ....
خلود:جوفوا فارس قاعد يلعب بالسيف..

صج ابهرنا فارس الي كان يفر السيف فوق في العالي و يمسكه بسهوله..ابصراحه الكل التفت له.. شويه و شارركه سيف ريل نهله...خليفه قعد ع الكنبه الموجوده برع و كانوا يالسين حذاله رياييل توقعنا هذيل الناس المجربين لـ خالي احمد و خالي عبدالله ...العرس كان وايد حـلو..

و طوال فتره العصر كان عمور و حميد يرزفون..اما محمد يدش شويه و يطلع..الي كان اميز الحـفل هذيلا الخمسه الي كانوا لابسين اللون الاسود...حميد كان اكثر واحد لايق عليه اللون لانه وايد ابيضاني...فكان وايد ملفت .....
خوله: وصلت الفرقه..
نوره: بعد شو يوم بأذن المغرب ..
خلود: طاعي نهله هذاك سعيد مزيود شكله وايد غير بالطبيعه
خوله: اصص لا اخبر عليج محمدوووه ...و انتي بعد بنخبر عليج سيف..
نهله: بس اليوم خوله هههههههه

هاه الحينه عرفت ليش قوم عمور اخوي لبسوا اللون الاسود لان الفرقه كانت لابسه ها اللون..اونهم يتحرون اعمارهم من الفرقه مالت عليكم...ضحكوني ابصراحه...نزلنا بعد ما اذان المغرب علشان انصلي و نرجع فوق...بعد ما طلعوا الرييايل من المسيد تيمعوا مره ثانيه منهم في الخيمه و منهم برع ..شويه و غنت الفرقة الحربيه ...و كان شي عجيب ابصراحه فن و ذوق و استعرااض و اداء جميل...

اتمنيت اكون وحده مشاركه للفرقه لو قلت خوله هالرايي بتضحك علي...شي جميل ..الكل انبهر بهالاداء اتيمعوا المعازيم كلهم يطالعون..كانوا مسوين صفين..و شي اربعه ميودين ايد بعض امسوين دايره...و كذا واحد كانوا يولون جريب منهم ..صرخنا مستانسات..يوم جفنا عمور و حميد و محمدوووه و فارس سيف زاخين اييد بعض و قفوا بين الصفين..ابصراحه ما كانوا امبيين ان هذيلا مب من الفرقه ع العكس..كان اداائهم حلو...كانوا بقمة الابدااع...زين زين هالحيوان فكر اييب الفرقه علشان يرتبشون شويه...عقبه وقفوا...
نوره: ليييييييييش خساره..
خوله: يمكن العشاا..
طالعت فارس يحضن واحد و يبوسه.
اشرت: خوله منو ها الي قاعد يسلم ع فارس
خوله: هاه خاله الي فـ بوظبي يحليله يااه العرس ...
خلود: هي خاله .. و معاه ولده اعتقد اسمه فيصل ..

خذه فارس صوب خالي احمد و سلموا ع بعض..و ضيفهم خالي احمد و يلسهم داخل الخيمه..تقريبا كلهم دشوا الخيمه علشان يتعشون.. و قوم عمور قاموا يدشون بيت خالوه مريم علشان ياخذون صواني العشى من الحريم...الله يعينهم قوم خالوه مريم و حريم الفريج غداا و عشى ..صج فقر .. و تعب ...بس مقابل ها ربشه ووناسه ...نزلنا تحت نتعشى ابسرعه ..

.من سمعنا ان الفرقه ردت اتغني..ربعنا فوق..عاد انا موعد رقادي بس نسيت الرراااااقد.. و انا اجوف الفرقه...تربشنا و اتونسنا...رزفت الفرقه كذا اغنيه..عقبها ردوا قوم عمور و دشوا..كل واحد بصوب يرزف..محمد دش بالصف..و عمور و حميد فارس تموا بـ وسط الصف يرزفون...و سيف دش بالصف الثاني...
ابصراحه شي روعه ما ينوصف...متى بيعرس عمور.. و يصير جي بعرسه..طالعت ادور ع المعرس جفته يالس ابمكانه..من قد خليفه مستوي اليوم شيخ ...انت و يا هالبشت...رديت اطالع صوب الفرقه...جفت خالي احمد يسحب فارس.ويعطيه السيف اها يباه يلعب بالسيف...

حميد و عمور زخوا اييد و يلسوا يدورون ابمكانهم...بس ابصراحه ما كان ودي اقولكم لاني منقهره من داخلي بس فارس بعد ما يود السيف لفت الانظار.. قام يسوي حركات جميله...و كنا نشهق يوم يفر السيف فوق بالعالي و يزخه بكل سهوله...العرس كان بكل الوقت ربشه..دق و رزيف و يوله طواال الوقت ..

.عقبها طلعواا قوم عمور و راحوا صوب خليفه..الظاهر حسوا لدمهم.. انهم رازيين ويوهم في الفرقه..بس زادوها حلالا

طالعت الساعه كانت 11 و نص..معقوله مر الوقت من غير ما انحس..نزلنا..بغيت اروح البيت...زين خلود و نهله.. طلعوا من ورا البيت..لحقتهن لان سيارتي كان موقفه حذال بيت خالوه عايشه...اتصلت بـ عمور ما رد علي..اتصل كذا مره ما يرد الهرم مخترش الحينه وين بفتكر فيني ...اتصلت بـ حميد..
حميد: هلا و الله...

نوره: شو هالابدااع احييك ابصراحه..
حميد: وين جفتينا !!
نوره: جفتك و خلاص...سكتوا ابصراحه
حميد: ههههههههه
نوره: امممممممم عمور جدامك..؟
حميد: هي..
نوره: امانه عطه كف ع ويهه
حميد:هههههههههه تبين تجلبين العرس ضرابه شوه..
نوره: اتصل به ما يرد علي السبال ..
سمعته يرمس عمور: وين تلفونك ...؟؟؟سمعت صوت عمور بالسياره ليش !!
رد علي: فـ السياره موبايله..
نوره: عطني ارمسه زين..
عمور: هلا نوره حتى هني لاحقتني..
نوره: تستهبل امخلي موبايلك فـ السياره..
عمور: وين انتي..؟؟
نوره: في بيت خالوه عايشه اباك اطلع سيارتي... و اتوصلني البيت..

عمور: الحينه !! مقدر تمي هني ارقدي..
نوره: لا تنكت ويا ها الكندوره السوده امصدق روحك من فرقه الحربيه ...
عمور:هههههههههههه جبببببببببببببببببببببب
نوره: ههههههههههه و الله
عمور: تتمدحين حميد و تطنزين علي...
نوره: زين تعال طلع سيارتي ...
عمور: بطرش لج حميد يالله..
كنت برد عليه بس سمعت صوت حميد: هلا نوره..
نوره: شو ها اللوث الي عندك...
حميد:ههههههههههه الله يعينج...خلاص انا بيي اطلع سيارتج زين ..ابوي
نوره: ما يخالف..جدامك خليفه..
حميد: تبينه
نوره: ابا ابارك له..
سمعت صوت خليفه: مرحبا
نوره: هلا و الله بالشيخ ...
خليفه:هههههههه و الله شكلي شيخ..
نوره: عييييييل مبروك بو زايد
خليفه: الله يبارك فيج ..عقبالج..
نوره: بعيد الشر
خليفه: شووووووو تعال حميد اسمع
نوره: لا ايه عن تفضحني
خليفه:ههههههه تبين حميد
نوره: مب لازم بس قوله اتريااه ..علشان يطلع سيارتي انا في بيتهم..
خليفه: اوكى الشيخه
نوره: مع السلامه.

المساهمات : 350 تاريخ التسجيل : 02/08/2007

.يااه حميد و عطيته سويج سيارتي..طلع سيارتي من الزحمة الموجوده حذال بيت خالوه مريم و عايشه..عقبها ركبت سيارتي ..ولحقني يوصلني ..مشكور حميد من كل قلبي اشكرك يا ليتني احبك و اقتنع فيك عشان اتكون من نصيبي بس ادريبك اكبر لوتي ..مغازلجي عود..البنات يركضن بدمك ...علشان جي ادري اني ما برتاح معاك....اتنهدت..ضربت له هرن يوم نزلت من سيارتي رايحه الشقه ...مدري متى خلص عرس خليفه...اكيد شباب طول الليل دق و سهر...

اليوم الثاني..خذنا محمد ريل خلود دبي ..فـ البدايه رفضت..بغيت عمور ياخذني علشان اخذ راحتي بس عمور ما رضى اونه تعبان ....سلمت امري لله و رحت مع خلود و محمد و طبعا نهله و خوله معانا ...
طلعنا ع الساعه عشر الصبح..تغدينا في الدرب.. و خلصنا ع العصر ردينا ع طول الصاله ابصراحه كان تعب و الله يعين و يعدي هاليوم ع خير ...ع قد ما كنا مستانسات ع قد ما كنا تعبنات..قمنا بالاستقبال بعد الساعه 8..استقبالنا الناس ..الكل كان يسالني عن ملجتي مع حميد..علشان جي قررت اني انهي موضوعي مع حميد خلال هالايام..بسس بعد ما اضمن خطبة عمور ع خوله رسميا ...

\العرس كان حلـو و فرقه الطيران كانت روعه ربشه الحفل ...و الاروع شيما..كانت صج جميله..طلتها روعه..ابتسامتها العذبه..ابهرتنا ابصراحه...كنت اجوف بكل بنيه بالصاله تتمنى اتكون مكان شيما..حتى اتكون بجمالهاا و روعتها...

دش خليفه...ما شاء الله عليهم ثنائي...مدري حسيت هاليوم وايد يشبه خوله...صح انهم توم بس ما كان فيهم شبه وايد بس اليوم حسيت انه نسخه من خوله...خلود احلى عنهم ...لانه تشبه ابوهاا..مع ان فارس يشبه ابوه بس ما يبين اخوهم بالعكس كل شي غير عنهم حتى انه اجمل عنهم ...و الي يميز فارس.. عيونه يالله عليهن و الرمش ما عليهم كلام و جنها طلعت بس علشان تحمي جمال عيونه ..غير تقاسيم ويه مرات احسه يشبه عيال الشيوخ جماله و هيبته غير طوله جنه يبل شامخ و هالشي الي كان يخوفني منه يوم كنت صغيره...خلص العرس ابسرعه...كنت مصطله ع الاخر..حتى اني ما حسيت بعمري الا و انا راكبه سياره فارس ...
مع خوله الغبيه...طنشت و ما اهتميت منو بيوصلنا ...ع بالي محمد ريل خلود..لان خلود يلست جدام و انا خوله ورااا
بس اتفاجات بنص الدرب يوم سمعت خلود اتقول: فارس جوف جسوم يطالعك...

فارس: ع باله ابوه...
بطلت عيوني حتى انا ع بالي ابو جسوم...قرصت خوله: انتي يا السباله..
خوله:هههههههه شو صحصحتي...
خلود: نوره راقده شوه هههههههه
صديت عنهم اطالع برع متى اوصل بيتي ...الله يغربلك يا عمور ...انقهرت يوم جسوم يصيح يبا فارس يشيله..
خوله: خلووووود عطيه لـ فارس فكينا من حشرته ...
مالت يحليلك جسوم ما اتعرف منو يطلع خالك..جان تمنيت انك ما انولدت...
خوله: نوره ارقدي فـ، بيتنا
رديت عليهاا: مينونه بايعه عمري ...
خلود: جي منوه بياكلج...
رديت متعمده: و الله نهايه الاسبوع يقولون وحوش تسكن في بيت ابوج..
خوله: هههههههه سخيييفه..الحينه فهمت قصدج...
الحمدلله طنش و ما علق ..يدري اني اقصده...خليه يولي ...اتذكرت خطبه خوله
ساسرتها: رديتي خبر ع خالي احمد..
خوله:بنفس النبره: لا ماشي وقت باجر ان شاء الله..
فارس: انا مب موافق...
رديت من غير تفكير : و انت شو يخصك...
خلود : ليش شو بلاه عمور ....؟؟
هز جتوفه: بس من غيـر ليش...
خوله : فارس !!!

حسيت بغيض الحينه انا من متى اخطط و اخرتها ها يخرب علي كل شي ...

رديت: مب كيفك..انت اصلا متى دريت عنهم غير الحينه...
فارس: انتي ما يخصج لا تدخلين...
خوله:بس لاااه ..اسكتوا..فارس لا تصدمني كافي صدمات..
قهرني رد خوله: شو لا تقهرين..انت من صجج بتسمعين كلامه...اصلا هو ماله علاقه..مدري عمي كيف دخله في السالفه ...

خلود : غريب انك غيرت راايك..
فارس: ابوي ولا غيره تعنيني اختك ..و انتي لا تدخلين..
صرخت عليه: انت ما يخصك اطلع من حياتي ...
خوله: بس نوره لا اتحرجين جي...
وقف فارس السياره : انزلي من سيارتي يوم بتتعلمين الادب تعالي اركبي..
منو يتحرا عمرها..كان يتكلم ابرود..خلت الدم يفور في جسمي...ودي اكفخه باي شيء جريب مني...بس طنشته ع باله ما بنزل بيذلني ع هالتوصيله..كنت فج الباب زختني خوله..
بصوت خايف: نوره دخيلج ..فارس لا تستهبل عليها..
رديت عليها بتهديد: هدينـــي
خلود: يسولف معاج نوره شفيج...؟؟
فارس و كانه يكتم ضحكته: لا انا ما اسولف..
خوله: بس فارس ...
فتحت باب السياره سمعته يقول: الله معاج...
صكرت الباب بكل قوتي ...تمنيت انه ينكسر...تحركت ادور تاكسي..بس لاحظت ان فارس تم واقف ابمكانه...شو يتحراني خوافه...شويه نزلت خوله تربع صوبي
يرتني: تعالي اركبي دخيلج لا اتسوين مشاكل..
سحبت ذراعي: هديني ما يخصج فيني ...
خوله بنبرة خوف: كيف بتركبين تاكسي و انتي جي
طالعتها: شو بلاني..متغشيه و ساتره روحي..
خوله: ما اقصد جي انتي تعرفين كم الساعه و يايه من عرس...مينونه..
نوره: اهون عليه من اركب ويا ها الخسف الي قاعد يسوق..
خوله شويه و بتصيح يوم جافتني أأشر ع تاكسي: نوره الله يخليج تعالي الله يخليج..
نوره: ما بركب قلتلج ما بركب سيارته انا مدري وين كان تفكيري يوم ركبت سيارة هالحثاله..."اشرت لتاكسي" ووقف جريب منا اتجدمت اركب..بس زختني خوله ..تترجاني..كنت بحط ريولي داخل التاكسي بس تفاجات فارس يايي صوبنا..و اشر لتاكسي يروح ...

حرجت عليه: منو امرك
فارس: تعالي ركبي السياره كنت اسولف يا الله كيف دمج حـار
خوله: يالله قلتلج كان يسولف..
و انا ماشي كنت احاول اهدي نفسي بس مب رايمه اكرره و اكره حركاته...عاندته و سرت بخطوات بعيده ...
خوله: نوره بس عاد...
نوره:بتصل باخوي عمور اييني...
تم فارس واقف ابمكانه سمعت خوله اتقولي: نوره متى بييج عمور يالله تعالي اركبي ..
نوره: اسفه روحي خلي هالحثاله يوصلج شو تبين فيني..
فارس شكله طفر: تعالي خوله خليها تنقع ..
خوله متضايجه: فارس بس عاد اسكت عنها..انا ما اصدقت اهديها شويه...
فارس خذ نفس طويل: اوكى يالله هديها متى بتخلصون الفير ...؟؟؟
خوله: نوره اترجاااااااااجج و الله اترجاج اتيين تركبين السياره..
غمضتني خوله..فديتج و الله كنت بغير رايي بس جفت فارس يطالعني فعاندت..
خوله: دخيلج نوره !!
اتجتفت: بالاول خلي اخوج يعتذر لي ..
فارس: نعم ..عيل خوله تمي معاها هني انا رايح.."ومشى صوب سيارته"
وقف يوم زقرته خوله: فارس كيف اتخليني بالشارع بها الوقت ...
فارس: تعالي زين خليها ادق لاخوها يوصلهااا
يا كرهي لك الود ودي افسخ انعالي و اكفخه لي ما اتعب ...اتجدم منا ابصراحه خفت بس بعدين غلبني عنادي رفعت راسي بكل كبرياء و صديت الصوب الثاني ...
خوله: فارس لا اتزيد الطين بله كافي الي قاعد يصير ..
اتوقعت اييرني من مكاني و يعقني داخل السياره بس تفاجات يوم همس: انا اسف نوره
حسيت برجفه و كان هواا بارد لفحني..ما صدقت اذوني طالعته مستغربه...
خوله: يالله ارتحي يالله طوفي السياره..

يرتني خوله من غير ما اتكلم ولا كلمه و كاني مسحوره ....كنت بعالم ثاني ..همسة فارس و اعتذاره معقوله ها الحيوان ينزل مستواه و يعتذر لي..زين المهم غلبته و علشان يتادب...تمينا ساكتين لي ما وصلنا الشقه نزلت من غير ما اودعهم...ع طول من دخلت شقتي .اتغسلت و بدلت ملابسي لبست زلاغي و انخمدت ..ما ابا افكر بشي حتى بعرس خليفه و شيما ...فتحت عيوني ع صوت الاذان ..الفير نشيت سرت صوب حجرة عمور جفته راقد زين ياي من وقت...رحت اتيددد و اصلي و بعد ما خلصت قراية القران...رجعت ارقد حاولت اتجلب و اتجلب بس ما قدرت...خايفه ان فارس صج رفض عمور...لالا ما اظن يمكن كان يبا يغايضني ..

اسلوبه و بروده يدل ع ها الشي..يا كرهي لك..يا ويلك لو وقفت بويه خطوبه عمور و خوله صج ما برحمك...بالاول كان ممكن عمور ما يخطب خوله مب مشكله لكن بعد ما ابعدت جابر عن طريجها و حرمتها من نصيبها صار لازم و شي اساسي اعوضها لاني انا السبب ...
بعد يومين دش علي عمور طاير من الوناسه لان خالي احمد رد علبيه خبر بان خوله موافقه ...انا كنت اعرف قبله بس حبيت يتفاجا ابروحه ...كنت مرتاحه و فرحانه من الخاطر لاني جفت عمور مستانس..و طاير من الوناسه ...حضنته و بسته ابارك له ..
عمور: يالله عااد حميد حشرني يبا يملج ...
نوره: .................." ماشي رد"
عمور: هههههههه خالي احمد قال لو تبا تملج اليوم انا راضي..
نوره: هههههههههه
عمور: حميد كان موجود علشان جي تخبل ..يبا يملج هالخميس..
تروعت: شو هالخميس وايد جريب..
طالعني عمور بنظرات: شو جريب من متى انتي مخطوبه الحينه..يالله ملجي..انا جربت دورتي باخذ خوله معاي و بسافر..
عفدت صوبه: و انا بتخليني لـ منوه ..
وقف بعد ما رن موبايله و ابتسم: لـ حميد...ها متصل فيني ..شو اقوله الخميس !!خلاص..
رديت ابسرعه: لا لا شو الخميس خلاص..بالاول خليه ايي هني اتفج معاه..

هز عمور راسه: انتي اسميج بلوه الله يعينه ..
نوره:هههههههه خليه ايي فـ ليل ..
عمور فج باب الشقه يبا يظهر و جنه بيرمس حميد برع: اوكى ما يهمج ...
يلست ع الكنبه و انا بموت من الصياح...عمور يبا ياخذ خوله برع و انا اتم هني...انا ما ابا حمييييييييييييد محد راضي يفهمني ليش ... ..ها سبب ثاني يخليني ارفض حميد علشان اروح مع عمور و خوله...ما ابا حميد..ركضت حجرتي اصيح...اتصلت بـ خوله ...
خوله: هلا نوره شحالج..؟
رديت و انا امش دموعي: مضايجه...؟؟
خوله: شو فيج نوره قاعده تصيحين شوه ....؟؟؟
رديت عليها: ما اباااااااا حميد ما ابااااااااه
خوله: ليش شو مستوي...؟؟
قلتها: عمور يباني املج هالخميس انتي بس اتعرفين موقفي شو اسوي
خوله: قلتلج من البدايه لا تلعبين بالنار ما سمعتي رمستي..
هاغبيه ما تدري انا ليش سويت كل ها علشانها و عشان عمور سكت ما رديت عليها..
خوله: شو تبيني اسوي لج نوره انا حاضره...
خفت لا تدخل خوله بالسالفه و تأثر ع خطبتها لـ عمور علشان جي طلبت انها ما تدخل و صكرت بويها..انا اصلا ليش اصيح محد له حق يزوجني غصب ...نشيت اسوي لي شي اكله...عقبما صليت العشى..لبست و لبست الدبله...يلست اتاملها و اطالعها...شويه اتصل بي عمور ...
نوره: هاااااا
عمور: شو ها لها الدرجه مرتبكه...
ما كان لي نفس ع ثجل دم عمور: شو تباا
عمور: حميد ترا بتعشى معانا ..
نوره: ها متفيج..
عمور: شو متفيج استحي ع ويهج يا الزطيه..
نوره: اففففففففففففف
عمور: ههههههههه كل البنات جي يرتبكون يوم يصيرون عرايس
نوره: هي جي شو تبا بعد...
عمور: ماشي خلج انتي يا الاميره...انا بييب عشى من المطعم..
نوره: احسن بعد..
وصكرت الخط ابويهه متفيج...قاعد ينكت .. و انا ابا افكر شو اقول لـ حميد...و كيف افسخ خطبتي منه...يلست افكر لي ما دش عمور يقول لي حميد داخل ..ارتبكت..شويه ..و ليش ارتبك ..منو يطبع حميد علشان يربكني جي..شجعت عمري بها الكلمتين ...و طلعت من الحجره جفت حميد قاعد و محطي جدامه باقة ورد حمره يتني الضحكه شو يتحرا عمره فـ فلم هندي..بس الريال كاشخ امصدق روحه ...
عمور: حيا الله بـ حميد..
حميد: الله يحييييييك..شحالج نوره..
طالعت عمور و رديت عليه: بخير ...
نشيت رايحه المطبخ علشان اضيفه..عمور ويه لووح عادي ما يشرب الريال أي شي..سويت عصير كنت اسمع سوالفهم..كانوا يرمسون عن عرس خليفه..ما ملـوا !!! لاحظت ان عمور ما ياب عشى بفضحنا هاه..زقرته..
عمور مبتسم: ها العروس شو تبين...؟؟
نوره: وين العشى !!
عمور:هههههههه تعشينا برع مع الشباب
نوره: و ما سويت حسابي
عمور :قلتي ما تبين !!
نوره: زين انجلع ويا ويهك..
عمور: شدي حيلج هاه...
ضربته و دزيته برع المطبخ...
عمور: ههههههههههه
طلعت من المطبخ عطيت حميد عصير و عطيت عمور ..شكل عمور مستانس اكثر عن حميد...يلست ..مجابله حميد و ع يساري عمور قاعد... و جفت باقة الورد محطوطه ع الطاوله ..شكلها حلو..طلع راعي ذوق حميدااااااااان
عمور: هـا نوره ما قلتي متى تبين الملجه...؟ترا حميد مستعيل..
الله يغربلك يا عمور الرزه..يلست العب باصابعي مرتبكه اخ لو اطير بكس من هني لـ ويه عمور ...
حميد: انا ما عندي أي وقت تبين..انا حاضر ...؟؟
عمور: بس الخطبه طولت ولا انت شو رايك...؟؟
حميد: ابرايه المهم نوره شو تبا ...
طالعني عمور: ها شو تبين...
وقفت..و اتجدمت من الطاوله و انا ارتجف..فسخت الدبله و حطيتها ع الباقه
و قلت بصوت مبحوح : انا غيرت رايي ما اباااااك حميد..

المساهمات : 350 تاريخ التسجيل : 02/08/2007

.,؛"،‘((الحـلقــــــــة الســـــــادســـــة عـشــــــــــر))‘،"؛,.
"احرموني منك وأنت اللي رضيت ... يا خسارة كيف صدقت الدعاوي”أعذرك وأنساك بعد اليوم ناوي
ما ألومك لو على صوب دارك ما خطت رجلي خطاوي. أوعدك وعدٍ على عمري قضيت" ...

ربعت داخل حجرتي و قفلت ع الباب ادري عمور الحينه بلحقني و بكسر الباب ...يلست اصيح من الخاطر..حرام الي سويته بحميد..حراام بس شسوي ما اباااااااااه ...حسيت بلحظه هدوء..بس بعدين تروعت يوم حسيت عمور بكسر باب الحجره ع راسي /: افتحي الباب يا الحيوانه افتحي..
صرخت: ما ابا ..
عمور كان محرج: فتحــــــــــــي الباب ...اقولج و الله اكسره فضحتينــــــــــا
يلست اصرخ باعلى صوتي: ما اباااااااااااه انا ما ابـــــــــــــــــــــا..مب ع كيفك تجبرني
رفس الباب عمور: فتحي الباب ...
نوره: ما بفتح ولا باعلى خيلك اركبه ...
عمور: ماعليه نوره انا اراويج و باجر باخذج المحكمه بسحبج من شعرج..
يلست اتنقز ابمكاني شرات المينونه و اضرب ويهي و اصرخ: ما ابا ما ابا ...

وطيحت عمري ع الشبريه..اول مره اصيح هالكثر ليش ما ادري..هل هو خوف من عمور.. او من الفضيحه.. او من شي ثاني مدري ...غلقت موبايلي ادري الكل بتصل بي يوم بتنتشر السالفه...حسيت بالبروده ...اتغطيت و انخمدت حسبت كل شي بمر بسهوله..بس الظاهر ان الموضوع بيصير عود و كبير ...

ايااااااام كنت اتجنب عمور ما كنت اخليه يجوفني علشان ما يحتشر علي..اخر زمن صرت اخاف من عمور..المهم ..حتى بيت خالوه مريم و عايشه بقطعهم فتره لي ما ينسون شويه و ما اظن هالشي ينتسى...كانت خوله ادق كنت ما ارد عليها..اتوقعتها تنقز هني بس بعد ما ييت..يمكن تعرف ان حالتي النفسيه تعبانه ....وصلني مسج من حميد "ليش سويتي جي انا شو عيبي علشان ما تبيني" مسحت المسج..متفيج هاه ...كافي المشاكل الي بتصير ابسببك...فتحت باب شقتي هلكانه من التعب..اتفأجات عمور قاعد ع الكنبه و الظاهر كان يترياني و هذا اول لقاء بينا من بعد هذيج الليله ..طنشته كنت بسير داخل بس وقف بويهي حسيت بالرجفه..بكل جسمي..لحظه و انا ليش ارتجف عمور شو يخصه بحياتي انا ع كيفي اختار الي اختاره ...حياتي و انا حره فيها ...علشان جي طالعته بعناد..يرني و يلسني ع الكنبه بعصبيه ...شهقت بس مسكت روحي علشان ما ارد عليه ..
عمور: ليش سويتي جي...
نوره: شو سويت ..حرام الوحده اتغير رايها..
عمور و كانه ماسك اعصابه: زين ما تبين الريال خبريني و انا اقوله حق شو اتخليني اعزمه في بيتي و اهنيه بهاي الطريقه..
نوره: هذي حياتي و انا حره فيها..
صرخ علي: و هاي السوالف مب لعبان وقت ما تبين و قت ما ترفضين مب كيفج ...
رديت عليه و انا احاول احافظ ع هدوئي: خلاص انزين انتهت السالفه...
رد علي بعصبيه: منو قالج انتهت السالفه.. انا مب رايم اجابل خالوه عايشه بسببج شو اقولها ...
صرخت عليه: اوووووووه و انت شو يخصك..
رد علي و صرخ: شو شو يخصني ترا من نحاستي طلعتي اختي فـ دنيا...
حرجت عليه: شو يعني ..انا مسوده ويهك...
رد علي بنفس الاسوب: عيل شو تتوقعين هاه ...تحسبين ممكن الي سويته ما يأثر ع خطبتي ع خوله...

طالعته مب مصدقتنه شو علاقه قوم خالوه مريم بـ خالوه عايشه...
اتجدم مني و صك ع اسنانه: يا ويلج و الله يا ويلج اذا خالي احمد ..ردني..بتسودين ويهي جدام الناس..
صديت الصوب الثاني منحرجه: خالي احمد ما بسويها...
يلس عمور ع الكنبه و كانه تعب: حميد رد يكلمني يبااااااااااج...
وقفت رايحه حجرتي: انا ما اباااااااااااه...
دشيت حجرتي كنت بقفل الباب بس دزه عمور فرجعت لي ما وصلت شبريتي : مب كيفك تجبرني..
صرخ علي: امبلى كيفي و الاسبوع الياي بتملجين..
صرخت و انا اصيح: ما اباا ما ابا حميد...
رد علي بعصبيه: ليش ليش...ما تبينه عطيني سبب مقنع...؟؟
نوره: راعي بنات و مغازلجي عود...
عمور : هههههههه كل الشباب جي ...
رديت و انا اصيح ..: حميد غييير ...
رد عمور بعصبيه خوفتني: شو غير..الريال يباج مستعد يسوي أي شي علشان توافقين ..
يلست ع شبريتي انا ميته من الصياح: ما ابااه ما ابااه....ها ما عنده كراامه ...مب ريال..
اتجدم مني عمور و زخني من رقبتي..هذي اول مره بالتاريخ تستوي عمور يمد ايده علي .للحظه غمضت عيوني اليوم بنخمد فـ القبر ..حاولت ابلع ريجي بس ما رمت..عمور زاخني بالقو...
غمضت عيوني و انا اصيح منوه بساعدني الحينه ...؟؟؟ يلست اضرب ايده علشان يفج عني ...بس و كاني اضرب صخر ماشي احساس ...
سمعته يقولي : بتزوجين حميد غصبن عنج..محد قالج اتوافقين..ع بالج محد وراج يوقفج عند حدج...و يلس يهزني يتزوجينه ولا لاء..

تميت ساكته مستحيل اوافق لو تموت ...تضربني علشان حميد..اكرررررررهك عمور..انت ما فيك خير... اموت اهون علي دام انك اتفضل علي اهلك تراضيهم و تبا تجتلني علشان ترضيهم..لو تموت ما برد عليك لا هي او لاء..تميت ساكته ...حسيت اني خلاص بموت...يلست اشاهق..هدني عمور و عقني ع الشبريه..حطيت ايدي ع رقبتي احاول اتنفس طبيعي يلست اصيح.. حيوان ما فيك ذرة رحمه ..
هددني: عندج اليوم بس اتردين علي بموافقتج ...بس اليوم ...

و طلع من حجرتي..اول مره اجوف عمور جي وحش..من غير تفكير..شليت شنطتي و سويج سيارتي.. وربعت تحت رايحه بيت خالوه مريم..مستحيل اتم مع هالخنزير لحظه وحده...بخبر عليه خالي احمد...يعله ما تزوج خوله..احسن خوله ما تستاهل هالاشكال..وصلت بيت خالوه مريم...دشيت..لهم و انا ميته من الصيااح..تفاجأوا فيني داشه عليهم اصيح بصوت عالي...كانوا يتغدون...نقزو كلهم...خالي احمد و خالوه مريم و خوله...الحمدلله فارس محد..طحت ع الارض اصيح..منهاره للحظه حسيت ان محد لي بالدنيا غير...قوم خالوه مريم...حضنتني خالوه مريم :شو فيج نوره شو فيج...
طالعتها و انا اصيح: عمور يبا يجتلني..
جفت خوله اتصيح من جافت جي حالتي..
حاولت خالوه اتهديني يريت شيلتي اراويها رقبتي مكان زاخني عمور: جوفي شو سوا فيني يبا يخنقني...
حطت خوله ايدها ع حلجها يوم جافت رقبتي...
خالوه مريم: حسبي الله و نعم الوكيل..
خالي احمد: ليش سو فيج ليش يمد ايده عليج..
كملت و انا اصيح عاد منوه يسكتني يوم اصيح: يبا يزوجني غصب يباني اتزوج حميد غصب ...
هز راسه خالي احمد: لا حول ولا قوة الا بالله...
كملت كلامي و انا اتقطع من الصياح: انا مستحيل اتم معاه بجتلني بس علشان يرضي قوم خالوه عايشه..
خالوه مريم: لا حول ولا قوة الا بالله الزوواج بالغصب شوه ...
خالي احمد: مب من حقه...مريم خذي البنيه داخل شكلها تعبانه ...

المساهمات : 350 تاريخ التسجيل : 02/08/2007

يرتني خالوه مريم و ساعدتها خوله ..صوب حجرة خوله.. و رقدتني ع الشبريه..ياني احساس و شعور بالامااااان....طلعت خالوه مريم اترمس خالوه عايشه الظاهر السالفه كبرت ر.. و انا بييتي بيت خالوه مريم..عطيت السالفه حجم اكبر ...يلست معاي خوله..مب ناقصتنج انتي و نصايحج صخي عني...
سمعتها اتقولي: فديتج نوره..ما يسواج عمور..
يلست اصيح..مسحت دموعي و يلست تحضني ...اتصدقون اني رقدت!!! من متى انا ارقد الظهر...المهم اني رقدت.. ما حسيت الا خالوه مريم اتقومني..تباني اكل...كان وقت العصر ...حسيت ان مالي نفس ..بس من طاحت لقمه في حلجي يلست اكل و جني مب جايفه خير ...
سالت خالوه: وين خوله !!
خالوه مريم: راحت اتجوف خلود بيت خالتج.."سالتني" شو اتحسين الحينه اهون
هزيت راسي بمعنى هي: الحمدلله ارتحت...
خالوه مريم: ليش ما تبين حميد..؟؟
طالعتها فردت علي تضحك:هههههههه لا تحاتين ما بقنعج ولا بسوي فيج شرات ما سوا عمور بس بغيت اعرف السبب
جذبت عليها: حميد راعي سوالف و بنات..رغم ها وافقت عليه.. عقب من يومين جفته مواعد وحده يتجابل معاها قولي خالوه بذمتج الوحده بتقبل اتزوج واحد شرات حميد..
خالوه مريم: مسود الويه..انا الحينه بمنعج لو وافقتي عليه مثل هالشباب محد يأمن عليهم؟؟؟
سالتها: اخاف خالي احمد يغير رايه و يرد عمور عقب ما سوا فيني جي...
خالوه مريم:هههههههه لا ما بيرده بس رمس عمور و عطاه جم كلمه
استانست: شو قاله..
خالوه مريم: سمعته يفاتن عليه..و قاله مالك حق اتمد ايدك ع نوره دام انا و خالتك عاييشين..
نوره: دواه جان ضربه بعد..
خالوه مريم:هههههههههه
نوره: هو سوا كل ها علشان خاف ان قوم خالوه عايشه يلومونه و بعد خاف خالي احمد يرده..
خالوه مريم: اخوج تخبل شو يخص خطبتج بـ خطبته..
شربت ماي: حيوان اساليه...
دشت علينا خوله...و اتفاجات ان خالوه عايشه معاها ...اتلومت منها بس سلمت علي..الظاهر ام لسان خوله خبرتها السالفه ...
خالوه عايشه: شحالج الحينه نوره..
هزيت راسي اوني تعبانه: الحمدلله احسن..
خالوه عايشه: اخوج تخبل من متى نحن نجبر بناتنا ع الزواج..
تميت ساكته..................."اوني تعبانه و احاول اعصر عيوني علشان اصيح بس مب راضيه الدمعه تنزل الله يغربلهاا"
خالوه عايشه: ما تبين حميد كل شي نصيب..لا ولدي يعيبه شي ولا انتي يعيبج شي ما فيها شي يمه..
حضنتها لان غمضتني و يلست اصيح هالمره صج: عمور بغى يجتلني..
خالوه عايشه: مسود ويه ما يستحي...
رديت عليها: متلوم منكم علشان جي حاول يجبرني..كنت بموت"ورديت اصيح

حضتني خالوه عايشه اتخفف عني استانست كل شي انجلب لصالحي..ما غلطت يوم ييت بيت خالوه مريم..احسن خليهم كلهم يلومونه ...
خالوه عايشه: خلاص لا اتصيحين..انا قلتلج قبل انتي شرات بنتي... و اذا ما تبين حميد محد بغصبج عليه ...
طالعت خوله و ابتسمت لها..وردت لي الابتسامه ...مر هاليوم.. و قررت اني ارقد بيت خالوه مريم مالي خلق اروح الشقه..الحمدلله الحمدلله..ان خالوه عايشه اتفهمت موقفي و زين انها ما سالت ليش ما ابا ولدها..عاد ما فيني اجذب عليها شرات ما جذبت ع خالوه مريم...ع الفير طلعت من بيت خالوه مريم.ما حست فيني خوله كانت راقده ...سرت شقتي بدلت ملابسي.. و رحت الدوام..زين اني ما جفت ويه النحـس هالخنزير ...

يلست ع مكتبي اقص كروت لناس..حاولت اشغل نفسي...مليت ..حسيت بالغصه..نوف تزوجت و راحت عني...تذكرت ان خوله هني تدرب بس بالطابق الرابع فوق...و ممنوع انها تظهر من القسم..فكرت اروح لها بس خفت اسوي لها مشاكل ....الشهر ياي حفلة تخرجها تستاهل ..الحمدلله الله وفقها بالتخرج و الخطبه من ها التعبان..خلص دوامي..اتصلت بـ خوله اعزمها ع الغداا بالمنار..وافقت ...مريت عليها صوب قسم الطواري...
خوله: محد خليفه جان بيي معانا..
نوره: متى بردون ..من شهر العسل..
خوله: مدري يوم سالته امايه قال بعدنا بنتاخر...
نوره: وين هم راييحين...؟؟
خوله: ماليزيا ...شفيج ما تدرين..
نوره: بعد الموقف الي صار مع اخوج التيس نسيت كل شي عن عرس خليفه و ما حبيت اعرف شي..
خوله: الله يهداج انتي دوم اتحطين راسج براسه..
نوره: نعــــــــــــــــم .. لا تقعدين ادافعين عنه زين..انتي اكيد لاحظتي انه كان يستفزني..
خوله: زين خلاص غيري الموضوع..
نوره: شو تبين انسولف عن ها التيس التعبان..الثاني
خوله: هههههههههههههههه انجلبتي عليه..
نوره: يولي بس تدرين ما توقعت السالفه بتجلب لصالحي..حسبت خالوه عايشه بتقوم الدنيا و بتيلسها...
خوله: لا بالعكس انا ما توقعت لها جي.

وصلنا المنار..بركنت السياره...طلبنا لنا غداا ..و تغدينا.. زين فاضي..و ماشي ناس واايد..
سالتها: متى بتملجين...؟؟
ردت علي: عند اخوج الجواب..
قلتها: تدرين هو سوا سالفته معاي لانه كان خايف ان ابوج يرده ..
خوله: بس رفضج ماله علاقه بخطبتنا...
نوره: روحي اسليه هالتعبان مدري كيف يفكر ..اكرررررهه
خوله: يمه منج يوم تتحولين شريره ...
نوره:هههههههه خفتي مني..
خوله: ادريبج انتي مستحيل اضريني
نوره: علني فدااج..محد فاهمني غيرج ..
خوله: شكرااا
خلصنا...وصلتها بيت خالوه مريم.. ورجعت بيتنا..دشيت الشقه يوم أذن العصر ...صليت.. بعد ما بدلت ملابسي...يلست في الصاله اطالع التلفزيون..زين غيرت جو احس نفسيتي تحسنت ابوايد...
و قبل ما ياذن المغرب دش عمور الشقه..سويت عمري مب مهتمه ...
جافني : ارتحي سويتي لي مشاكل و رديتي...
فريت الرموت من ايدي من غير ما اطالعه و رحت حجرتي بس الذبابه لحقني ...قلت بقول اطلع برع حجرتي بس طنشته ..
عمور: ليش سويتي جي..
طالعته باحتقار ما اتوب : ما يخصك فيني...اطلع من حجرتي
بس دش حجرتي و يلس ع الشبريه: و الله كل الي سويته علشانج...باجر انا بسافر منوه بتم معاج..
رديت عليه: علشان جي تبا اتلصقني باي واحد ..
اتنهد: مب انتي الي وافقتي عليه..
رديت بعناد: و غيرت رايي ..

نش من مكانه بصراحه خفت لا يضربني غمضت عيوني يوم رفع ايده بس فاجاني حضني و باسني ع راسي..
طالعته فقالي: انا اسف الظاهر البارحه مصختها معاج ...
ابتسمت له: بسافر معاك انت و خوله..
رد علي و كانه يتطنز علي: هي بتسافرين معاي ..
و طلع من حجرتي ..فريت بعمري ع الشبريه مستانسه ها الي انا ابااه ...اتم معاك انت و خوله ...ضرب و لقيت و رمسه و حصلتها بس اخر شي حصلت الي اباااااااه...شي ممتع و حلو..كل شي تبينه يتحقق بسهوله او بصعوبه...
بها اليوم كان تخرج خوله بس للاسف ما حضرته لاني كنت اعاني من الحمى..بس هي ما قصرت وصفت لي كل شي ع العموم باركت لها...و اتفاجات عمور يايب اسويره ذهب هديه ..لـ خوله بمناسبة تخرجها..شي جميل ...سرت بيت خالوه مريم ...كان البيت فاضي كالعاده... بس خوله كانت موجوده..دشيت عليها بستها و باركت لها ع التخرج...
قلتها: غمضي عينج..
غمضت قدمت لها الهديه الي كانت امغلفه...مسكينه كانت اتحسب الهديه مني حضنتي و باستني...
و قالت لي: انتي اول وحده اتييبين لي هديه التخرج..
قلتهاا: افتحيها و قوليني شو رايج فيهاا ..
فتحتها ابسرعه و كانها خايفه ان الهديه اطير عنها ..شهقت يوم جافت الاسويره عيبتها ...حضنتي مره ثانيه
خوله: مشكوره مششششششششكوره نوره ..
نوره: ههههههههه مب انا ..
طالعتني خوله ضحكت عليها من نظرات ويها : هذي من عمور ..
خوله بصوت واطي: جذابه..
نوره: ههههههههههه قسم بالله ...
ضربتني ع جتفي و نشت من مكانها متلومه: حركتج بايخه..
حطيت ايدي ع بطني و انا ميته من الضحك..ههههه هههههه هههههههه هههههههههه
خوله: بس اسكتي ما يضحك لها الدرجه.
نوره: هديتي بعدها ما وصلت..تعالي بخبرج شو الهديه الثانيه !!
خوله: شوه !!
نوره: اليوم شوه...؟؟
خوله: الاربعاء..
شهقت: هي صح الاربعاء اخوج الحثاله هني..
ابتسمت لي : متفيجه انتي خبريني شو سالفتج..
نوره: بالاول هني..اخوج..؟؟
خوله: هزت راسها لا مب هني رايح مطار راس دبي اييب خليفه و شيما..
انصدمت: خليفه ياي اليوم..
خوله: ما تدرين شو..
حرجت عليهاا: محد قالي .. زين المهم باجر عمور بيي و بييييييييب المهر يا ويلي خوله اخيرا بتكونين حرم عمر ال.......
خوله: قولي و الله بها السرعه
نوره: أي سرعه من شهر انتي مخطوبه اممممممم لا يكون بسوين سواتي و بتغييرين رايج و الله اجتلج..
خوله: لا طبعا ما بسويها شو تتحرين شراتج..
نوره: هي ع بالي...المهم خوله من يكون عندج المهر خبريني علشان نطلع نتسوق
خوله:ليش !!
نوره: شو ليش ما تبين تزهبين و بعدين بنسافر مع عمور بالخارج..
صرخت خوله مستانسه: بتسافرين معانا ..
نوره: عيل بتم مع منوه..
حضنتي خوله : موليه ما بنفترق انا و انتي ...
حسيت ان خوله مستانسه و مرتاحه الله يديم عليج..حتى انا كنت احس بنفس شعورها..فكرت اتم لي ما يوصلون قوم خليفه..بس غيرت رايي لان فارس بيكون موجود...رجعت شقتي ..ع اذان المغرب ..جفت عمور يترياني ...
نوره: خير !!
عمور: عطيتها الهديه..
ابتسمت له: هي استانست وايد
عمور: عيبتها؟؟
نوره: واايد..تدري ان خليفه اليوم بيرجع من السفر ..
عمور: هي علشان جي قلت باجر بنحدد الملجه بوجود خليفه بعد اخوها ما يستوي
سالته: متى ناوي تملج ...؟؟
عمور: عادي بعد اسبوع لاني بسافر بعد شهر..
شهقت: شهر سبعه عرس نهله ...
عمور: ليش خوله تبا صاله و ها السوالف بعد..
حطيت ايدي بخصري: طبعا ليش هي غير عن باجي البنات ..
عمور: مدري بس انا حطيت في بالي حفله صغيره عقبها نسافر ..
اتجدمت منه مستانسه: بروح معاكم..
عمورابرود: هي ..بروح اسلم ع خليفه هم ع وصول بتيين..
نوره: لا باجر بروح لهم او يوم الجمعه ...
عمور: زين في أمان الله..
الحينه عرفت ليش عمور فكر بخوله..ع باله خوله امطلقه و اكيد ما بتطلب قاعه و ها السوالف.. و بجذا بسافر برع..كل شي امخطط له و امسوي حسابه..علشان جي بغا يجتلني هاك اليوم خربت عليه خططه..يا عيني يبا ياخذ راحته مع خوله برع و انا اتم هني ..لا حبيبي لا زين اني رفضت حميد بالوقت المناسب..زين بعد بالمره ما بنحضر عرس نهله عادي عندي اتولي و ما اتهمني ...
اتحددن ملجة خوله..و بتكون بعد اسبوعين..خلال هالاسبوعين لازم انقوم نشتري اغراض حق السفر انا ما بشتري وايد اشياء..بس خوله لازم تزهب لانها عروس ... و كان خوله و عمور متفجين ..ما بغت خوله أي عرس باي قاعه..حتى عمور بغى حفله صغيرونه بس هي رفضت..بس اخيرا اقتنعت بحفله عائليه.. و عقبها يسافرون...يعني ما بقى لنا غير شهر اسبوعين نتزهب فيه .. و اسبوعين نقعد في الدار عقبها بنسافر بدايه الصيف..حسيت ان حياتي بتتغير ...
اتفجت مع خوله ان نبدا من يوم الجمعه نتشري اغراضنا حق السفر ...علشان جي مريت قوم بيت خالوه مريم ..سلمت علي خالوه مريم و عايشه كانت هناك موجوده ...تمنيت اجوف نهله كيف حالتها متالمه ولا غيرانه ولا صار عمور بالنسبه لها ماضي..بس اتولي ما ابا اضيع وقتي بهاالتفاهات ... ورااناا سفره ..
طلعنا من بيت خالوه مريم... و اتفاجات فارس بويهناا..
خوله اترمسه : ها بتروح الحينه ..
طنشت و ركبت سيارتي..ما سمعت رده يزول اخيرا عمور بعد بفتك من هالشيفه ..شويه و ركبت خوله سيارتي ..
خوله: يسلم عليج..
شغلت سيارتي: الله لا يسلمه...
خوله: حرام عليج..
نوره: خوله خلينا مشيتنا حلوه لا اتخربين علينا
خوله: هههههههه ان شاء الله وين بنروح..
نوره: شو رايج نبدا بسوق راس الخيمه..
خوله: اوكي يالله ..
نوره: شو بتشترين..
خوله: ما حطيت في بالي بس ما بكثر ..لاني بنشتري في لندن بعد..
نوره: هي عمور ما قالج كم بنتم هناك...؟؟
خوله: مدري ابوي قالي سنه و نص او سنتين مدري..
نوره: شي زين بنغير جـو ..
انشغلت بالايام الي مرت بالسوق تقريبا كنا نطلع يوميا نشتري حق السفر... ومرات كانت خلود اتيي معانا و مرات خالوه مريم... حطينا في بالنا ان خلاص ما بنحظر عرس نهله...علشان جي ما اشترينا فستان ولا شي..
مر اسبوع..و حيانتا كانت كل في الاسوااق...و قبل الملجه باربعة تياام ...كنت طالعه من بيت خالوه مريم.. و قبل ما اركب سيارتي جفت حميد ياي صوبي هذي اول مره اجوفه بعد ما فسخت خطوبتي منه ...
نزلت دريشه سيارتي: مرحبا الساع
طالعنا بنظرات مب مفهومه: شحالج نوره ..؟؟
نوره: بخير..
حميد: ما شاء الله باين عليج مرتاحه ...
ابتسمت له: الحمدلله ...شخبارك..
حميد: الحمدلله يسرج الحال...وينج ما قمتي تنجافين من بعد ما رفضتيني..
ما عرفت شو ارد عليه : اممممم مدري انشغلت بخطبه عمور..
حميد: زين مب من حقي اعرف ليش رفضتيني..
نوره: توك تفيجيت تسال عن السبب
حميد: تدرين كل ما اسوي لج ما اتردين علي ...و الحينه جفتج بالصدفه ..
عااااااد شو اخبره السبب خلاص صار كل الي صار بعد جم يوم ملجة عمور و خوله..يعني ما بخسر شي لو خبرت حميد ..المفروض يفهمها بس طلع غبي ..
حميد: اظن من حقي اعرف ..
نوره: حميداااااااااان حسبتك يوم برفضك بتعرف شو كانت نواياي بس انت طلعت مب ذكي..
حميد: يعني وافقتي علشان مصلحتج بس..
هزيت راسي: طبعا.. ولا انا مينونه اربط نفسي بـ واحد لوتي
جفت غضب بعيونه بس قال لي: وافقت ع شرطتج مقابل انج توافقين علي..
ابتسمت له استفزه: كل الي اتمناه ان عمور يتزوج خوله و تزوجها .. و انت موليه ما تعنيني بغيتك بس علشان اتساعد انك تبعد عمور عن نهله...و الحينه مالي حايه فيك...يسعد مساك حميداااااااان
كان برد علي بس ما عطيته فرصه حركت سيارتي ضحكت ابصوت عالي.ههههههههه.ما يهمني عرف ولا ما عرف حميدان ما يقدر يسوي شي يمنع ملجه عمور و خوله..
.ضحكت ابصوت عالي حسيت اني انسانه جاسيه..بالاول ع خوله و عقب عمور و نهله و الحينه حميد...حلو اتعذبين القلوب بس حراام..ما عليه باجر حميد بنسى ...دشيت شقتي و انا طايره من الوناسه ..يلست اترقص احس من كلمت حميد كل شي غامض انتهى من حياتي..يلست ادور في الصاله ..فريت الشنطه.. و يلست ع الكنبه اضحك بصوت عالي و انا اتخيل شكل حميد ..
.يوم اخبره انه غبي .. دشيت حجرتي ..ارتب اغراضي الي شريتها في شنطه السفر..صح باجي اسبوعين ع السفر..بس علشان اخلص روحي .صكرت الشنطه و بستها..طلعت من حجرتي رايحه الصاله ...سمعت صوت مفاتيح..شويه دش عمور عفدت صوبه اخبره اني شرينا كل شي انا خوله..بس ملامح ويه ذكرتني بيوم ملجة نهله ...لا يكون زعلان لان نهله بتعرس جريب يسويها ترا لوتي بعد عمور..

اتجدمت منه: شو بلاك عمور..
يلس ع الكنبه و حط ايدينه بين راسه و كانه في مصيبه خوفتني حركته وايد..
يلست ع الارض جريبه منه: شو بلاك ...؟؟ زعلان ع عرس نهله ...؟؟
هز راسه بمعنى لا ..
سالته: ما تبا خوله غيرت رايك..
نش من مكانه و راح صوب الدريشه و اتساند هناك: سكتي نوره لا تسالين وايد..
شهقت: يعني ما تباك خوله..
عمور: خوله ما يخصها.. و مالها علاقه بالموضوع..
اتجدمت منه: حميد قالك شي ..
رد بعصبيه: لا لا مب حميد ولا نهله و لا خوله..
خفت اكثر يوم رد علي بها الاسلوب : شو مستوي عمور شو السالفه ..
رد علي و هو رايح حجرته: ماشي مشكله اتخصني ...
لحقته : قول لي شسالفه..
رد علي: انتي ما بتسوين لي شي..
حسيت بالغبنه: ليش تدري اني افديك بحياتي بس خبرني شو مستوي..ع الاقل قول لي منو بالسالفه ...
سكت هزيته اترجاه: احلف لك اني ما بخبر حد بس قول لي
همس :ماشي ..
حسيت انه شويه و بيصيح اكيد شي مستوي و شي جايد بعد يلست حذاله: ما احب اجوفك جي عمور ...؟؟
عمور: نوره خليني ابروحي افكر..لو خبرتج ما بتسوين شي..ولا بتوقفين معاي انتي ما تحبين الا نفسج..
صرخت عليه: انت تحاول تستفزني ..انا ما احب الا نفسي و كل الي سويته علشانك..
طالعني: لا اتصرخين ..اقولج مشكله خاصه فيني و ابروحي بحلها..
زخيت ايده: ممكن اتاثر بملجتك من خوله..
هز راسه بمعنى نعم...
شهقت و حطيت ايدي بحلجي عيل حميد قاله شي..هزيته: حميد شو قالك انطق..
نش من مكانه: اوووووه اقولج حميد ماله علاقه..
سرت صوبه : عيل منووووووه ..و شو علاقه خطوبتك بـ خوله شوه ...؟؟
عمور : ماشي نوره ظهري برع ..
صحت من الخاطر: ما بروح من حقي اعرف دام السالفه ممكن اتمس خوله..والله اني بساعدك احلفلك بس لا اتهد خوله ..
عمور: زين لا اتصيحين...نفسي اعرف انتي ليش هامتنج سالفه اني اخطب خوله..
شو اقوله لاني فرقتها عن جابر.. و اني ما اباك تاخذ نهله شو اقوله ها الحينه ...
قلته: لاني احبها و اباها اتكون جريبه مني..
تنهد عمور: شو اقول حق خالي احمد..شو اقول نوره...
حسيت الدنيا ادور فيني يوم سمعت جملته الاخيره: شو السالفه عمور
سكت ماشي رد منه..................
نوره: قلتلك بساعدك..
عمور: ما بتساعديني..
نوره: ليش انت اخوي الوحيد لازم اساعدك قول لي بس منو مسوي فيك كل ها قول لي ..
عمور: ما بتصدقين..
اتجدمت منه: خبرني كل شي وانا مستعده اسمعك لنهايه بس منو مسوي فيك جي اعرفه..؟؟
هز راسه بمعنى نعم..
همست و احس هالليله ما بتعدي ع الخير مع اني كنت مستانسه من شويه ...
حضنت ايدي بصدري و سالته: منوه ...؟؟
همس عمور: فـــــــــــــــــــــــــارس ..

المساهمات : 350 تاريخ التسجيل : 02/08/2007

.,’‘؛:"،’(( الحــــــلقــــــــة الســابعة عشـــــــر ))’,.؟:"‘؛ـ

شغلـنـي حــزن بعيـنـك غــدا واضــح شــرات الشـمـس..كسـرنـي دمـعـك الحـايـر مــا بـيـن الـجـفـن وأهـدابـ.

رديت مصدومه : فارس !!! شو مسوين انت و فارس ..
عمور: شو اقولج نوره شو اقولج ...؟؟
رديت عليه: يا ما حذرتك من هالحثاله قلتلك ها الاشكال ما وراها الا المشاكل ..
عمور: يا ليتني سمعت رمسج يا ليتني..
رد عمور خوفني..وايد.. و كانه ندماان من الخاطر ..اتجدمت منه و انا اتمنى هالليله كل شي يعدي ع خير ..
سالته: شو مسوين انت و فارس ...؟؟
عمور: فارس يطالبني ...نوره يطالبني
حسيت من نبره صوته فيه غبنه..عمور بيصيح !! يسويها انا بحياتي ما جفت دموعه ...بغيت احضنه و اخفف عنه بس ابتعد عني وراح صوب الدريشه...فتح الدريشه

و قال: احس ابعمري مخنوووووووق نوره مخنووووووق ..
رديت عليه: تباني أأدبه...
عمور: انتي شو قاعده اتقولين..
انا مب مصدقه أي كلمه يقولها عمور: معقوله كل هالعلاقه الي تربطك بـ فارس الحينه ياي و امورطنك .. عمور لا ترمس بالالغاز ..
سكت ثواني ماشي رد..
نوره: شو رايك انخبر عليه خالي احمد..
رد علي ابسرعه: مينونه انتي..تبين يفسخ خطبتي من خوله..
يلست ابمكاني و انا ارتجف: لها الدرجه شو مستوي زين ...ارمس لا اتم جي تحرق اعصابي ..
عمور تنهد: انا خدعت فارس...قصيت عليه و الحينه يطالبني...

تميت ساكته لاني مصدومه و بنفس الوقت مب مصدقه أي كلمه ينطقها عمور بس كمل كلامه:
جفت فارس صارت عنده شركه سيارات.. و غير شغله و مركزه العالي في بوظبي اتجربت منه علشان اكون شراته و يساعدني..دخلني شريك معاه في شركته الخاصه بالسيارات ...و خلني مدير الماليه للشركه كنت اخذ البيزات و اصرف ع كيف كيفي..وقت ما اكون محتاج.. و برجعها بعد ما ينزل راتبي كنت اسحب البيزات من غير ما احس...
استغربت:: ليش لها الدرجه انت امفلس..!!
قعد ع اجرب كرسي: لا كنت ابا افتح شركه ثانيه خاصه فيني و من ورا فارس علشان جي كنت اخذ سيوله من شركته..بس قصدي ع شكل دين و بردهم عقب ما تكبر شركتي..
سالته: كيف كيف تفتح شركه و انت بتسافر ع اساس الدوره ...؟؟

بلع ريجه و قعد يلعب باصابعه مرتبك: كنت ابا افتحها ع الاقل و و أوظف أي واحد يتولى امرها لـ ما ارد من السفر ...و كنت ناوي افتح فرع في لندن..
همست:انت مينون مينون
رد علي بحرقه : مب مينون الا غبي ...
نوره: كشفك فارس
هز راسه بمعنى نعم : كان كاشفني من البدايه.. و جمع المبلغ الي خذته من شركته من غير ما يدري ..
نوره: يطالبك بالمبلغ ..هاي سهله عمور ..رااااتبي ع راتبك بنمشي الوضع..
نش بعصبيه: ما يبا بيزات ما يبا ..
رديت عليه: ليش ماا يسامحك بحكم العشره الي بينكم..
عمور: تبين يسامحني بحق العشره..و انا ما سويت أي حساب لـ عشرتي وياه و انه فتح لي ذراعه و انا جازيته بالسرقه..
كنت بصيح بس يودت عمري : ليش سويت جي..
عمور: الغيره نوره تمنيت يكون لي مثل الي عند فارس..من صغرنا و نحن كل شي مثل بعض..
ما توقعت عمور يسوي جي سالته: شو ناوي يسوي ..؟؟
عمور: بخبر خالي احمد..و اذا درى خالي مستحيل يأمني علي بنته ..

يعني فارس كان صادق في يوم عرس خليفه قال انه رافض الزواج..علشان جي الخبيث الحقير ..
عاتبته: قلتلك مليون مره لا ترابع هالاشكال ..
عمور: نوره انا مب ناقصنج..انا ابا ...
قاطعته: كم يطالبك انا بدبرها لك ..
صرخ علي: من وين لج ستمية الف
حسيت بدوره فيلست مب رايمه اوقف عمور صج ورط نفسه..يعني انتهى كل شي بلحظه ماشي زواج ولا سفر ..
عمور: نوره لو ما دفعت بيدمر مستقبلي ..بنسجن و بضيع عني الدوره و و خوله و كل شي بحياتي بنتهي..
همست: شو الحل...؟؟
عمور: مدري انا بورطه مستقبلي ضاع بلحظه ..
سالته: ليش ما تدفع له بالاقساط و انا بساعدك ...
عمور: ما يبا بيزات..
استغربت: شو يبا !!
عمور: انسي..
ألحيت عليه: شو يبا ..عمور ..ارمس ..لا تتهاون بمثل هالموضوع مستقبلك بيضيع و انا بضيع معاك ..
همس: يباج حليلته ..
حسبت للحظه ان تهيأ لي الكلام الي قاله عمور سألته مره ثانيه
بغيت اتاكد: شوه يبا..
كرر عمور: ما يبا مني شي مستعد يسامحني اذا تزوجتيه و انتي طبعا ما بتزوجينه فهمتي الحينه ليش اقولج محد يقدر يساعدني ...

وقفت ابمكاني و كاني مخدره مشلوله فااارس يباني انا !! يباني انا !!! رحت حجرتي من غير ما انطق ولا كلمه ...انخشيت تحت لحافي..كان كل شي ابااه في هذي اللحظه اني انخمد ..عل و عسى انش من الرقاد يكون كل الي صار بيني و بين عمور مجرد حلم ...

ياني عمور المطبخ و كنت اشرب الحليب.ووو سرحانه ...ما تكلم ولا كلمه شرب ماي و طلع من المطبخ...بغيته يقولي الكلام الي صار البارحه مجرد صادوووووه..بس للاسف ما قال شي ..مستقبل عمور صار بيد فارس.. و مستقبل عمور صار بقرار لازم اتخذه..قرار مستحيل اتخذه..لو شو صار او استوا...حطيت ايدي ع الطاوله و يلست اصيح بصوت عالي...معقوله ها عقاب لي..بالي سويته فـ حميد .. و نهله و جابر و خوله و عمور..معقوله ربي جازاني بان يكون فارس" ........"حتى اني مب رايمه انطقها..مستحيل..

.انا ها الحقير مستحيل ارتبط فيه...انا ما اطيقه ودرت قوم خالاتي ابسببه ..انا اخذ ها الي سود ويوهنا..مستحيل..يا ما نصحت عمور بس ما سمعني ...اليوم اسوأ ايام حياتي..اتصلت بالدوام و قلتلهم اني ما بداوم ..يمكن عمور يقص علي ما يباني اسافر معاه هو و خوله... ابسرعه اتصلت ب خوله..
خوله بكسل: نوره انا راقده..
نوره: عطيني رقم فارس ...
خوله: شو فارس !! فارس مب هني في بوظبي ..
نوره: اقولج عطيني رقمه ...ابسرعه..
خوله: زيييييييييين

شويه و عطتني رقمه..اتصلت و ع اخر رقم غيرت رايي ...صكرت الموبايل امبلى اكيد عمور جذاب...ما يباني اسافر معاه..ركضت صوب حجرة عمور..فتحت ادراج حجرته ادور ع أي شي يثبت كلامه الي قاله البارحه ...فتحت كذا درجت مالقيت شي...عمور جذاب كنت في داخلي ابا اريح روحي ..و انا طالعه لمحت كندورة عمور ع الشماعه ..كان لابسنها البارحه..
.سرت صوبها دخلت ايدي بجيب كندورته ادور ع شي..لقيت ورقه..فتحتها بيد ترتجف و انا ادعي ربي ..ان ما اتكون ورقه تتعلق بشركه فارس ...قريت الورقه مره ما فهمت شي..قريتها اكثر من مره استوعبت هذي الورقه نسخه ..اموقعه باسم فارس .. انه يطالب عمور بالمبلغ الي قاله عمور.
.طحت ع الارض..مب مصدقه يلست اصيييييييييييح من الخاطر قعدت اضرب ايدي ع الارض ليش عمور سويت جي ليش ...سويت المستحيل علشان تاخذ احسن البنات... و الحينه تبا تزوجني ارد و اشقى من ع الارض..اكررررررررهك عمور..

.تميت اصيح...لي ما حسيت اني خلاص ميهوده...مسحت دموعي انا بحياتي ما صحت جي..عمور غلط و يتحمل غلطته..نشيت رحت حجرتي..حاولت ارقد بس ما رمت..ورجعت اصيح..حتى عبراتي خانتني..مب راضيه توقف ..كانت تنزل بغزاره..رقدت نشيت عقب ساعه و نص..قررت اتصل بـ فارس و اجوف شو اخرتهااا معاه..
سمعت صوتها ع الطرف الثاني: الو ...؟؟
خفت ارمس...................؟؟
فارس: الوووووو
رمست بصوت واطي: انا نوره ..
فارس................؟؟
رديت : انا نوره اخت عمور .
فارس: هـلا هلا نوره كنت متوقع اتصال منج بس مب هاي السرعه...
مسكت عمري: ليش سويت جي..
فارس: شو سويت اخوج صرقني و انا ابا فلوسي
صرخت عليه: بس عمور ما قال انك تبا بيزاتك..
فارس: هي صح..ما ابا بيزات ..لان عندي اضعافها و اضعاف ..
تنهدت: شو تبا مني..
رد علي: اباج حليله..
عصبت عليه: و انا ما اباك..
رد ابرود: و انا ما جبرتج..اسمحيلي عندي شغل..
صرخت عليه: فـاااااااااااارس يا الحثاله..
سمعته يقول: متصله علشان تسمعيني كلامج الوصخ...
يلست منهاره ع الشبريه: لا اتسوي فينا جي..
فارس: اخوج صرق ولازم ياخذ جزاته..
رديت عليه: بدمر مستقبله هذا بيكون ريل اختك..
سمعت ضحكته:ههههههههه ما يشرفني.. ابوي لو درى اتعرفين شو بيسوي...
ذكرته: عمور رفيجك و صديق عمرك..
فارس: قولي اخوج هالرمسه مب انا ..اخوج الي خاني ...يالله انا مشغول ..اتريا رد من اخوج مب منج..في أمان الله..
رديت بسرعه: لحظ.................."بس صكر الخط بويهي

المساهمات : 350 تاريخ التسجيل : 02/08/2007

فريت الموبايل بكل عصبيه ع الارض ..و يلست ع الشبريه اصيح..كل شي انجلب ضدي كل شي ...اكررررهك فارس اكرهك..اتمنى لك الموت من كل خاطري..مستحيل اضيع كل شي مستحيل كل شي ينتهي ابسبب فارس..فكرت اخبر خوله بالسالفه بس عرفت ان خوله ما بتسوي شي ..احترت شسوي...يلست بالفراش طول اليوم و انا كاره حياتي حتى عمور ما مر يطمن علي..طبعا ماله ويه .ورا .باجر ملجه عمور..ما اعرف شو بيسوي...مالي خص انا مستحيل اساعده...ممكن افديه بكل شي الا بزواجي من فارس...غمضت عيوني و يلست اصيح بصوت عالي حسيت للحظه اني بوهم...صخيت يوم دش علي عمور...
وقف جريب من الشبريه..مسحت دموعي و عطيته ظهري..كانت حالتي ا لنفسيه وايد تعبانه ..و مالي خلق اجابل عمور..من عرفته هو يسوي هالبلاوي...
سمعته يقولي: ورا باجر ملجتي..
ماشي رد من صوبي...................؟؟
عمور: انا بروح حق خالي احمد و بفسخ خطبتي منه..
رديت بنبره حزن: يكون احسن...
اتجدم مني باسني فوق راسي: سامحيني نوره سامحيني...ادريبج متضايجه مني هاليومين الي مروا علي حااولت بكل الطرق اتفاهم مع فارس بس ماشي فايده..
رديت بنفس النبره: كيفك...
سمعت تنهيدته : انتي جاسيه و كنت عارف انج ما بتساعدين بس اطلب منج طلب واحد..اتذكري اخوج عمور و زوريني فـ السجن و لو مره بالشهر...
نزلت دموعي من عيوني من دون اسئذان...حطيت المخده ع ويهي و يلست اصيح..اتخيل وناسه خوله...اتخيل كيف بتكون حياتنا..بس فارس دمر كل شي ...علني فدااج خوله...مدري كيف بتكون نفسيتج يوم بتعرفين ان عمور غير رايه...رن موبايلي و كان المتصل خوله...بغيت المح لها ان عمور غير رايه علشان ما تنصدم من خالي احمد...
سمعت صوتها: انتي وينج ادقلج ما اتردين فكرت اطب عليج بس قلت ما يستوي اروح بيت خطيبي..
صحت يوم سمعت صوت خوله و كانت مستانسه ..
خوله: الوووووووووو
ابتسمت احاول اخلي نبرة صوتي عاديه: شحالج..

خوله : بخير ..لا تزعلين سرت اجوف فستان عرسي ما خذتج علشان تكون مفاجاه..بس خلود عيبها وايد..
صكرت الموبايل و اغلقته ما اتحمل..ما اتحمل كل شي ينتهى بلحظه..انا مستحيل فارس يغلبني و يخرب حياتنا...عفدت ادور عمور...دشيت حجرته جفته قاعد يتعصم..عفدت صوبه..مسكته من ايده

اترجااااااااااااااااااااااااه: دخيلك عمور لا اتروح لـ خالي احمد حرام عليك خوله طايره من الوناسه ..
عمور: ما اقدر نوره ما اقدر...
اترجيته: دخيلك.لا اتخرب كل شي دخيلك..
حرج علي :شو الفايده و انا بنسجن شو الفايده..
بلعت ريجي: خبر النذل انا موافقه بتزوجه بس انت ما تنسجن منو بيكون سندي في دنيتي...
طالعني عمور مب مصدق: انتي بوعيج!!
طحت ع ركبي اترجاه: لا تأذي خوله لا تكسر خاطرهااا كافي اني حرمتها من جابر ..
وقفني عمور مصدوم من رمستي: جاابر ..
هزيت راسي بمعنى نعم..بس ما بغيت اوضح له اكثر ...
سالني :شو سالفته جاابر؟؟؟
مسحت دموعي ع ظهر ايدي: ماشي بس قول فارس اني بتزوجه بس بشروطي...
عمور: انتي متاكده من الي قاعده اتقولينه..
صرخت عليه: هييييييييييييه اتصل به الحين قبل لا اغير رايي ...
خذني عمور حجرتي و رقدني ع فراشي: زين ارتاحي و انا بتصل بـ فارس ...و بخليه ايي المغرب نتفج ع كل شي زين جي..
رديت عليه: هي بس تحمل يوقعك ع أي ورقه..
عمور: لا الغاليه داام وافقتي هو المفروض يوقع لي اني ما خذت من بيزاته شي..
ارتحت يوم جفت عمور مرتاح و مستانس...حسيت برجفه..اتغطيت زين..احاول ارقد بس ما ياني رقاااااااد..نشيت بعد ما ظهر عمور...رحت المطبخ اسوي لي كاافيه ...شربت و يلست افكر كيف اخدع فارس ...اوكي بكون موافقه فـ البدايه.. بنتزوج ..بس عقبها بسافر مع عمور ..مب ع كيفه يغير حياتي بنكد عليه حياته لي ما يطفر و يطلقني...كلماته رنت في اذوني مره قالي بتدفعين الثمن نوره..اكيد يقصد ها هو الثمن..الحقير.الحينه بس ندمت لاني فسخت خطبتي من حميد..جان بكون بالف خير ...بس انا اروايك فارس ... اتصلت بخوله...

خوله: شفيج صكرتي الموبايل بويهي ...؟؟
جذبت عليها: البطاريه فضت ...
خوله: انزين شو بلاج انتي هالايام مب مستانسه شو فيج..؟؟
نوره: كيف عرفتي ...؟؟
خوله: مدري انقطعتي فجـاه ترا باجر ملجتي ..نسيتي..
ابتسمت: ما ما نسيت بس صار شي انتي ما اتعرفينه...؟؟
خوله: شوه ..!!
نوره: اخوج خطبني ..
خوله: اخوي من تقصدين !!
ضحكتني خوله: ههههههه شو من تقصدين خليفه توه راد من شهر العسل مستحيل يفكر يتزوج ع حرمته.. بجى فارس عندج غيره..
صرخت خوله من الصدمه: فارس خطبج..
رديت عليها: نكتة الموسم..
خوله: كيف ما خبر حد...هاااااا بس اتصدقين كنت الاحظ هو و ابوي بينهم رمسه..عمور قالج
نوره: هي..
خوله: شو رايج..
تطنزت: طبعا موافقه ما صدقت يخطبني فارس حبيب القلب ..
خوله: و الله انتي موافقه !!ما اصدق..
نوره: و ليش ما تصدقين كل شي جايز..
خوله: بس احيدج ما اد...
قاطعتها: هذاك الاول كل شي تغير..
خوله: و الله مب فاهمه شي..
نوره: عقب تفهمين يالله بصكر عنج..
خوله: اوكى مبروك مقدما في أمان الله..

صكرت خوله و يلست اصيح من الضيجه و الهم الي انا فيه... بحط له شروط اكسر ظهره بجلب حياتك يا فارس نكد و انا لك..علشان تتأدب و بنجوف من بدفع الثمن...صليت المغرب و لبست...اتكشخت علشان اغايضه..و اقهره..
شويه و دش عمور علي الحجره..
عمور: تعالي فارس يااه..
رديت عليه و انا البس شيلتي: الحينه طالعه...
اتجدم مني: نوره انتي من صدقج موافقه ..

هزيت راسي بمعنى هيه موافقه...طلع عمور و حسيت للحظه ان روحي بتطلع معاه..يا ويلي شو صار بـ حياتي..كيف اتغيرت ..حسبي الله عليك يا فارس..خذت نفس طويل .. وطلعت من حجرتي و من الصاله الصغيره ..و دشيت الصاله..كنت اسمع اصوات بس صارت صخه يوم جافوني..ييت و قعدت ...
فارس: عليكم السلام...
طالعته بنظره و صديت عنه ...طالعت عمور بنظرة لوم و عتاب فصد عني ...
سمعت عمور: نوره روحي يبي شي ..ضيفي الريال..
طالعته: ما عندنا شي ..المطبخ فاضي..
حسيت فارس يكتم ضحكته بعكس عمور الي انحرج...
فارس: ما يخالف عمر ما يحتاي "وطالع ساعته" انا مشغول يا ليت انخلص موضوعنا..
الحقير تمنيت اكفخه .اكسر راسه شو يتحرا عمره يايي صفقة عمل ..
عمور: انا كلمت نوره.. عن سالفه خطبتك و هي موافقه..
تمنيت بهذيج الساعه تنشق الارض و تبلعني.. ولا يصير زلزال اتطيح البنايه فوق رووسنا ولا اجوف البسمه الي انرسمت ع محيا فارس يتحسب روحه انتصر ..
كمل عمور كلامه: بس عندها شروط...
فارس: و انا حاضر اسمع شروطج..
بلعت ريجي و قلت: اسافر مع عمور اخوي
عمور: نوره كيف جي..
قاطعته: يباني اتزوجه اسافر معاك انت و خوله ...
فارس: خلها عمور.. شو بعد...
كملت: اممممممممم ما اعيش معاك فـ بوظبي بتم هني فـ راس الخيمه ...
فارس حط ايده ع خده و كانه قاعد يتسلى: و بعد..اتفضلي..
كملت: ما يخصك فيني ولا لي خص فيك...
عمور: نوره ..

طالعت عمور: عيبته شروطي هلا و سهلا مب عايبنه علك اتعفن بالسجن ما يهمني...
فارس: اوكي انا موافق ع شروطج بس عندي شرط واحد و من حقي اشرط...
طالعته باحتقار بس عمور رد عليه: طبعا من حقك..
فارس: نملج فـ يوم نفس ملجه خوله و عمر ..
شهقت من الصدمه بس عقب راجعت نفسي ابسرعه ابرايه دام انه وافق اني بسافر مع عمور و خوله..
وقفت: ما عندي مانع ...
جفت عمور يطالع فارس و كانه الوضع مب عايبنه ...
رديت و قلت: ما ابا عرس و لا قاعه ولا فستان ولا شي موليه ما ابا شي
فارس: كيفج
كلمت فارس: ما ابا الناس تشمت و ترمس عني و اتقول جوفوا ريلها واحد حثاله ....شو تتريا خلصنا رمستنا اطلع برع ...
عمور: نوره عيب ..
فارس: خلها عمور..هذي نمره و يبا حد يروضها..

اتخبلت يوم سمعت جملته كنت شويه و بتفل بوييه لانه حثاله و حقير ...طالعته من فوق لـ تحت و دشيت حجرتي..قفلت علي الباب و يلست منهاره اصيح ...اكرررررررررهك فارس اكررهك عمور اكرهكم كلكم..

.نشيت ع رنة الموبايل كنت نوداانه رديت و انا مدوخه ميته فيني رقااد..مع اني المفروض مثل هالوقت اكون خلاص نشيت...بس نقزت ابمكاني يوم سمعت صوت خالي احمد..
_سلام عليج نوره
رديت: عليك السلام خالي اشحالك...؟؟
سمعته يقول: ابخير راقده شوه
ضحكت منحرجه: ههههههه لا عاادي...
خالي احمد: قالولي نوره نشيطه و اتنش من صباح الله خير و الحينه الساعه عشر و انتي بعدج كسلانه...
حلفت له: و الله العظيم بس اليوم..

خالي احمد:ههههههههههه زين صحصحي معاي علشان ابا ارمسج فـ سالفه اظني تعرفينها...
بلعت ريجي و يلست: خير خالي ...
خالي احمد: فارس يباج حليله...شو رايج...
انحرجت ......................"ماشي رد"
خالي احمد: ما رديتي..
نوره: خالي انا شرات بنتك و اذا جايف فارس امناسب لي "غمضت عيوني" انا ما عندي مانع ...
خالي احمد: ع بركة الله ...رمسني فارس البارحه و قال لي البنيه ما تبا اترد خبر الا اذا انت رمستها شخصيا..
ابتسمت بداخلي حتى انت قصوا عليك محد طراك واصلا ما تفرق عندي رمسوك او لا بس ها النذل قص عليك...

خالي احمد: انقول مبروك..
اتصنعت ضحكه: ههههههه قـول ..
خالي احمد: مبروك بنتي...فارس يباج تملجين باجر مع عمر اخوج و خوله..بس انا مب راضي لان ابسرعه..."ويضحك" هههههههه بس هو خايف اتغييرين رايج شرات ما سويتي فـ حميد...
نوره: هههههه لا ما بسويها"تسواه انت حميد يا فارس" بس انا قلت عمور اخوي اني بسافر معاه و مع خوله...

خالي احمد: هي قال لي فارس و ها سبب ثاني يخليه يملج باجر...عيل بنتي ع بركة الله مبروك بنتي...
حسيت بالغصه : الله يبارك فيك...
خالي احمد: في أمان الله..
صكرت عنه و انا اقول: مع السلامه..

شو هالحظ لي انا فيه شو الهم الي انا فيه...ليش يا ربي ..ليش عمور سوا جذاا ..انا شو ذنبي..انا شو ذنبي ادفع ثمن غلطته...كنت بصيح..بس فريت اللحاف عني بعصبيه..حق شو اصيح بسني صياح.. طاحت عيني ع شنطة السفر.. و ليش اصيح..و انا بروح مع عمور و خوله..رحت الحمام اتغسلت و رجعت ابدل ملابسي...يلست في الصاله..كل شي مر ابسرعه...انا بحلم ولا علم يا عالم...معقوله انا بتزوج فارس..بمووووووت...يا ريت اقدر امنع ها الزواج...سالفه ما تدش العقل ولا بالافلام...يا ربي ...حتى لو سافرت و ما برد الا عقب سنه و نص.

.بعد بحس بعمري مقيده....غريبه انه وافق ع شرطي و هو السفر..اخاف يلحقنا يسويها هالرزه...الغريب بالسالفه كلها..الاحظ ان علاقه عمور بـ فارس ما اهتزت ...يمكن علشان المصالح الي بينهم...الله يا الدنيا ..معقوله الاخوه و الصداقه ممكن تتحول لـ مصالح شخصيه...ابتسمت اتطنز ع روحي..انا ابروحي استغليت حميد.. و استغليت نوف..علشان اوصل للي انا ابااه..
...

بها اليوم كنت كل شويه اطالع الساعه.. و كل ما مرت ساعه ..احس بداخلي شي يحسسني بالخوف...كنت ابا اتصل لـ خوله اسالها عن نفسيتها...بس غيرت راييي ...الظاهر انها مشغوله حتى انها ما فكرت تتصل بي..بس وقت المغرب الظاهر انتشرت سالفه خطبتي ع فارس...وصلني كول من خالوه عايشه.. و نهله.. و خليفه و خالوه مريم و خلود..الكل كان يبارك لي ع الخطوبه..بس بها اللحظه حسيت ان صج باجر بتزوج..

..اتصل فيني خالي احمد مره ثانيه.. و طلب مني باجر من الصبح اروح بيتهم..يباني اتغدا عندهم...الظاهر بتكون ملجتي هناك في بيت خالي احمد....لاحظت عمور كل شويه ايي البيت و جني غامضتنه ولا سوااه فيني...عادي مساامحتنك...داااام بتاخذني معاك لندن...

هالشي الوحيد الي كان مطمني و مريحني ...بعد ما صليت العشى حاولت ارقد بس ما قدرت..كنت اتجلب..مدري شو صابني..يلست اييير شعري و اضرب راسي..يمكن احس بالتعب و ارقد بس ماشي فايييده ....اتذكرر باجر فيلست اصيييح..

.ما ابا اعرس ..ما اكون زوجة فارس هالحثاله..ها المقزز..اشمعنى انا اتزوجه بعد ما سود ويه خالي احمد كان المفروض يتزوج نهله..ياااااااااا ليت خالوه عايشه تعرف سواد ويهه جان زوجته نهله غصبن عنه ...سرت صوب الدريشه و يلست اصيح..انا ارتبط بواحد ابوه رااااااغه ثمان سنوات برع بيته...اتنهدت.. و يلست ع الارض.قرفصاء و يلست اصيح..و انا اتذكر ..هذاك اليوم الاسود...و أي يوم مر علينا..

.كانت اول ايام اجازة عطلة الربيع ..خالي احمد كان متعود يشتري لنا هدااياا..بمناسبة النجااح...اشترا لي و لـ خوله و خلود.. ونهله عراايس...كل وحده كانت عندها..عروسه.. و اشترى للخليفه و عمور و فارس و حميد و محمد دراجاات ..استانسناا وايد بها العرايس..طلعنا وقت العصر بعد ما خلص المطر...نلعب برع..و كل الصغاريه بهذاك اليوم كانوا يلعبون برع حتى قوم عمور طلعوا بدرجاتهم يلعبون بالطين...نحن البنات تمينا نلعب عدال باب بيت خالوه مريم...بعرايسنا...
حطيت عروستي بالارض: خوله جوفي لعبتي بروح اشرب ماي..
خوله : انزين ..

ركضت داخل صوب المطبخ..جفت فارس داخل يشرب ماي من الدبه ابصراحه انا ما انتبهت له متى دش داخل..
.اتجدمت منه: وع عليك ليش ما تشرب بالكلاس بخبر عليك خالوه...
فارس: انا دوم اشرب جي من حلج الدبه اذا خبرتي يا ويلج مني...

رديت عليه باشمئزاز: اخييييييييييج عليك و نحن نشرب من نفس الدبه.. و الله بخبر عليك خالي احمد...
رجع دبة الماي الي شرب منها داخل الثلاجه...شليتها و صبيت الماي كله داخل المغسله...
اتجدم مني: ليش اتصبين الماي..
رديت عليه: شو تبانا نشرب من ها الماي وع من حلجك..
وقف حذالي و كنت عارفه انه بضربني: شو فيه حلجي...
نوره: اذا ضربتني بخبر عليك خالي احمد..

ييرني من شعري..قعدت اصرخ أأأأأأأأأأأأأي...يلست اضرب ايده.. فعطاني كم بكس ع ظهري.. وربع برع المطبخ لاني سمعت عمور يزقره: فارس تعال بسرعه...

يلست ع ارضيه المطبخ اصييييييح ..مشيت دموعي.. وانا احقد عليه.. و نويت اخبر عليه خالي احمد هالقذر..صبيت لي ماي و شربته.. و عقب ..طلعت من المطبخ رايحه صوب باب الحوي...وقفت ابمكاني يوم جفت خوله شايله لعبتي: نووره فارس دعسها بسيكله..
يلست اصيح بصوت عالي: شو ها كسر لعبتي ..
طلعت برع ادوره و اخبر عليه عمور مع اني ادري ان عمور ما منه فايده ..
خوله: راحوا بعيد ...ما بتلحقينه...
قعدت اصيح و اقول: و الله بكسر سيكله بيجوف...
طلعت لنا خالوه مريم ع صراخي: شو فيج نوره..
رجعت اصيح: فارس كسر عروستي..دعسها بالسيكل "و كملت صياحي" واااااااااااااااااع
خالوه مريم: يبي اجوفها يمكن تتركب..
خوله: ما تستوي امايه..
سرنا صوب خالوه مريم و عطيتها لعبتي ورجعت اصيح: واااااااااااااع ما بتستوي وااااااااااااااااع
خالوه مريم: برايها زين بخلي خالج يشتري لج وحده غيرهاااا ..
عاندت: ما يخصني ما يخصني وااااااااااااااااع
خالوه مريم: و ابوي هاي منو بسكتها يوم اتصيح.."صرخت ع خوله" وينه اخوج ...
خوله: راحوا بعيد خليفه و عمور ..

فتنت عليه: جفته يشرب الماي من الدبه من دون كلاس...
خالوه مريم :- منوه..؟؟

جاوبتها: فارس و يوم قلته بخبر عليك خالوه مريم ضربني بكس في ظهري.واااااااااااااع."ورجعت اصيح"
خالوه مريم: ما عليه انا براويج فيه...ان ما خليت خالج احمد يكسر ظهره بالخيزرانه..يالله دشن داخل...اتغسلن و اتسبحن ..بيأذن المغرب ..

رجعت اصيح: و لعبتي واااااااااااااااااااااع
خالوه مريم: باجر بشتري لج احلى عن هاي..

دشينا داخل ...بعد ما اذن المغرب و رجعت الدنياا اتمطر...اتسبحنا و بدلنا ملابسنا...عقبها يوو قوم عمور..سمعت خالوه مريم تهزب فارس.. و عمور و خليفه لانهم تموا برع و تاخروا و الدنيا اتمطر ...و استانست يوم سمعتها تضارب فارس ع سالفه دبه الماي ولانه كسر لعبتي...اترييت خالي احمد يرجع البيت...علشان اخبر علي فارس..بس كالعاده خالي احمد يرجع متاخر....

علشان جي كلنا رحنا نرقد.بعد ما تعشينا خبز حار امسوتنه خالوه مريم .....البنات في حجرتهم ..و الشباب في الحجرة الثانيه ...انقهرت يوم جفت خلود و خوله كل واحد محطيه عروستها حذالها و حاضنتنها ..و انا عروستي متكسره...خطر ع بالي اروح اخذ عروست نهله ...نشيت من مكاني و طلعت ..جفت خالوه مريم طالعه...
جافتني: وين رايحه ...؟؟
ما عرفت شو اقولها ..................."ماشي رد"
خالوه مريم : تعالي البسي كوتج..بعطيج خبز وديه بيت خالتج عايشه انا بتريااج عدال الباب ..
استانست زين يت من الله ..ركضت البس كوتي.. و شليت المظله لان كانت الدنيا اتمطر...لحقت خالوه مريم سمعتها اتقول: خوله و خلود راقدين ..
رديت عليها : هي

خالوه مريم: ما شفت اخوانج جان طرشتهم بيت خالتج بس يالله هذا الا البيت ..جدامنا بالمره..يالله اركضي و انا بتريااج عند الباب..
غطيت راسي وشليت الصحن و ربعت بيت خالوه عايشه....دشيت جفت الصاله فاضيه حطيت صحن الخبز .دشيت حجرة نهله..جفتها محد شليت عروستها.عدت حياتي يوم جفتها بعد متكسره ..بس مب وايد المهم .و ربعت برع..
قبل ما اطلع سمعت صرخت نهله بصوت عالي...أظني راس الخيمه كلها سمعت صريخ نهله..كانت اتصارخ بشكل هستيري كان الصوت ياي من ورا البيت..ركضت صوب الصوت..جفت فارس يعفد من ع اليدار ابسرعه من جافني ... و نهله لاصقه باليدار اتصارخ....فريت اللعبه الي كانت بيدي..لاني للحظه حسيت ان نهله روحها بتطلع من الصريخ..سرت صوبها..

المساهمات : 350 تاريخ التسجيل : 02/08/2007

نهله شو فيج نهله..قعدت ع الارض اتصيح بصوت عالي ...جفت خالوه مريم و خالي احمد يايين ركض من صريخ نهله...
و سألتني خالوه مريم بعصبيه: شو السالفه ...شو مستوي
من شده صدمتي حسيت ان لساني انربط..كان شكل نهله يغمض..امبلله تحت المطر شعرها مب مرتب و كان امبين مقطع و ثوبها منطر من صوب الكم كانت تصيح..شلها خالي احمد.. ووداها بيته....هدتها خالوه مريم...
خالي احمد محرج : منو سوا فيج جي...؟؟؟
ردت نهله و كانت ترتجف و تصيح: مدري منوه مدري...
خالوه مريم: امج وين رايحه كيف تخليج ابروحج فـ البيت ليش ما يابتج بيتي هاه...
عقبهااا ..قامت خالوه مريم و خذت نهله داخل اتبدل ثيابها .علشان ما تبرد و تمرض ..و خالي احمد طلع برع البيت يمكن يجوف من الي سوا بنهله جذاا ..عقب دقايق رجع .
خالي احمد يتحرطم : النذل شـرد
جفت فارس داش الصاله و مرتبك.. و معااه عمور و خليفه..
خالي أحمد: انتو من وين ياييين بها الحزه..
خليفه: رحنا انغطي ع الحمام فوق السطح...خفنا لا يتخرسون من المطر

همست: خالي احمد..
طالعني و كان محرج...
خفت ارتجفت و انا اقول: انا جفت فارس ينقز من فوق اليدار يوم نهله صرخت ...
اول مره اجوف الصدمه بعيون خالي احمد .. و كأنه مب مصدقني..رجع فارس لـورا و حركته بينت ع اني كنت صادقه..اتجدم منه خالي احمد..و كان يرتجف من الغيض ...
فارس طالعني بنظرات ما فهمتها: جذابه ...

كافي نبرة صوته كانت اتبين انه هو الجذاب و ملامح ويهه ...طلعت خالوه مريم يوم سمعت\

خالي احمد يصرخ ع فارس: شو كنت اتسوي هناك...
عمور يدافع عنه: فارس كان معانا فوق السطح عند الحمام...
خالي احمد: اسكت انت ولا كلمه لا تدخل ..."اتجدم خالي من فارس و زخه من رقبته" شو مودنك بييت خالتك عايشه...

تم فارس ساكت ابد ما يرد و هالشي رفع ضغط خالي احمد.. و قعد يضربه..و يرفسه. حسيت اني السبب بالي صار بس حالة نهله تغمض...و يستاهل فارس..قامت خالوه مريم و عمور يمسكون خالي احمد ...

فأجاناا خالي احمد يوم قال: قم اطلع من بيتي اطلع طلعت روحك عسره لا بارك الله فيك و في اليوم الي جفتك فيه..سودت ويهي
خالوه مريم اتصيح: بس احمد حرام عليك..
خالي احمد: شو بس سود ويهي لو كانت اختج فـ البيت شو بصير فينا قولي...فضيحتنا ع كل لسان
عمور: خالي فارس ما سوا شي

قاطعه خالي احمد: عمر تبا تتواصل مع فارس اظهر من بيتي و بيت خالتك..."وطالع فارس" قم اطلع من بيتي ولا اتفكر ترجع هني ابد..و إذا عرفت في يوم من الايام أي واحد منكم رمسه ولا كلمه يظهر من بيتي لا اعرفه ولا يعرفني
كان يرتجف يوم يرمس من العصبية

كان عمور بتكلم و بيرد ع خالي احمد يدافع عن صديق العمر ... بس خالوه مريم قبضته من ذرااعه
تترجااه
: بس عمر اسكت لا ادخل عمرك بشي ما يخصك.. خلي خالك و ولده ابكيفهم لا اتخلي خالك احمد يحرج عليك..

كنت اجوف الي صار بـ فارس يستاهل...لان الي سواه مب شويه.. و حسيت اني انتقمت منه لانه كسر لعبتي و ضربني في المطبخ و الله جازااه بطرده من البيت...رفعت راسي اطالع فارس..نش فارس من ع الارض طالعني بنظرات حسيت انه يبا يجتلني بس

خالي احمد صرخ علييه : اطلع من بيتي اطلع ..
طلع فارس هذاك اليوم حتى من غير ما يشيل ثيابه او أي قطعه... حتى ما ندري وين رقد بهذيج الليله..يلس عمور يصيح..و حضنته خالوه مريم...انا و خليفه كنا انطالع الموقف بس ...

هددنا خالي احمد ان ما نطري السالفه لـ قوم خالوه عايشه...علشان فارس صج سود ويهه ...هذاك اليوم نهله رقدت فـ بيتنا.. و الغريب حتى هي ما يابت أي سيره لامها و اخوانها ...رجعت حجرتي و انا ارتجف مدري من البرد و الي من الي صار بس اكتشفت ان خلود و خوله نشوا من الرقاد ع صراخ خالي احمد و كانوا يصيحون...

حطيت ايدي ع رقبتي و انا اتذكر نظرات فارس هذاك اليوم....كان وده يجتلني..اكيد الحينه يبا يتزوجني علشان يجتلني...بس انا الي جفته قلته ...كلمة الحق ما ينسكت عنها ....

اتروعت يوم عمور فتح باب حجرتي و جافني يالسه ع الارض ..
سالني: شو فيج نوره..
صحت من غير ما ارد عليه شو فيني يعني ما يعرف شو حالتي..باجر بتعدمني يا عمور و تسالني شو فيني ...اتجدم مني..

و يلس حذالي ع الارض: ليش اتصيحين..
مسحت دموعي: ماشي ..
عمور: علشان باجر بتملجين...كل البنات جي يصيحون ولا بس انتي علشان ما تبين فارس
رديت عليه و دموعي تنساب ع ويهي: كل البنات يكونن مستانسات الا انا...كلهن يتريون هاليوم الا انا احس باجر يوم اعدامي...كيف ترضى ع اختك تزوجها مثل هالانسان..

حضني عمور يوم جافني اصيح منهاره: نوره لا تحسسيني اني غصبتج...اذا ما تبين و الله من الحينه بخرب السالفه..
رفعت راسي اطالعه: شو الفايده..خلاص الي صار صار..المهم بسافر معاك صح...
ابتسم و هز راسه: بس تذكري زين ان فارس غير مثل ما قلتلج زماااااان
نوره: ما اتعرفه كثري..
عمور: ههههههههه يمكن...
نوره: متفيج تضحك..
باسني فوق راسي: نشي ارقدي..
نشيت من مكاني و انسدحت ع الشبريه و انا اتمنى اني ما اجوف الشمس باجر..بند عمور علي الليت و صكر باب حجرتي بعد ما طلع منها....رقدت ع طول ...اتريا باجر..بكل ألم و حسره

المساهمات : 350 تاريخ التسجيل : 02/08/2007

.,؛،:"‘(( الحــــــــــــلقــــــة الثـامنــــــــــة عشــــــــــــــر ))’,":.,؛‘

عيونك توحي بضعفك .. كلامك .. والحواس الخمس
شفاتك ترتعش .. رمشك ، سكوتــــك أتلف أعصابك

نشيت ع اذان الفير كالعاده..رحت اصلي و تميت اقرا قران لي ما طلعت الشمس...ما كنت ابا افكر بشيء موليه..اتصلت بي خوله غريبه اكيد مب راقده..ولا خوله مب من عوايدها اتكون وعيانه هاليوم..
نوره: السلام عليج..
خوله: عليج السلام..شحالج..؟؟
نوره: ابخير..غريبه ناشه من وقت..
خوله: طبعا ..اليوم بملج ما تبيني انش من وقت..اصلا ما رقدت ...شو نفسيتج..
تنهدت شو بتكون يا حسره: الحمدلله زينه ..و انتي.
خوله: طايره من الوناسه ...متى بتين بيتنا ...
نوره: العصر ..
خوله: ما بتيين تتغدين..
نوره: لا ...خالي احمد يباني ايي اتغداا بس انا ما اباا...
خوله: خايفه انج تجوفين فارس..
نوره: يمكن ...خليني ايي وقت العصر احسن ..
خوله: زين ابرايج...
نوره: يالله بروح اسوي لي حليب
خوله: زين في أمان الله..
نوره: مع السلامه...

دشيت حجرة عمور جفته راقد..رحت صوب المطبخ...سويت لي حليب ...عقبها..بدلت ملابسي علشان اروح الدوام..مدري كنت ماخذه اجازة بس الحينه غيرت رايي ..يمكن علشان اهرب من افكاري...سرت الدوام.. و يلست اسوي شغلي و شغل غيري..حتى اني ما خبرت رباعتي فـ الدوام اني اليوم بملج..

مصخره هاي مب ملجه...رديت الشقه و انا هلكانه..جفت عمور قاعد يتغدا طنشته حالي مب شرات حاله..صليت الظهر.. و انخمدت ع الشبريه ..كنت اتجلب كيف اليوم بتزوج يا ربي ماشي حل..ما ابا ارتبط بـ فارس..ما اريد..ع هالافكار رقدت..و ما نشيت الا و عمور يوعيني يباني انش ...
عمور: قومي نوره ...نشي شو فيج من متى مب راقده..
بطلت عيوني بكسل

رجع يهزني: قومي الساعه خمس العصر و انتي ما صليتي ..
فجيت عيوني اطالع الساعه اووه هذي اول مره ارقد جي..

عمور: شو ياااااااج يالله نشي صلي و بنروح بيت خالوه مريم..

ما رديت عليه ولا نطقت باي كلمه خلوني ساكته احسن لي...خلاص جربت ساعة اعدامي ...صليت العصر..حسيت فيني صيحه بس تعبت من الصياح بسني ترا قالوها من قبل الدموع ما اتسوي شي لو كانت اتسوي شي كان البشر كلهم بجـوا ...

لبست ثوب مخوره ...لمحت موبايلي كانت كذا مكالمه من خوله.. و مكالمه وحده من خالي احمد..شاد حيله خالي احمد الظاهر نسى شو سوا فارس زمان ...لبست عبايتي و شيلتي.. جفت عمور يترياني في الصاله..ابد ما توقعت ملجه خوله لـ عمور جي بتكون نفسيتي ...وقف يوم جافني..
قلته: ابروحي بسير بسيارتي..
عمور : ليش انا بوصلج
سكت اصلا مالي نفس اسوق و اشك لو سقت ما بوصل بيت خالوه مريم سالمه...صخيت..ما جفته كاشخ لا يكون ما بملج ع خوله..

و في السياره سالته : ليش مب كاشخ..وين غترتك..؟؟

ابتسم: بالدوبي..بعد ما اوصلج بنطلع انا و فارس..بمر الدوبي و بكشخ لا تحاتين ما بفشلج اخوج..

طالعته بنظره و صديت عنه..و الله يسوي بلاوي و يعقها فوق راسي ...وصلنا بيت خالوه مريم...من دخلت حسيت الجو ربشه مدري ليش...دخلت الصاله..جفت شيما موجوده...بالصاله و معاها خلود و خالوه مريم..وقفن يسلمن علي.. و هذي اول مره اجوف شيما بعد عرسها..باركن لي..

سويت روحي مستانسه..بس صحت من الخاطر يوم حضنتني خالوه مريم...و صاحت معاي..ع بالها اصيح ع امايه الي ما بتحضر عرسي..بس انا كنت اصيح ع حالي .. و حظي ...سالت عن خوله ...قالولي بحجرتها ...و قافله ع روحها البااب...سرت صوب حجرتها..دقيت الباب فتحت لي..سلمت عليها ...كانت مستانسه..اتصدقون اول مره بحياتي احس اني بحسد خوله...

خوله: شو بلاج كنتي اتصيحين..
هزيت راسي بمعنى نعم : امج صيحتني و صاحت معاي..
خوله:ههههههه شي عادي اتحسين بها الشعور ترا انا اول مره جي حسيت..ما عليج ان شاء الله بنستانس قولي امين..

طلعت مني تنهيده معانااااااااات ع الايام السوده الي يايتني : آآآآآآمين ..
نوره: الي مريحني اني بسافر معاكم
خوله: خلاص عيل ليش مضايجه..؟؟
نوره : مدري ..فيني ضيجه..
خوله: ايه اليوم ملجتج لا اتسوين ابروحج جيه...

اذن المغرب و صلينا..عقبها دشت علينا شيما.. و خلود الي كانت تبا اترقد جسوم...
شيما: تعالي بحطلج ميكااب نوره..
نوره: لا مشكوره ما اريد..
خلود: شو ما تريدين...ع كيفج شو اليوم ملجتج..
رديت : بس ملجه ماشي ربشه و عرس..
شيما: حتى و لو علشانج مب عشان غيرج..

صدقها شيما علشاني مب علشان غيري يالله شو وراي يمكن تتحسن نفسيتي ...حطت لي ميكااب .. و خوله ابروحها حطت لعمرهاا لان ما يحتاي حد يسوي لها ما شا الله عليها خبيرة تجميل..شهقت يوم طالعت عمري
سالت شيما: مب جنج بالغتي
شيما: هههههههه لا مب مبالغه عادي تراج عروس ...
خلود: اجوفج...اممممم اتصدقين غيرت شكلج يالله مبروك..
خوله: و انا شو رايكم فيني..
قلناها : عسسسسل

حسيت بطني يعورني ما بجى شي ع الملجه...دش علينا خالي احمد..اتروعت يلست ع الشبريه..حسيت ابعمري مخنوقه يا رب فارس غير رايه يارب ...سلم علي...و ظهرن خلود و شيما من الحجرة.يبا يرمسني استانست اكيد فارس غير رايه ...بس ماتت كل ذرة أمل فيني يوم جفته يطلع من جيبه بيزات..

طالعته:شو هاه خالي....؟؟
خالي احمد : فارس عطاني مهرج..ما يصير تملجون من غير مهر..
مديت ايدي ارجع البيزات: ما يحتاي..
خالي احمد: ما يستوي يا بنتي هذا من حقج...
حتى اني ما عرفت كم مهري : انزين خالي خلهن عندك امانه يوم بحتاجها باخذها عنك...
خالي احمد: زين ما اتسوين "وباسني فوق راسي" اتزهبن ترا الملاج يااه.. و المعاريس داخل ..
خوله: عيل ما بستني..

ضحك و حضن خوله و باسها..ااااااااه يا عذابي ..ذبحتني يا عمور و انا الي سويت و سويت علشان اضمنلك خوله ها جزاتي ..يا ريتني ما فسخت خطبتي من حميد وينك يا حميدااااااااااان...شويه و دش علينا خليفه بالكتاب...وقعت خوله.. و عقب ما فر الصفحه وقعت بيد ترتجف..ابا كل شي يخلص و ينتهي ..سلم خليفه ع خوله و بارك لها.. و بارك لي..

خليفه: مستعيل بعدين بعلق عليج..

ابتسمت و انا مدري الي انرسمت ع شفايفي ابتسامه.لـ خليفه..ولا ابتسامه للايام اليايه...الي بتكون عذاب فـ عذاب حسيت برجفه يوم اتذكرت فارس يقولي بتدفعين الثمن..يلست ع الشبريه ...اتجدمت مني خوله حضنتي ..و حست فيني ارتجف...

خوله: شو فيج نوره بردانه..
هزيت راسي بمعنى نعم...
دشن علينا الحجره خالوه مريم و عايشه..و نهله و خلود و شيمااا ...يلسن يباركن لي و لـ خوله كنت اطالعهم مب رايمه ارمس او ارد عليهم و انا اجوف ضحكتهم و وناستهم مرسومه ع ويوهم..كنت كل الي اباه اروح البيت..حطوا العشى .. و اصلا بالاساس كان العشى للريايييييييل ...

نوره: خوله ابا اروح البيت ...
خوله: تو الناس..
نوره: تعبانه..
خوله: شفيج..
صحت: ما ابا ما اباااااااه ...محد يحس فيني

المساهمات : 350 تاريخ التسجيل : 02/08/2007

حضنتني خوله: شو صاير لج نوره..وين هيبتج و قوتج.. وين قناعتج و عنادج ..وين رااح كل هاه...حرام عليج لا اتخربين ميكابج.كلهم مستانسين و انتي تبين اتخربين علينا وناستنا ...

كلام خوله كان اثر كبير علي..بس هي ما اتعرف شو الي يصير..طاحت عيوني ع شنط خوله..اتذكرت السفر.. صح و الله و انا ليش اسوي ابروحي جي..تراني بسافر مع عمور و خوله.. و فارس اكيد ما بتحمل يترياني سنه او اكثر برع .. و بجي بطلق..ابتسمت لـ خوله ابتسامه شكر..بس هي ما فهمتني ...طلعنا نتعشى مع قوم خالاتي و البنات ...حاولت انسى و انسى.

.دش علينا خليفه شكرته في سري من كل قلبي لانه غير علينا جو القعده و قعد ينكت و يسولف..ما توقعت اندمج معاه هالكثر ...طالعت خوله الي كانت تضحك ع تعليق خليفه..كافي خوله مستانسه و ها اهم شي فـ حياتي ...اتصدقون من حالتي الرديه نسيت اراقب نهله كيف بتكون نفسيتها يوم بتجوف حبيب القلب سابقا ارتبط بـ خوله..بس جفتها عاديه جدا. و تضحك وقت ما كنا نضحك..اتولي .

..اتاخر الوقت ..اتصلت بـ عمور علشان يوصلني الشقه..سلمت عليهم ..و طلعت..صوب سياره عمور..لمحت حميد واقف برع يسولف مع خالي احمد...سلم علي خالي احمد مره ثانيه و بارك لي...
سمعت حميد: مبروك نوره الله يسعدج..

حسيت من نبرة صوته فيها رنه غريبه ..بس استاهل الي صار لي لاني جرحتك...طالعته ..جفت بعيونه كلام وايد يبا يقوله بس وجود خالي احمد امسوي عائق ..

.احسن بعد مب ناقصه فلسفته.. و يفهم الي يفهمه ...طلعت من بيت خالي احمد جفت عمور و شخص طويل قاعد يسولف معاه ما غيره هالحثاله..عفوا اقصد فارس..لازم اتعود انطق باسمه..علشان ما اغلط جدام الناس و اقول هالحثاله صار ريلي ؟؟؟؟
ركبت السياره..بلحظه ما فتح خالي احمد الباب: عمر تعال سلم ع حرمتك ...؟؟
عمر جنه ما صدق خبر: ان شاء الله ...

الغبي الحمار شو اسبه قولوا شو اسوي به..كنت بقوله لا اتروح ...لا اتروح ..بس صوتي ذاب فـ الهواء..و كأنه خالي احمد متعمد يسوي هالحركه..لان من دش عمور البيت..عفد فارس و ركب سياره عمور..كنت بقفل
بيبااااان السياره بس لاحظ و سبقني...

من غير ما اطالعه : نعمممم
رد علي: نعم الله عليج..انا ريلج..
طالعته بعدني ما استوعبت السالفه ريلج !!!: بس ع الورق..
فارس : هي صح بس ع الورق بس مب من حقي اقولج مبروك..
رديت عليه بوقاحه: الله ما يبارك فيك قول امين حطمت حياتي ...
طالعني : بسوي روحي ما سمعت هالكلام الحلو منج...

شهقت يوم شغل السياره.. و حركها..عفدت ع مقبض الباب كنت بفتح باب السياره بس زخني من ايدي ..
سمعته يقول لي : اصطلبي ...

صرخت عليه : وقف السياره اقولك...وقف السياره يا الصرااق
ضحك ابصوت عالي يوم قلت كلمه الصراق : ههههههههههههههههههه
حسيت من ضحكته ان يتمصخر علي..يعني اخوج الصراق مب انا ما عليه فارس..

يلست اصرخ عليه :
طلقني طلقني

فارس: حاضرين لطيبين بس قري ابمكانج و عن حركات اليهال ..
انتبهت انه للحين زاخ ايدي.ييرت ايدي بالقو عنه : هذي اخر مره تمسكني جي..
فارس ابرود : ان شاء الله..

صرخت عليه : لا ترمسني جي شو تتحراني ياهل ...
طالعني : اسف بس حركاتج توحي لي جي..

قفطت ما عرفت شو اقول سكت و تميت ابمكاني اطالع الدرب وين صرنا..كان ودي اشوه ويهه باضافري بس تعبت..كنت هلكانه بذلت مجهود كبير و انا اتصارع معاه اباه ينزلني من السياره ..أأأأأأأأأأأأه يا ليت اتحسون فيني ...و العذاب الي بداخلي...

سالني : تعشيتي..
طنشته:..................."ماشي رد"
سمعته يقول: امممممممم انا تعشيت بس مدري اذا انتي تعشيتي اولا لاء..
طالعته و سالته ابسرعه: ابذمتك انت مصدق روحك معرس ...؟؟
رد علي بابتسامه : طبعا و انتي ..
احتقرته و صديت عنه و قلت : زواج بالحيله...
رد علي : منوه المحتال انا ولا اخوج..
رديت عليه : ما يخصك باخوي...تفهم او لاء..
ابرود: ان شاء الله"سكت شويه" ملاكي...

صديت عنه اطالع الشواارع وين رايحييييييين !! ما بغيت اساله عشان ما يحط في باله اني مهتمه ..رن موبايله.. و كانت رنه عاديه جدا...سمعت صوت عمور ..مدري شو قال ..بس فارس نقع من الضحك ..معلوم يضحك انسان سخيف و قليل ادب ...بس ليش يضحك هالكثر عمور شو قاله !!!

سمعته يقول: ما عليك خذ سيارتي ولا اقولك..خل حميدااااااااان "قلد صوتي يوم نطق باسم حميدان" يوصلك..و انا بوصل حرمتيه و بمر عليكم ..اوكي .يالله مع السلامه

ادري يستفزني خل ينقع...ع باله برد عليه.. و الله لاطنشك لي ما تطفر .. وليش اتريا لـ ما تطفر عقب اسبوعين انا مسافره و بفتك من شيفتك ...قال حرمتيه قال عمىىىى ابعينك ..

.دشينا سوق راس الخيمه...تميت ابمكاني ما اتحركت...وقف السياره عند محل الذهب.. و بند السياره و شل السويج معاه .يتحراني بروح عنه .. و الله كنت بسويها بس الهيس فهمني ...نزل من السياره من غير ما يقول أي كلمه..راقبته شو يبا ..جفته طلع من المحل و راح المحل الثاني...

دقايق.. و ظهر شايل معاه علبة ..هااااااااه لا يكون هديه..امصدق روحه متزوج هاه ...حسبت اول ما بيركب بفتح العلبه و بلبسني الدبله..بس جفته يحط العلبه ابمكاان و يشغل السياره ...عيل لـ منوه هاي العلبه..يستهبل ها ولا يتحراني ميته ع هديته..تعالوا انا اصلا ليش حارقه اعصابي...ما يهمني..طالعت برع..جفته وقف السياره ابمكان مظلم...ما اسمع غير صوت الموج..

سالته : نحن وين...؟؟
فارس : لا اتخافين انتي بامان ...

التفت يمين و شمال ابا اعرف نحن وين بالضبط..بس ما عرفت لان كل شي من حولينا ظلمه...ماشي غير قمر متربع ع صفحة السمااا.. و حوليه درر من النجوم...و صوت الموج الي يهدد باي لحظه بيثور علينا..بلعت ريجي..طالعت فارس جفته يطالعني..خفت..هذي اول مره اخاف فيها هالكثر و من فارس..حضنت ايدي و ضميتها بصدري و كأني اصد نظرات فارس عني ..

سالني : ليش خايفه..
حاولت اتمالك نفسي ..و اجاوبه بنبره عاديه: مب خايفه..بس شيل عيونك عني ..

ابتسم..يمكن ابتسامته كانت مصدر الراحه الي حسيت فيها..بس كنت خايفه لا يكون الهدوء الي يسبق العاصفه...حسيت انه الموج .. و انا القمر ..بند السياره و نزل...يلس ع السياره من جداام ...يتامل الموج الي كان يضرب الصخر..بكل قسوه...رغم هاي القسوه بس ضوء القمر كان ينعكس ع صفحات البحر الهايج...بلعت ريجي حسيت بالبروده ..وينك يا زلاغي.. وينك يا كوت عمور وينكم..هالمينون باخر الليل يابني هني اخاف يجتلني..

.سمعته يزقرني: تعالي ..انزلي جوفي البحر وايد حـلو..
طاوعته من غير ما احس.. و كاني كنت ادور الامـان فـ مكان معزول عن العالم..رصيت ع شيلتي الي كان الهوا يداعبهااا ..وقفت الصوب الثاني من السياره..اطالع البحر..

سالته: اتحبه..
رد ابسرعه : واااااااااايد ..بشكل جنوني...
طالعته هذا فارس ولا قيس بن الملوح !!
قلته : انت اتبالغ..

بصوت هادي بس نبره خوفتني وايد : لا ما ابالغ تدرين ليش لان هالبحر يذكرني فيج...اني مثله جي .."واشر عليه" طالعته مستغربه شو قصده ..ما فهمت ..

.بس صخيت يوم سمعته يقول : و الشيء الثاني الي يجذبني فيه..لانه فتح لي حضنه.. و ضمني فـ يوم راغني ابوي من غير ما يسوي حساب وين بروح بها الجو ..

بلعت ريجي يااك الموت يا تارك الصلاة..تميت ساكته خفت ارد عليه بكلمه يقوم يجتلني و انا السبب بكل الي صار له ...شو ها الحجر الي في قلبه ..ما كملنا 12 ساعه من ملجتنا و هو يذكرني بالي سويته فيه و انا شو لي الله يا كثر حقدك يا فارس ...ما تستحي تطري لي سالفه سواد ويهك امف عليك
غمضت عيوني اتخيل حجرتي و شبريتي..ابا اكون لحينه هناك..ابا اهرب من كل شي ..فتحت عيوني يوم سمعت باب السياره ينفتح.كنت بربع صوبه خفت يحرك و يخليني ابروحي هني بها المكان الموحش...بس ريولي انشلت ابمكانها من الخوف ما رمت احركها .

.اتجتفت من البرد كنت ارتجف.. و بداخلي ميته...بس حسيت الدم رجع يسري بجسمي..يوم جفت فارس ياي صوبي و بايده علبه الذهب الي من ساعه شراها ..راقبته يفتح العلبه...رصيت ع اصابعي ..ما ابا منك شي...لا تجرب مني ..غصب اتحسسني و اتحسس روحك انا متزوجين..حالنا حال أي زوجين..بس فكرت اطاوعه لاني خفت يخليني هني و بها المكان ...لو عاندته يسويها هالمجرم...يير ايدي طالعت البحر...حسيت ايده دافيييييييييه ..و الله تمنيت ان اتم ايدي بحضن ايده ادفيني...

فجيت عيوني يوم سالني: بردانه نوره...
هزيت راسي بمعنى نعم من غير ما اطالعه..حسيت بالخاتم الي صار بصبعي.. و كانه يقول لي خلاص ملكتج نوره..طالعت الخاتم و كانه دره من الدرر الي فوق محاوطه بالقمر...يلست اتامله معقوله انا بحلم ولا كابوس..
سالني : عيبج..

حتى لو ما عيبني بقول هيه..متروعه منه..لانا ابروحنا..و يمكن يسوي لي أي شي ..
سالني مره ثانيه : عيبج..
همست : هي..
اتفاجات يوم جفت يطلع خاتم ثاني.. و زخي ايدي الثانيه.. و لبسني الخاتم..
طالعته : وايد علي..
ابتسم : و انتي جي هاديه تستاهلين كل شي ..
عقبها طلع العقد..
قال لي : افسخي شيلتج علشان البسج العقد..
رصيت ايدي ع الشيله : مب لازم كافي الدبله..
بس اصر : لا ابا اجوفه فيج..
رديت لورا: ما اريد..
رد بعناد : افسخي شيلتج..
رديت عليه بحده : انت مينون تباني افسخها هني برع ...
طالع حوليه : منوه غيرنا هني بس انا و انتي "و ابتسم" و الشهود..
رديت مستغربه : الشهود..
ضحك : هههههه شو فيج..الشهود البحر و القمر مب شاهدين..

اوووووووه ..قامت تطلع علوم من ها معقوله انا جدااااام فارس ..اكيد انا بحلم..
سمعته يقول : يالله افسخي شيلتج ..

نزلت شيلتي ع رقبتي..حسيت بالهوا البارد يضربني ع رقبتي ..ارتجفت...اتجدم مني غمضت عيوني يوم تجرب مني ..اكثر.. و لبسني العقد..كل شي مر ابسرعه بس انا كنت احس كانه ساعات ..طالعته يوم يطلع الشغااب.. و يلبسني..كنت بصرخ من الويع غصب يلبسني..ما يعرف جتلني اذوني عورتني بس استحملت و استحملت لي ما خلص ...كانت انفاسه دافيه..بس جذبتني ريحة عطره جنااااااااااااان...نقزت يوم باسني ع راسي
و قال : مبروك .." وضحك" ههههههههههههههه يا العروس
دزيته بكل قوتي حسيت للحظه انه قاعد يتمصخر علي ..ضحكته كانه يستهزأ مني..
فارس : حلو شكلج و انتي امصدقه روحج عروس ...

حسيت بنار تطلع من ويهي..حيوان شو يتحرا عمره..مب منه مني انا الحماره الي طاوعته ..اوهمت عمري انه ممكن يفرني هني..بس ايخسي شو ما عندي اهل..يدورون علي...اكررررررررهك فارس ..تتمصخر علي..
حسيت بنار تغلي في صدري..و انا اسمع ضحكته..شليت الرمل. و فريته بويهه.. و ركضت صوب السياره

..سمعت صرخته يوم يتويع : أأأأأأأأأأأأأأي عيـووووووووني ..
فكرت للحظه اعفد ع الكرسي و اسوق السياره..بس سبقني.ركب السياره ابسرعه.. و زخني من رقبتي ..جفت بريق الغضب الي لمع بعينه ام عينه الثانيه الظاهر كانت اتعوره..كانت يحكها ابيده..
يلس يهزني : يا الشقيه يا الشيطانه الصغيره عورتي عيني..

غمضت عيوني خفت منه و حسيت روحي بتظهر..هدني و دزني بعيد عنه .. و يلس يحك عيوني..صحت..هذاا اول يوم لي..معاه..شو بستوي عقب..حطيت ايدي ع ويهي و يلست اصيح ...ابصوت عالي كنت منهاره.طنشني تم ساكت و كأنه عايبنه صوتي و انا قاعده اصيح بس .

سمعته يقول : حقج علي ...انا الغلطان اسف ..
صرخت عليه : ليش تزوجتني انا اكرررررهك اكرهك..
فسخت الدبله و فريته ابويهه : ما اريد منك شي طلقني طلقني ..
و يلست اييره من ثيابه و فريت غتره من ع راسه كنت ابا اطلع كل غيضي.
صرخ علي :نوووووووووووووره..

نقزت يوم سمعت صرخته ..هديته..خفت لا يمد ايده علي مره ثانيه..لصقت فـ باب السياره..سمعت صوت نصخه عرفت انه محرج ع الاخر..يلست اصيح بس بصمت..حرك السياره....ارتحت اخيرا برجع شقتي ...تمينا طول الدرب ساكتين ...مسحت دموعي..يوم جفت البنايه الي عايشه فيها..وقفنا عدالها ..عفدت ع مقبض الباب..بس قفل السياره عني ..

طالعته فأشر ع الدبله و كانه منقز منها : شيلي الدبله معاج..

كنت ابا كل شي ينتهي بسرعه ابا انزل من السياره كنت احس مخنوقه.. و ادري اذا عاندته بعاندني..شليت الدبله باصباع ترتجف..سمعت صوت القفل ..فتحت باب السياره و قبل ما انزل زخني من ايدي ..ما طالعته بس سمعته يقول بنبره ما اعرف شو كانت معانتها: حقج علي ..

هدني نزلت من غير ما اطالعه او ارد عليه.. و صكرت باب السياره..سمعت صوت السياره تتحرك بعد ما دخلت البنايه..دشيت الشقه.. و عفدت ع شبريتي..ضحكته يوم يتمصخر علي مرت في بالي فيلست اصيح منهاره ..معقوله حياتي من اليوم ما بمر عليها يوم الاو اصيح...حرام حرام..و الله حرام..قمت بدلت ملابسي..و فسخت الذهب الي لبسني ياه تأملته شكله كان حـلو ...بلعت ريجي.. و انا اتذكر يوم كان يلبسني الحيوان يعرف يمثل بالقو...حطيت الذهب و الدبله في بكس صغيرون..

و دشيت الحمام..اتغسل علشان انخمد و استعد للمصايب الي يايتني في الايام المجبله .
تمنيت بيوم الخميس اروح بيت خالوه مريم اتغداا بس ما اقدر اكيد هالحثاله هناك...سويت لي اكل خفيف ... و رجعت حجرتي اتفاجات عمور طالع من حجرته و ياي صوبي ..وقفت اطالعه ...

ابتسم لي : البارحه تاخرتي مع فارس ان شاء الله استانستي..
قعدت ع الشبريه اتطنز: هي استانست وايد ....و انت ..؟؟
عمور: حتى انا ...خوله فناانه

الي يقول ما يعرفها من قبل الحينه بس صارت فنانه..ما حبيت اعلق..الحينه هو يبا مني شي..ولا متى ياااه رمسني يالله تعالوا نجوف شو الزبده...رفعت راسي اطالعه ...يااه و قعد جريب مني جفتوا يبا مني شي ..
جفته مستانس : نوره ورا باجر..بخلص اوراقي فـ الدواااوم .. اوراق الدوره.. و قدمت خوله كمرافقق
رديت ابسرعه : و انا !!

ضحك : انتي هههههه بعد لا اتخافين...
ابتسمت : عمور يعني بسافر معاك بتم معاك..
رد علي : هي..بحجز عقب اسبوعين بنسافر ...
استاانست من الخاطر : علني فداك عمور ...
عمور : هي بس فارس يبا ياخذج بوظبي ..
رديت بإنفعال : شووووووووه انت قاعد اتقص علي..
زخني من ايدي : افهميني يا نوره..انا و انتي و خوله بنسافر عن طريق مطار بوظبي تبع الدوام كلهم بسافرون من هناك...ها مب موضوعنا...اهل فارس خاله و خالته يبون يجوفونج...

صديت الصوب الثاني : انا ما ابا اجوفهم...
عمور : ليش تعاندين..

صرخت عليه : انت شو مستوي ذيل فارس كل الي يبا اتسويه له..مب كافي الي سواه فينا...بعد امرابعنه ...
صخ عمور و عقب رمس : تذكري زين ما زين انا الي ضريته بالاول..

سالته : زين و ليش للحين مرابعنك شو يبا فيك مب المفروض خلاص تنتهي الثقه من بينكم..
عمور : قلتلج ما اتعرفين فارس ..فارس قلبه عود ..

صرخت عليه: لو قلبه عود ما ابتزك و خيرك بيني و بين مستقبلك هاللوث الحثاله..
قاطعني عمور: بس صخي صخي .عنبوه محد يروم يرمسج انتي !!..اتحملي هاليومين عقب بتسافرين و ما بتردين البلاد الا عقب سنتين ..

سكت و رجعت اقوله: ها الشي الي امخلني ساكته و صابره ...
وقف : اقولج خالي احمد اتصل بي..عازمنج باجر ع الغدا..بمناسبة ملجتج انتي و فارس ...و شي ناس بيكونون هناك..زهبي روحي...
وقفت و سالته : شو يعني زهبي روحج...

عمور و كانه طفر: اووووووووف انتي صج شرات الياهل الواحد لازم يستعمل معاج الف طريقه علشان ترضين يا الــــــــــــــله ..منج..بخلي خوله اترمسج .انا خلاص مب رايم اسولف معاج اكثر..

و طلع من الحجره..هاي ثاني مره تنقال لي ياهل...شو بلاهم..كلهم يعاملوني جي لها الدرجه انا صعبه !!!و الكل يسوي لي الف حساب ههههههههههههه يسون لي الف حساب ليش منو انا و شو اطلع ..شي يضحك..

و يحزن بـ نفس الوقت ..طلعت من حجرتي و سرت الصاله اطالع التلفزيون..نفخت روحي سويت روحي شيخه الكل يهابني و يسوي لي الف حساب ضحكت هههههههههههههه مدري شو الي خلني اتذكر الموقف الي صار لي مع فارس .
.حيوان قص علي..صج جرحني حتى ما اتصل يعتذر..لا بعد يبا ياخذني ابوظبي ع جثتي يا ولد فلان ...غفلت بس نقزت يوم سمعت رنة جرس الشقه..نشيت افتح الشقه...كانت خوله

اتغشمرت معاها: انتي ما تستحين يايه بيت ريلج..
خوله: ههههههههه يايه امطج من شعرج و اخذج معاي ...؟؟
نوره: ع وين ان شاء الله ..
خوله: عازمتنج ع الغداء فـ المنار ولا ما تبين..
ابتسمت : لا ابا.. و كيف ما ابا و يايتني عزيمه ببلاش ...صبري ببدل ملابسي..
خوله: اوكى بتريااج...بس مب المفروض تستأذنين من فارس
عقدت حياتي: نعم ..

خوله: هي ها المفروض الي يصير الحينه ترا هو الحينه مسؤل عنج ..
أشرت ع الكنبه: اقولج يلسي هني ولا تكثرين عن افرج من البلكونه و اجتلج..
خوله: ههههههههه تسوينها..